1 CORINTHIANS 10

1Ikpana anaam, nggyan nttɛ asanyɔng kwa kɔnaangnɛ bagɛlɛnya ayyɔɔt ba iyɛddɛ-iyɛddɛ ba bakupnɛ Moses. Ìkkpálá-lukpaaggbeede ikatnɛbɛ ɔkkpɛlɛ abbɛ bakum Ukolo-lɔyɔngɔ, bulɔk busibɛ lɛnaang. 2Banaangbɛ baptizim ɔkkpɛlɛ ka ikkpálá-lukpaaggbeede la lɔyɔngɔ basseke bakup-a-Moses. 3Ɔkkpɛlɛ abbɛ bazzi kazzi kwa kassinɛ ka Ɔlɔɔmɔlɔɔm. 4Ɔkkpɛlɛ abbɛ bavva bannyi Ɔlɔɔmɔlɔɔm ’bɔng baang bbɔn. Bavva bannyi ka akpana wa Ɔlɔɔmɔlɔɔm unnyinɛbɛ. Akpana ’wɔng baang wa umiinɛ la abbɛ, ɔdɔkɔnɛ Christ biini. 5Gɔɔ ka ɛkɛtɛ ’yɔng baang balɔɔt ggbadam basi Ɔlɔɔmɔlɔɔm lɛsaap. Ɔzzánga babbe bammin gbɔ́ɔgbɔ̀ɔgbɔ́ɔ ka kasɛkɛ kɛmat. 6Bɛfɛɛn ’byɔng ɔkkpɛlɛ bɛnaang bɛyɔɔyɛlɛ ayyɔɔt. Bɛttamayɛlɛ bɛttɛ ifɔngɔ kɔlɔɔk a bubbi kɛbɛlɛ lɛnaang tɛ̀ttɛ̀ abbɛ banaangnɛ. 7Ɔlɔk izɔɔm innyi ilɔɔp tɛ̀ttɛ̀ balɔɔt balɔk banaangnɛ. Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Balɔɔt badɔkɔ bataa-ɔtaa bazzi kazzi bavva batak, bafeele batɔm.” 8Ifɔngɔyɔng kikup a bwanavva tɛ̀ttɛ̀ balɔɔt balɔk banaangnɛ. Balɔɔt balɔk banaangbong ning baang lalɔp innɔ balɔɔt laffa la innɔ zzilliffa battɔ babbe basaal ka kɛtɔm ssɔn. 9Ifɔngɔ Uyini kɛllɛ tɛ̀ttɛ̀ balɔɔt balɔk banaangnɛ, izzɔkɔ iwwɔɔlbɛ. 10Tɛ̀ttɛ́ ikkwoongyɔng ibwɔɔlɔ tɛ̀ttɛ̀ balɔɔt balɔk babwɔɔlɔnɛ, Uyilabɔtɔɔm-a-Lubbe ɔwwɔɔlbɛ. 11Bɛfɛɛn ’byɔng mung ɔkkpɛlɛ bɛnaangbɛ nkwaaning balɔɔt balɔk bayɛn bakkpɔkbyɛ ka luvva, bɛtaa tɛ̀ttɛ̀ lɔttama gwa bɛttamanɛyɛlɛ ka ilenɛ ka ɛkɛtɛ ya lakpeke lale ka laffɔnɛ. 12Ɔlɔɔt duu wa uttinanɛ ɔttɛ ule ka kibee, ɔsan ɔnaang nkwaaning usi lɛttɔ. 13Lutini illɛ duu ya iffunɛ ka ɛfɛɛn annɔ ule kɛssanga illɛ sa kɛtaanɛ kiffu ka balɔɔt. Ɔzzànga Ɔlɔɔmɔlɔɔm uloko nsekele ammɛ. Baala ɔfɔngɔ ballɛwɔyɔng basak lakke annyɔɔng. Ka ɛkɛtɛ ya balɛwɔnɛyɔng, vvenɛ unnyiwɔyɔng lakke za ale abɛtɛyɔng ɔyɔɔwɔyɔng ɛtɔk assɛ attayɔng. 14Inngwa anaam ya lɔkkwɔɔn, akkyaayɔng kɛzɔɔm ilɔɔp afɔngɔyɔng. 15Nlɔɔk la annyɔɔng ka alenɛyɔng basan-a-kɔlɔɔk. Attinayɔng kɛyɔɔng kwa nlɔɔknɛ. 16Ivvanɛ ka ommonggo wa ikɔɔmnɛ ka kazzi Uyini iwomo Ɔlɔɔmɔlɔɔm kɛnaang, itulbong linnyi a Christ ivva. Izzinɛ kazzi kwa ibbɔknɛ mung iyangabong etini ka ɛkkpa-kkwɔɔt a Christ. 