1 CORINTHIANS 12

1Gedegede mung nle ka nlɔɔknɛ kwa lasɔɔk za lassinɛ ka Kuyeeng-Ɔlɔɔmɔlɔɔm. Nggyan nttɛ asanyɔng lɔkkwɔɔn atumyɔngzɛ, ikpana anaam. 2Asanyɔng lɔsan attɛyɔng ka ɛkɛtɛ ya atiinɛyɔng ba ilat, atiiyɔng ka eddu ilɔɔp, ya itaanɛ ikɔɔmwɔyɔng amiiyɔng ka ɛfɛɛn ya ɛbbɔlnɛ. 3Asan attɛyɔng ɔlɔɔt wa ulenɛ la Kuyeeng-Ɔlɔɔmɔlɔɔm ba ule wa ule ɔlɔɔk ɔttɛ, “Jesus, ubbu ɔlɔɔt.” Gɔɔ ɔlɔɔt ba ule wa ule ɔbwɔɔlɔ ɔttɛ, “Jesus ulenɛ Uyini” Kuyeeng-Ɔlɔɔmɔlɔɔm kusinɛ la ammɛ lile. 4Lasɔɔk za Kuyeeng-Ɔlɔɔmɔlɔɔm kɔsɔɔknɛ lale bɛssanga bɛssanga. Ɔzzànga Kuyeeng ’kwɔng baang kkwɔn kɔsɔɔknɛ. 5Itɔk ile ggbadam ya atelenɛ Uyini, ɔzzànga itɔk ɔkkpɛlɛ itele Uyini ’wɔng baang vvɔn keem. 6Bɛssanga lakke bile ggbadam bya anaangnɛ bɛfɛɛn, ɔzzànga Ebinukkpaapi ’yɔng baang nnyɔn ennyinɛ ɔlɔɔt ɔkkpɛlɛ lakke za kɛnaangbyɛ. 7Kuyeeng ’kwɔng baang kɔkɔɔm itɔk buubuu kɔyɔɔwɔyɔng kɔttɛ kule baang la annyɔɔng kwa budoddo ayyɔɔt ɔkkpɛlɛ. 8Kuyeeng-Ɔlɔɔmɔlɔɔm ’kwɔng baang kunnyinɛ ɔlɔɔt kukele. Akkwɛ kkwɔn baang kunnyinɛ ɔlɔɔt ɔlɔk bikɔɔm. 9Kuyeeng ’kwɔng baang kkwɔn kunnyinɛ ɔlɔɔt ɔlɔk kiyila. Akkwɛ kkwɔn baang kunnyinɛ ɔlɔɔt ɔlɔk lakke za kittula ittula. 10Kuyeeng-Ɔlɔɔmɔlɔɔm kunnyi ɔlɔɔt ɔlɔk lakke za kɛnaang a bɛmaanga. Ɔlɔɔt ɔlɔk kunnyimɛ lɛsɔɔk za kɛbwɔɔlɔ lɛmmwɔɔl Ebinukkpaapi. Ɔlɔɔt ɔlɔk kunnyimɛ lakke za kɛsan a lɛsɔɔk za lissinɛ ka Kuyeeng-Ɔlɔɔmɔlɔɔm la lɛsɔɔk za lisinɛ ka Kuyeeng-Ɔlɔɔmɔlɔɔm lissi. Ɔlɔɔt ɔlɔk kunnyimɛ lakke za kikkwoong a kitolo likaan. Ɔlɔk kunnyimɛ lakke ukkwoong ɔbwɔɔlɔ tɛ̀ttɛ̀ balɔɔknɛ. 11Ɔzzànga Kuyeeng ’kwɔng baang kkwɔn kɔnaangnɛ bɛssanga lilɔɔk ’sɔng ɔkkpɛlɛ. Kunnyi ɔlɔɔt ɔlɔɔt kɛssanga lɛsɔɔk za ammɛ tɛ̀ttɛ̀ kɔsaapnɛkwɛ. 12Christ ule tɛ̀ttɛ̀ ɔlɔɔt vvɔn la bikkeep ggbadam. Ɔzzànga ule kkwɔɔt ssɔn mkkpa ndɔk bikkeep bile buubuu. 13Ka ɛtɔk nnyɔn, ɔkkpɛlɛ ayyɔɔt, balɔɔt a Jews la Ikanakana, babili la balɔɔt ba basinɛ babili lile, Kuyeeng ’kwɔng baang kɔnaangbonyɛlɛ baptizim isseke ba kkwɔɔt ssɔn. Ɔkkpɛlɛ ayyɔɔt bannyibongyɛlɛ Kuyeeng ’kwɔng baang kkwɔn battɛ ivva. 14Kkwɔɔt biini kikkeep ssɔn ba liyanga. Bikkeep bilesɛ ggbadam. 