TITO 1

1Paulo laga a upiye lo Ŋun‚ a lososonyo lo Yesu Kristo itrolo‚ adi ma na ku to’durodri rugo na ŋutulu lo nyumu Ŋun kilo‚ ku todinikindro na ko na kulia ti to’diri naga na momora ku gbiyeri laga lo ’delakini teili i teminizo na Ŋun ilo. 2kine kulia de se na lira i yendru na ru naga ani lenga naga Ŋun laga ani lengu ’burelo ma sarakindri kazu ’bero ti kana inga ’bayina. 3Kugbo baŋena naga aromoki, Ŋun druga kpeza kulia ti ina ru de kine i kulia kanye kine katani. kine kulia de akoloki na‚ nyena trugini na ko ku kukuzu na Ŋun Kariteni likalona. 4Na aroma ku Tito‚ ŋiro lio laga mŋgba i rugo nika nagelena katani ilo. ’Busa na’buna ku teili lo trotro lo ŋiyu ku Ŋun Monyelo yu ku Kristo Yesu Kariteni likalo yu itrolo ti gbo’dini ku do. 5Na kazu akolokindro do Kirete yu ku kine kulia de‚ adi mo do ku kukundri kulia naga inga aku kona kine, mo do ku ge’i temezi kilo i kezino giri kata yu be naga ma na takindri do kukuzuna. 6Temezi ŋani kilo ti gbo’dini a ŋutulu laga ’ba kulia na sosoyi sosoyi‚ ku wate gele gele‚ ti ŋazi kasiko kilo gbo’dini a karuko‚ laga ŋutulu kilo ani tazu adi ko ’ba teiliko lo payini kulia ti ’beri kugbo adi ko a ka’data kilo. 7Nyenaga kametanilo ti gbo’dini ’ba kulia na sosoyi sosoyi igbonaga lepe a katiyuni lo ŋutu ti Ŋun kilona. Lepe ka’bi ku kokonu be naga ma lepe lepe nyadrinina‚ ka’bi lepe ku ŋoŋoma wule‚ ka’bi lepe ku gbogbo’da a kamerani kugbo a kabitoni lo ŋutulo‚ kugbo ku mago na galani riye. 8’Bo ti lepe gbo’dini a karukoni lo komo‚ ti lepe gbo’dini a kanyarani lo kulia na’bu‚ lo tizu mugu‚ laga ku teili lo’bu‚ a lokiye‚ laga lo tiga magorilo. 9Ti lepe ’depakindri mugu i togole lo kulia na ’delakini teili kini kine‚ ma lepe ku romoki todinikindro ŋutulu togole laga soso‚ ma lepe ku tigi karerenya kilo ’busa. 10’Bo ka’data kilo rodri kata‚ laga lo tataazu kuliata naga a ’busa ’busa kine‚ laga a ka’bo’bolia, alanguna ŋutulu laga a ti tokore na taarona kilo. 11Goki ko ka’bi ku tata kulia‚ igbonaga ko kilo kokorozu ŋutulu ti ’beŋito kilo giri giri kaŋo‚ ma ko togo’ini togole laga adi ka’bi ko ku totogolo ku gala na riye naga ku kikoli loro. 12Ŋutu gele kasiko i dridriŋini laga a kakeyoni lasikolo akulia adi‚ “Ŋutu ti Kirete kilo ko a ’bureniko ’duu‚ ko a loro beti gboroŋa, ŋutulu laga a lu’betiko, kaginya kilo.” 13Bo na kine kulia dena a ’diri‚ kuwade ririŋe ko ku teriŋi‚ ma ko ku gbo’da ku rugo naga soso. 14Ka’bi ko ku ’de’delaki yoyolozu nasena i likikirito ti Yahudi kilo kini, kugbo i kukuzuki ti ŋutulu laga lo redra kulia ti to’diri kine kini. 15Kapazi kilo giri gbo ku kekeli ku ŋutulu laga atokela kilo i koŋoni, ’bo kapatio le’de ’bayi laga a lokiye ku ŋutulu laga ’ba kekeli laga aku rugo kilo i koŋoni‚ igbonaga yoyolozu nasikona ku dendra naga kasiko i teili kata yuna ’ba kekeli ina. 16Ko akulia adi se adeni Ŋun‚ ’bo ko kilo renya lepe ku konesi kase kine. Ko gbo be ŋutulu lo ŋmwa a loro‚ ’ba sobu na kulia, ko ani zuki i kondra na kone gele laga a lo’bu ’dia gbo adinyo kpe.

will be added

X\