17Ugɔngɔ a brɛɛd ka ulenɛ vvɔn, ɔkkpɛlɛ ayyɔɔt mkkpa iyipi, ile kkwɔɔt ssɔn ka ɔkkpɛlɛ ayyɔɔt itulnɛ ugɔngɔ a brɛɛd ’wɔng baang vvɔn. 18Attinayɔng kwa balɔɔt a Israel ba bazzinɛ kazzi kwa bakɔɔmnɛ bazɔɔm ka labun Ɔlɔɔmɔlɔɔm, batulbong bazɔɔm bannyi Ɔlɔɔmɔlɔɔm. 19Mung nle nlɔɔk nang? Ilɔɔp la kazzi kwa banaangnɛ bannyi ilɔɔp kaffɔ mung ka kɔlɔɔk ɔɔ? 20Maaye. Kwa nlɔɔknɛ nlɔɔk nttɛ bɔfɛɛn bwa bazɔɔmnɛ bannyi ilat bule bwa ilat bwa Ɔlɔɔmɔlɔɔm lissi. Ba nggyan nttɛ aleyɔng balɔɔt ilat. 21Ba akkwoong avvayɔng ka ommonggo Uyini abbalyɔng ka ommonggo ilat lɛvva. Ba akkwoong azziyɔng kazzi Uyini abbalyɔng kwa ilat lizzi. 22Mung iggyan ittɛ inaang Uyini luleep ɔɔ? Faa ittina ittɛ ayyɔɔt ittamɛnɛ lɛkkaam? 23Ɔzzànga kaang battɛ, “Bayila mungyɛlɛ inaang bɔfɛɛn duu.” Kule ka lɔkkwɔɔn, ɔzzànga kɔlɔɔk ɔkkpɛlɛ lissi kɔyyɛɛpnɛ. “Bayila mungyɛlɛ inaang bɔfɛɛn duu.” Ɔzzànga kɔlɔɔk ɔkkpɛlɛ lissi kuttelenɛ ɔlɔɔt. 24Ɔlɔɔt vvɔn gbɔɔ tɛ̀ttɛ́ ɔppyɛɛk kwa isak ya ammɛ biini. Ɔzzànga ɔppyɛɛk kwa kɔyyɛɛpnɛ ɔnaang la balɔɔt balɔk. 25Akkwoong mung azzi bɔfɛɛn duu bwa bataanɛ ka kappya-isɛɛn. Mkkpa asi lɛbap, ɔssanga luttina annɔ. 26Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Ɛkpansi la bɛfɛɛn ɔkkpɛlɛ bya bilenɛ ka annyɛ bile bya Uyini.” 27Ɔlɔɔt wa usinɛ wa luzɔɔm Ɔlɔɔmɔlɔɔm lile ɔkkwɔɔwɔnɛ kazzi, alenɛ luttina lɛnaang gwa kimii, azzi bwa ɔtɔkɔwɔnɛ. Tɛ̀ttɛ́ ayanga lɔbap kwa lɔngwa annɔ. 28Wannyɔɔng ɔbwɔɔlɔwɔnɛ ɔttɛ, “Bakɔɔmbong kazzi ’kwɔng bazɔɔm bannyi ilɔɔp.” Tɛ̀ttɛ́ abɛlɛkwɛ lizzi azzenge luzzi ammɛ ka ulenɛ lɛffɔ ɔlɔɔk ning baang, ɔlɔk ɔwaamɛ. 29Kwa luttina gwa annɔ lissi. Kule kwa luttina gwa ɔlɔɔt ’wɔng baang. Ɔlɔɔt ɔlɔk ɔbap ɔttɛ, “Kulenɛ ning, mbɔng tɛ́ttɛ́ luttina ɔlɔɔt ɔlɔk lɔzzanɛ lakke za kɛnaang a bɛfɛɛn ɔkkpɛlɛ? 30Nwomonɛ Ɔlɔɔmɔlɔɔm kɛnaang ka kazzi anaam, ɔlɔɔt ɔkpɛnnɛ kwa ’bɔng la kazzi ’kwɔng baang.” 31Kɔyyɛɛp mung. Duu bwa anaangnɛ, ule kazzi kwa azzinɛ ɔlɔk kɛvva sa avvanɛ, anaangbyɛ ɔkkpɛlɛ ka latele Ɔlɔɔmɔlɔɔm. 32Ataa kɛtaa sa ale asi kɔlɔɔk lɛggyan la balɔɔt a Jews ɔlɔk la Ikanakana, ɔlɔk la balɔɔt a luzɔɔm Ɔlɔɔmɔlɔɔm. 33Ɔzzànga anaangyɔng tɛ̀ttɛ̀ anaam nnaangnɛ, nbum ɔlɔɔt la vvɔn ɔwaamɛ ka linaang sa nnaangnɛ. Nsi budoddo bwa anaam biini lɛggyan, nggyan budoddo bwa balɔɔt ɔkkpɛlɛ nkwaaning baddu.

will be added

X\