TITO 2

1’Bo laga do, tane kulia naga na zuzuki ku togole laga sosolo. 2Taki ŋutu ti ’diri kilo kukuzu adi ti ko tine ti ’beri, ti ko gbo’dini a lo kukukaki, ku kpinyi na’bu‚ ti ko gbo’dini ku rugo naga sosona, ku nyadruna, ku teiliko ti rile itro. 3’Bo ’do taki wate naga ti ’diri kine kukuzu itro adi gbiyeri lasikolo ti zukini be na ŋutu nakiye kine, ka’bi ko ku soso soso kuliata, ka’bi ko ku gbogbo’da a upi ti yawa. Ti ko togole kulia na’bu kine. 4Ti ko todinikindri wate naga a ke’diti kine i nyadru na lalia kase kilo ku ŋazi kase kilo itro. 5Ti ko gbo’dini ku kpinyi na’bu‚ ku teiliko laga a lokiye‚ a kakita ti ’ba kine, ku teiliko lo’bu‚ ku sobu na kulia ti lalia kase lepe kilo‚ kulia ti Ŋun kine ka’bi ku ’data. 6’Bo ’do male mugu ku ’bula kilo itro adi ti ko gbo’dini ku kpinyi na’bu. 7Temetaki mugu i kuliata giri a kpiye lo konesi naga a na’bu kine, togole lolulo ti gbo’dini ’ba toŋulupa a lo kukuka, 8ku kuliata na tatayi soso naga ani romoki sosoyi‚ adi ma karerenyanilo gbo’dini ku yukuwe‚ ka’bi lepe ku tazu kulia naro kayani. 9Taki upi kilo kukuzu adi ti ko gbo’dini ku sobu na kulia ti drumala kase kilo i tikindra na ko nyola i kuliata giri‚ adi ka’bi ko ku gbogbo’da a karerenya‚ 10ka’bi ko ku gbogbo’da a ŋutulu lo ’du’dumuza kapazi ruirui‚ ’bo ti ko kpene teiliko laga ti to’diri koru, ma ko ku kpeleni togole lo Ŋun Kariteni likalo i kuliata giri katani. 11’Bo ’busa na’bu na Ŋun ina apuru i ritundro na ŋutulu giri. 12’Busa na’bu ŋanina ina todinikindro yi adi ti yi redri gbo’da naga ani ramani kulia ti Ŋun ku ki’beŋa ti ina ka de kine, ma yi ku gbo’dini ku kpinyi na’bu i ina baŋe de, a ŋutulu laga mŋgba, lo ’delakindra teiliko i teminizo na Ŋun. 13Ti yi momondri yendru nika naga a na koŋo na’bu na puruni Ŋun lika laga a druma‚ Kariteni lika Yesu Kristo ku mo’yuna. 14Lepe lo tikindra mugu ku yi‚ ma lepe ku dakundri yi i kulia naro kine giri‚ ma lepe ku tokelakindri mugu ŋutulu laga lo igbo’da a zuru lonye lepe, laga igbo’da ku puso i kondra na konesi naga na’bu kine. 15Tane kine kulia de‚ male mugu ku ŋutulu‚ ririŋe ko itro ku teriŋi koru. Le’de ŋutu ka’bi ku ’da’dari do.

will be added

X\