1 CORINTHIANS 13

1Nkkwoongnɛ nlɔɔk likaan ɔkkpɛlɛ la sa bayilabɔtɔm Ɔlɔɔmɔlɔɔm, kɛsaap kisinɛnɛ lile ka luppyam, lɛmmwɔɔl anaam lɛtaa tɛ̀ttɛ̀ lɔsap a kippwo ɔkyamkyam, ɔlɔk okeleng. 2Nyanganɛ lakke za kɛyɛn a biyɛnɛ, nsannɛ lilɔɔk ɔkkpɛlɛ ngbaa la kɔlɔɔk a lalup Ebinukkpaapi, nyanganɛ kiyila sa nkkwoongnɛ nlɔɔk ikpok immɔk, ɔzzanga nsɛlɛnɛ kɛsaap, nle bɔfɛɛn bwa gbɔɔ. 3Mkkpa nsam bɛfɛɛn anaam ɔkkpɛlɛ nnyi balɔɔt ba ɔbbɔlnɛbɛ, ɔlɔk nsam kkwɔɔt anaam nnyibɛ bassɛɛn ka lɔkɔɔn, likkɔm nsɛlɛnɛ kɛsaap isak nɛ ba ile. 4Kɛsaap ulenɛ kibbe luppyam la kɛyyɛɛp a bɛnaang, kɛsaap kɔfɔk lissi, gɔɔ ikkɔlɔ iyyɛɛp a wa annyɔɔng lissi. Kɛsaap bisese lissi. 5Kɛsaap kɛbbɔl eleme lissi, Kɛsaap kitun a kɔlɔɔk la wa annyɔɔng ba kɛyanga. 6Kɛsaap bubbi ba kɛggyan, kɛggyan lɔkkwɔɔn a kɔlɔɔk. 7Kɛsaap ba kɛsaal. Kiyila la luttina la kibbe-luppyam-assɛ ba bɛsaal. 8Kɛsaap ba kikpeke. Buyɛnɛ bule baang, ɔzzànga vvenɛ bukpeke. Lasɔɔk za kitolo likaan lale baang, ɔzzànga vvenɛ lasaal. Kɛsan a kɔlɔɔk kile baang, ɔzzànga vvenɛ kɛsaal. 9Kɔlɔɔk ɔkkpɛlɛ ba itaka isan. Biyɛnɛ ɔkkpɛlɛ ba itaka iyɛn. 10Ɔzzànga ɛkɛtɛ vveeng ule ukpeke kufaak a kɛsan a kɔlɔɔk la biyɛnɛ vvenɛ baala kule. Ule usseke uwɔlɔlɔ. 11Ka ɛkɛtɛ ya ntiinɛ waantiti, nlɔɔk tɛ̀ttɛ̀ waantiti. Nsan kɔlɔɔk tɛ̀ttɛ̀ waantiti. Nttina luttina tɛ̀ttɛ̀ waantiti. Ɔzzànga gedegede mung ka nlenɛ utumalɔɔt lile, nzzɔɔkbong biwaan ɔkkpɛlɛ. 12Bwa nyɛnnɛ gedegede mung butaa tɛ̀ttɛ̀ bɔfɛɛn bwa nyɛnnɛ ka kiyenge ka kisinɛ lɛyyɛɛp. Ɛkɛtɛ lakpeke ɛffɔnɛ, vvenɛ ibee ippyɛɛk ka isso. Bwa nsannɛ gedegede mung, doddo bwɛ ba nsan. Ɔzzànga vvenɛ nsanbyɛ tɛ̀ttɛ̀ Ebinukkpaapi ɛsanɛnɛ anaam. 13Bɛfɛɛn ’byɔng bɛkkyaat bilenɛ kɔlɔɔk: kiyila, luttina, la kɛsaap. Ɔzzánga kɛsaap kɛttanɛbyɛ ɔkkpɛlɛ liggbenge.

will be added

X\