15Ulenɛ ka kikkpɔ kɛlɔɔknɛ kɛttɛ, “Anaam ka nsinɛ kɔbɔɔk lile, anaam wa kkwɔɔt lissi.” Nkwɔng baang lissi kule kɔnaang kikkpɔ kisi kikkeep a kkwɔɔt lile. 16Ulenɛ ka kɔtɔɔk kɔlɔɔknɛ kɔttɛ, “Anaam ka nsinɛ zzeen lile, anaam wa kkwɔɔt lissi.” Nkwɔng baang lissi kule kɔnaang kɔtɔɔk kusi kikkeep a kkwɔɔt lile. 17Ulenɛ bɔfɛɛn a kkwɔɔt ɔkkpɛlɛ lisikilinɛ zzeen, lile linaang nang lippyee? Ulenɛ bɔfɛɛn a kkwɔɔt ɔkkpɛlɛ lilenɛ kɔtɔɔk keem, lile linaang nang lippyee kizzoom? 18Tɛ̀ttɛ̀ kulenɛ mung, Ɔlɔɔmɔlɔɔm ɔssɛɛn ɔlɔɔt bikkeep ka kkwɔɔt buubuu tɛ̀ttɛ̀ kɔsaapmɛnɛ. 19Kkwɔɔt ɔkkpɛlɛ lilenɛ kikkeep ssɔn, nzang kkwɔɔt lisibong lile. 20Ka kulenɛ ning, bikkeep a kkwɔɔt bile ggbadam, ɔzzànga kkwɔɔt lile ssɔn. 21Kwakkwɛ zzeen lisinɛ likkwoong lɛlɔɔk la kɔbɔɔk lɛttɛ, “Annɔ wɔ ba ngyan.” Gɔɔ lɛttɔ ba likkwoong lɛlɔɔk la bukkpɔ lɛttɛ, “Anaam wɔ ba nggyan.” 22Ɔzzànga kaang ning kɔlɔk ba ikkwoong inaang bikkeep a kkwɔɔt ’byɔng baang bya bɛkpɛlɛnɛ bisinɛyɛlɛ lile. 23Ɔzzànga bikkeep ’byɔng baang bya ittinanɛ ittɛ abbyɛ bya kɔlɔɔk gaang ba bile, abbyɛ bilenɛ bya ikɔɔmnɛ byɛ doddo. Bikkeep a kkwɔɔt bya bisinɛ lɛyyɛɛp, bɛppyɛɛnɛ bile bya latele. 24Ɔzzanga bikkeep ’byɔng baang bilenɛ bya bikkeep a kkwɔɔt ayyɔɔt bya bɛttanɛ lɛyyɛɛp bisinɛ lɛggyan. Ɔlɔɔmɔlɔɔm biini ɔlɔɔmbong kkwɔɔt kɛlɔɔm sa utelenɛ bikkeep a kkwɔɔt bya bɛsɛlɛnɛ latele. 25Akkwɛ kɔnaangnɛ kkwɔɔt lile ssɔn. Bikkeep a kkwɔɔt ɔkkpɛlɛ abbyɛ bɛyanga kɛssanga kɛnaang ssɔn la ba abbɛ. 26Kikkeep a kkwɔɔt ssɔn kɛyɛnnɛ akama, bikkeep ’byɔng bakang ɔkkpɛlɛ vvenɛ bɛssɛ bɛyɛn akama. Babungunɛ kikkeep ssɔn, bikkeep ’byɔng kaang ɔkkpɛlɛ vvenɛ bɛssɛ bɛyanga laggele. 27Ɔkkpɛlɛ annyɔɔng alenɛyɔng kkwɔɔt a Christ. Ɔlɔɔt la vvɔn ulenɛ kikkeep a kkwɔɔt ammɛ. 28Ɔlɔɔmɔlɔɔm ɔsambongyɛlɛ ɔkkpɛlɛ uloko ɛfɛɛn kkwɔn ka luzɔɔm. Ka kɛkɔɔm ɛtɔk, uloko bayilabɔtɔɔm a Jesus, ka ɔssɛ-ɔttɛlɛ bappyee-kutolo Ɔlɔɔmɔlɔɔm. Ka bikpit bɛkkyaat, uloko bakopolo-ukopolo ɔbɛtɛ la balɔɔt ba banaangnɛ bɛmaanga la balɔɔt ba unnyinɛbɛ lakke za kittula ittula, ɔlɔk battele ba abbɛ ɔlɔk bakɔɔmbɛ, ɔlɔk batolo bafaa likaan. 29Ɔkkpɛlɛ abbɛ lissi balenɛ bayilabɔtɔɔm a Jesus la bappyee-kutolo Ɔlɔɔmɔlɔɔm, ɔlɔk bakopolo lukopolo. Ɔkkpɛlɛ abbɛ lissi bayanganɛ lakke za kɛnaang a bɛmaanga, 30ɔlɔk kittula ittula, ɔlɔk kitolo ufaa kukaan, ɔlɔk kɛbwɔɔlɔ kwa balɔɔknɛ. 31Asam ippyam annyɔɔng alokoyɔng ka lasɔɔk ’zɔng mung ɔkkpɛlɛ, za lattanɛ lɛyyɛɛp. Ɔzzanga nle ka nbwɔɔlɔwɔnɛyɔng lɛsɔɔk za lattanɛ lasɔɔk ɔkkpɛlɛ.

will be added

X\