1 CORINTHIANS 11

1Akeetnɛyɔng anaam, tɛ̀ttɛ̀ anaam nkeetnɛ Christ. 2Nbunguwɔyɔngbong ka akkenɛnɛyɔng ɛkɛtɛ ɔkkpɛlɛ la kikup a lukopolo anaam gwa nkopolowɔnɛyɔng. 3Ɔzzànga nggyan nttɛ asan attɛyɔng Christ ulenɛ uzzilɛttɔ lutini ɔlɔɔt ɔkkpɛlɛ. Waanwalam ulenɛ uzzilɛttɔ wanavva ammɛ. Ɔlɔɔmɔlɔɔm ule uzzilɛttɔ a Christ. 4Waanwalam wa ɔssɛɛnnɛ luzɔɔm, ɔlɔk ɔbwɔɔlɔ lɛmmwɔɔl Ɔlɔɔmɔlɔɔm ka kibbi balɔɔt la bɔfɛɛn ka uvvoongnɛ ka lɛttɔ, waanwalam ’wɔng baang ɔssɛɛn Christ ka izzit. 5Wanavva duu wa ɔssɛɛnnɛ luzɔɔm, ɔlɔk ɔbwɔɔlɔ lɛmmwɔɔl Ɔlɔɔmɔlɔɔm ka kibbi ɔsɛlɛ bɔfɛɛn ka lɛttɔ ka uvvoongnɛ, wanavva ’wɔng baang ɔssɛɛn ulam ka izzit. Ning baang buu ba ule la wanavva wa balemɛnɛ kittulu lɛkkpaat. 6Wanavva usinɛ lɛttɔ livvoong ɔllɛ ka ɔkkpaatnɛ kittulu ɔllɔt. Kɛkkpaat a kittulu la kɛzza kittulu ka bilenɛ kɔlɔɔk izzit ka kkwɔɔt a wanavva, kɔyyɛɛp ka uvvoongnɛ lɛttɔ. 7Ba kɔyyɛɛp ka waanwalam uvvoongnɛ lɛttɔ. Waanwalam ɔbal Ɔlɔɔmɔlɔɔm, wanavva ɔbal ɔlɔɔt. 8Waanwalam ka wanavva ba ussi, wanavva ussinɛ ka waanwalam. 9Ɔlɔɔmɔlɔɔm ba ɔnaang waanwalam kwa wanavva, ɔnaang wanavva kwa waanwalam. 10Ulenɛ kwa bayilabɔtɔɔm Ɔlɔɔmɔlɔɔm, battɛ kɔyyɛɛp ka wanavva uvvoongnɛ lɛttɔ ammɛ ɔyɔɔ basan battɛ ule ka kɛkɔɔm a walam ammɛ. 11Ka lɛfal ayyɔɔt la Uyini, mkkpa kɔnaang, wanavva tɛ̀ttɛ́ ɔlɔɔk ɔttɛ waanwalam lissi ɔyangamɛnɛ, ɔlɔk waanwalam ɔlɔɔk ɔttɛ wanavva lissi ɔyangamɛnɛ ammɛ. 12Ɔlɔɔmɔlɔɔm ka ɔkɔɔmnɛ waanwalam ɔnaang wanavva, kule kɛssanga ssɔn, waanwalam, wanavva ɔmaatnɛ. Ɔzzànga ɔkkpɛlɛ abbyɛ bissi ka Ɔlɔɔmɔlɔɔm biffu. 13Attinayɔng ’kwɔng kɛyɔɔng. Mung kɔyyɛɛp mung ka wanavva ɔssɛɛnnɛ luzɔɔm ka kibbi balɔɔt usi bɔfɛɛn ka lɛttɔ livvoong ɔɔ? 14Lɛfal annɔ biini likopolowɔ lɛttɛ waanwalam kiloko kittulu ka lɛttɔ kɛlɔm, kɔlɔɔk izzit. 15Kittulu sa kɛlɔmnɛ ka lɛttɔ a wanavva, bɔfɛɛn a bɔllɛ. Kittulu ka kɛlɔmmɛnɛ ning baang bannyimɛ battɛ kɛtaamɛ tɛ̀ttɛ̀ ubba wa uvvoongnɛ ka lɛttɔ. 16Ɔzzànga ɔlɔɔt ɔlɔk ubumnɛ kɛkangala utumkwɛ, kwa nle nlɔɔk kule kɔttɛ ayyɔɔt, ɔlɔk izɔɔm Ɔlɔɔmɔlɔɔm eleme ɛlɔk ba iyanga ya kɛssɛɛn a luzɔɔm. 17Ka lɔkamala gwa lule ka luffunɛ mung, annyɔɔng lissi ka nbungunɛ. Mitin a luzɔɔm annyɔɔng ɔnaang lilɔɔk sa libbɔlnɛ litta sa liyyɛɛpnɛ. 