ROMA 7

1Ta aku de‚ luŋaseri, adi kukuzuna a mata lo ŋutulo i baŋe naga ma lepe gbo’dini zoruna ka’delo ya? ’Bo na lo kulia ku ŋutulu laga adeni kukuzuna kilo. 2Ku nokana gbo ku lale‚ kukuzuna atodya ko kugele seku lale lo lepelo i baŋe naga ma lalelo gbo’dini zoruna‚ ’bo kugbo lale lo lepelo laga atuwa‚ tuwa ŋanina alagu noka ŋanina i kukuzu naga na todya ko kugele seku lalena. 3Kuwade kugbo lepe naga autu i le’de lale‚ ti lale lo lepelo zoru‚ lepe iluŋu a noka na towute. ’Bo kugbo lalelo laga atuwa‚ lepe alake i kukuzu ŋanina‚ ’bo kugbo lepe naga alunya ku le’de lale‚ lepe ani gbo’da a noka na towute uye. 4Kuwade luŋaseri kuwe kilo‚ ta kazu atatuwa i kukuzunani ku mugu na Kristona‚ ma ta ku lunyazi ku le’de ŋutu‚ lepe laga atoŋiye i dridriŋi na ŋutulu laga atatuwa kilo i tikindra na yi i radakindra na Ŋun konye. 5’Bo kazu i naga ma yi sakani i kulia ti mugu kine nu‚ ki’beŋa naro ti ’beri kaya naga ma kukuzuna toŋizi kine‚ akondra kita kaya ’berini i rada na konye ti tuwa. 6’Bo tinade yi gbo’di alake i kukuzu ŋanina‚ igbonaga yi atatuwa i kulia naga kazu ma yi torani a upi kunu ina. Kuwade yi agbo’da kondra kita i bo na kukuzu na ’bero naga awuronani, ’bo i ru naludu na tiyi Yuka Nakiyena. 7Kuwade ma yi kulia adinyo ya? Kukuzuna a toro ya? ’Bayi‚ ani gbo’da de. Kazu kodro kugbo kukuzuna naga ’bayi‚ na kazu kodro aku deni toro tro. Kugbo kukuzuna aku wuro adi‚ “Ku susuki konye i kapa ti lege i mugu‚” na kazu kodro aku deni sukindro na konye ku kapazi ti lege i mugu tro. 8Nyenaga torona ariondru kiko i kukuzuna kata yu i tikindra na suki na konye ka’de ka’dena aŋiyu kuwe teilini. Ku kukuzuna naga ’bayi‚ torona kedri kodro ayeŋundra a opu. 9Kazu na gbo zoru ti inga kukuzuna ’bayi nu‚ ’bo ku kukuzuna naga ayeŋundra, torona aŋiye ’do‚ ’bo laga na‚ na atuwa. 10Kukuzu ŋani naga a na runa azakindra na tuwa. 11’Bo torona ariondru kiko i kukuzuna kata yu i ’bo’boliza na na‚ druga torona tatuza na ku kukuzu ŋanina. 12Kuwade kukuzuna a nakiye‚ ’bo kulia giri gele gele naga ma kukuzuna tazini kine a nakiye‚ ko soso‚ a na’bu. 13Kuwade kulia naga a na’bu kine yeŋundra kuweni a tuwa ya? ’Bayi‚ ani gbo’da de. ’Bo torona na zondra tuwa kuwe muguni ku kiko lo kulia naga a na’bu kine‚ ma torona kpiyani a toro a ’diri. Kuwade ku kiko lo kukuzunalo torona akpiya a naro koru arodru. 14Yi adeni adi kukuzuna a na yuka‚ ’bo laga na‚ na a ŋutu lo mugu‚ laga atogborozi a upiye lo torolo. 15Kulia na konu na kine na aku deni, igbonaga kulia naga kodro ma na nyadrini kondra kine na ani kondra ina‚ ’bo kulia naga kodro ma na ŋmozi a naro kine‚ se na konu na ayu. 16Nyenaga ku na lo kondra ŋo laga na aku nyarilo, na arugo adi kukuzuna a na’bu. 17Gbode ŋo lo kondra kine kulia de ilo agbo’da a nani, ’bo toro naga kuwe teilinina, nye na kondra ko. 18Na adeni adi kuwe katani, trugo adi kuwe muguni‚ kulia na’bu kine ’bayi. Na kodro nyadru kondra ŋo laga a lo’bu ilo‚ ’bo na ani romoki kondra tro. 19Kulia na’bu naga ma na nyadrini kodro kondra kine‚ na ani kondra‚ ’bo kulia naro naga kodro na ani nyadru kondra kine, se na konu na ayu. 20Nyenaga kugbo na laga akondra ŋo laga na ani nyadru kondra ilo‚ agbo’da a nani‚ ’bo toro naga kuwe teilinina‚ nye na kondra. 21Kuwade na arumbi kine kulia de adi ku na kodro nyadru kondra ŋo laga a lo’bulo, kulia naro kine gbo nyoga ku na. 22’Bo na nyola kuwe teilini ku kukuzu na Ŋun. 23’Bo na bonga kulia ku’de kuwe muguni naga na moro ku kulia ti yoyolozu niona kine. Lepe a’deba na a upiye lo kulia ti toro naga kuwe muguni kine. 24Wu wu! Na dio! Ŋa lo ininadru na i mugu na tutuwana de ya? 25Iyete lo Ŋun, ku Yesu Kristo Mata likalo. Gbode, ku yoyolozu niona‚ na a upiye lo kukuzu na Ŋun ina, ’bo ku mugu niona, na a upiye lo kukuzu na toro ina.

will be added

X\