ROMA 9

1Na tazu kulia naga mŋgba ku Kristo katani‚ na ani lengu ’bure. Dendra naga kuwe teilinina a’dodru bo na kulia seku na kugele ku Yuka Nakiyena 2adi na gbo ku drelia koru ku miye naga ani lengana kuwe teilini. 3’Bo na kodro nyadru adi ti na lomoni lomo ma na tokoreni ku Kristo i muguni i ritundro na luŋaseri kuwe laga yi gbo’dini a zuru logele kilo ’busa. 4Ko a ŋutu ti Isiraeli, ’bo Ŋun kazu atoyeŋundra ko a ŋazi kanye, atemetakindra ko todruma nanyena, atikindra ko tomoresi kine ku kukuzu nanyena, ku kita na teminioni lepena, asarakindra ko sareta kanye kilo itro. 5Merenyezi kilo a kasiko, Kristolo lupundro kasiko yu ku kulia ti mugu kine. Lepe laga a Ŋun lo gbo’da i kuliata giri i koŋonilo ti purani pura paratra paratra. Amena. 6Na ani kulia adi kulia ti Ŋun kine ayeŋundra a ’busa, ’bo ŋutu ti Isiraeli kilo ani gbo’da giri a Isiraeli laga mŋgba. 7Ŋutulu laga a nyomo ti Abarahama kilo ani gbo’da giri a ŋazi ti lepe, ’bo Abarahama ataki adi “Nyomo kolu kilo iluluŋu i nyumuti lo Isakalo.” 8Kine kulia de trugo adi ŋazi lo yuŋele ku kulia ti mugu kilo ani gbo’da a ŋazi ti Ŋun, ’bo ŋazi lo yuŋele ku kulia ti sare kilo, se lo luŋu a nyomo. 9’Bo sare ŋanilo lo kulia adi, “I luŋa laga soso lu na ma lu iyiyiyte, ’bo Sara ma lu igbogbo’da ku ŋiro.” 10Agbo’da de ka’deloni, ’bo kugbo Rebeka naga kazu arumbi pele ku monye lika laga Isaka, 11ti ŋazi ti lepe kilo inga aku yuŋele, aku kondra kulia na’bu kuwa naro‚ ataki lepe adi, “Ŋiro laga a kayolo ikonakindra lo bolo kita.” 12Kine kulia de se na tikindra kulia naga ma Ŋun gelundri ŋutulu i suluki yu kine i lira soso, agbo’da ku kulia ti konesi ti ŋutuluni, ’bo ku kulia ti luŋe lo Ŋun kine. 13Be naga ma wuronina adi, “Na anyari Yakobo, ’bo na aŋmoza Esau.” 14Kuwade ma yi kulia adinyo ya? Ŋun laga a kamuyini lo kulia ya? ’Bayi, ani gbo’da de. 15’Bo lepe atakindra Mose adi, “Na itikindra ŋutu laga ma na nyadrini tikindra lepeŋalo ediyo, ’bo na igbo’da ku pele na’bu ku ŋutu laga ma na nyadrini gbo’dini ku pele na’bu ku lepelo.” 16Kuwade kine kulia de agbo’da yeŋundra ku nyadru kugbo ku kita naga ku teriŋi na ŋutulu kilonani, ’bo ku ediyo lo Ŋun ilo. 17’Bo kulia na wuwuro kine atakindra Faro adi, “Ku kine kulia de na atoŋizu do, i kpeza na teriŋi niona konu katani ma kari kuwe kine trukozini i kani giri.” 18Kuwade Ŋun gbo ku ediyo ku ŋutu laga ma lepe nyadrini gbo’dini ku ediyo kilo, ’bo lepe tikindra teili logo ku ŋutu laga ma lepe nyadrini tikindra teili logo kilo. 19Kuwade do ipiza na adi, “Ŋun ’diza ilo i mandru ŋutu gbandra ya? ’Bo ŋa lo romoki goza lepe ku kulia naga ma lepe nyadrini kine ya?” 20’Bo do a ŋutu laga ŋa lo rerenya ku Ŋun ya? Ŋo laga ma kakukunani kukundrilo ani romoki piza kakukunanilo adi‚ “Do kukundra na de gbandra ya?” 21Kagbiyani lo soŋgbolo ani gbo’da ku teriŋi i miminiza na lipo na ŋwena ya? Lepe ani romoki gbeza soŋgbolo mure ku lipo nagelena ya? Le’delo a lo yakiya ku komo, le’delo a lo yakiya mu luŋa. 22’Bo kulia adinyo ya? Kugbo Ŋun anyadru temetakindra ŋoma nanyena ku tikindra teriŋi nanyena ti denani, lepe gbo ku teili lo mada koru ku soŋgbolo laga a ŋutulu laga ma lepe ŋomani kilo, laga lo mondru karaki kilo. 23’Bo lepe anyadru temetakindra todruma nanye naga koruna ku soŋ gbolo laga a ŋutu kanye, laga lo rumbi ediyo lonyelo, laga ma lepe kukundri ’bero i rumbi na pura kiloni. 24Soŋgbolo ŋani kilo a yi lepe, laga ma lepe lungini kilo, agbo’da ku Yahudi kilo i dridriŋini ka’deloni, ’bo ku Monyazi kilo i dridriŋini itro. 25Beti naga ma lepe tazini i buku na Hoseana katanina adi, “Ŋutulu laga kazu ani gbo’da a zuru lio kilo, na ilulungu ko a zuru lio. ’Bo ŋutu naga kazu na ani nyadru ina, na ilulungu lepe a ŋutu naga ma na nyadri ina.” 26“ ’Bo i piri naga ma tayini adi, ‘Ta ani gbo’da a zuru lio’ nu, I nu piri de ko iluluŋu a ŋazi ti Ŋun laga zorulo.” 27’Bo Isaya alaiza ku kulia ti ŋutulu ti Isiraeli kilo adi, “ ’Dibani kodro ŋutu ti Isiraeli kilo awila be kuzo naga suburi i kutu yu kine kpe, laga a limbito kilo lo iririte ’du. 28’Bo Matalo ikondra kulia kanye kine i kani i tutuzo na kulia ŋani kine wuleŋa gele.” 29Beti naga Isaya ma kuliani a kayona adi, “Ku Mata lo mongoyo ti kamoro kilolo laga kazu aku kolokindro yi ŋazi kilo, kazu kodro yi iyeŋundra be Sodoma, yi igbo’da kazu kodro be Gomora.” 30Kuwade ma yi kulia adinyo ya? Monyazi laga ani galadru kena nase a laga mŋgba kilo ko akena mŋgba ku kulia ti rugo kine. 31’Bo Isiraeli laga lo galadru kukuzu naga na kendra se mŋgbana kilo aku kondra kukuzu ŋanina tro. 32Gbandra ya? Igbonaga ko aku galadru lepe ku rugona, ’bo ku konesi ina. ’Bo ko a’duki i ŋurupi laga lo pupugo ŋutululo kini. 33Be naga ma wuronina adi, “Mete, na lo ’delakindra Ziona yu ŋurupi laga igbo’da a kumu lo pupugo ŋutulu, laga lo itikindra ko i bayi. ’Bo ŋutu lo rugo lepelo aka rumbi yukuweni.”

will be added

X\