18Ka kɛkɔɔm ɛtɔk, babwɔɔlɔnɛbong battɛ, ka mitin a luzɔɔm annyɔɔng lakup a balɔɔt lalɔk lale baang ba lalenɛ ka bɛkangala. Kule ka lɔkkwɔɔn nsan. 19(Kule bbwak ka akangalanɛyɔng nkwaaning balɔɔt ba balenɛ ka lufoom gwa bbwak bayɛnbɛ kkpelegedee.) 20Ka adudanɛyɔng ɛfɛɛn kkwɔn, kazzi Uyini lissi ka azzinɛyɔng. 21Ka azzinɛyɔng, ɔlɔɔt ɔlɔɔt ututala ɔsam kwa ammɛ ɔmma umii, ɔlɔk balɔɔt balɔk bakɔɔng buwɔɔng, balɔk bazzi, bavva babimi. 22Ssala sa annyɔɔng biini ba ayangayɔng sa azzinɛyɔng kazzi avvayɔng batak ɔɔ? Vvenɛ afimyɔng luzɔɔm Ɔlɔɔmɔlɔɔm asamyɔng balɔɔt ba ɔbbɔlnɛbɛ appyɛɛ assɛɛnyɔng ka izzit ɔɔ? Attina attɛyɔng nle nlɔɔk nang la annyɔɔng ntum ’kwɔng? Nbunguwɔyɔng ɔɔ? Maaye, baala nbunguwɔyɔng. 23Lukopolo gwa nkopolowɔnɛyɔng mung lussinɛ ka Uyini. Nttɛ Uyini, Jesus, ka kɛtɔm sa bazzimɛnɛ issɛ ɔsam brɛɛd, 24uwomo Ɔlɔɔmɔlɔɔm kɛnaang, ɔsamnɛ ɔbɛkɛ unnyibɛ ɔttɛ, “Uwɔng ulenɛ ɛkkpakkwɔɔt anaam ya elenɛ ya annyɔɔng. Anaangyɔng ning nkwaaning akkenɛyɔng.” 25Balenɛ kazzi livve, ɔbbal ommonggo lɛsam, ɔttɛ, “Ommonggo ’wɔng mung ulenɛ ufaa kɛbɛtɛ kɛnnɔ Ɔlɔɔmɔlɔɔm wa ussinɛ ka linnyi anaam. Ɛkɛtɛ duu ya avvanɛyɔng ka ammɛ, anaangyang ning baang nkwaaning akkenɛyɔng.” 26Ɛkɛtɛ duu ya azzinɛyɔng brɛɛd ’wɔng mung, avvayɔng ka ommonggo ’wɔng, abwɔɔlɔyɔng kɔlɔɔk a lubbe ammɛ tɔttɔt Uyini ɔppyɛlɛ uffu. 27Nkwɔng kɔbbal likup: ɔlɔɔt wa uzzinɛ kazzi Uyini, ɔlɔk ɔvva ka ommonggo ammɛ ka ɛtɔk ya kusinɛ Uyini lɛsaap, ɔnaangbong bubbi utum kkwɔɔt Uyini la linnyi ammɛ. 28Ɔlɔɔt la vvɔn uttinamɛ kɛyɔɔng ka kɛkɔɔm ɛtɔk, tɛ́ttɛ́ uzzi kazzi ’kwɔng mung ɔvva ka ommonggo ’wɔng. 29Ɔlɔɔt wa usinɛ ifɛɛt a kkwɔɔt Uyini lɛsan, ɛkɛtɛ ya uzzinɛ kazzi Uyini ɔvva ka ommonggo ammɛ ɔwwɔɔlmɛbong kɛyɔɔng. 30Kwakkwɛ baang annyɔɔng balɔk ɔffaakwɔnɛyɔng, akkpɛlɛyɔng, balɔk bassɛ la babbe. 31Ulenɛ bɔfɛɛn ikɔɔmnɛ ɛtɔk ittinayɛlɛ kɛyɔɔng, nzang ka kɛkaal Ɔlɔɔmɔlɔɔm baala ittɔ. 32Ɔzzànga Uyini ka ɔkaalnɛ kɛkaal ayyɔɔt ɔbbayɛlɛ bikɔɔm, nkwaaning basiyɛlɛ lɛwwɔɔl batoolo la ’vveeng wɔng. 33Ikpana anaam, ɛkɛtɛ duu ya aggbanɛyɔng ɛfɛɛn kkwɔn attɛ azziyɔng kazzi Uyini, ataa akatyɔng bannyɔɔng azziyɔng kɛttɛlɛ kɛttɛlɛ. 34Ɔzzànga ɔlɔɔt wa buwɔɔng bulemɛnɛ lɛsaap, uzzi kazzi ka ssala nkwaaning Ɔlɔɔmɔlɔɔm usiwɔ kibbi linnyi ka alenɛyɔng ɛfɛɛn kkwɔn liduda. Lilɔɔk sa lissekenɛ, vvenɛ nkaalsɛ ka ɛkɛtɛ ya nle nffu.

will be added

X\