ROMA 6

1Kuwade ma yi kulia adinyo ya? Ku yi sakani i kondra na toro ma ’busa na’buna zozoreni ya? 2’Bayi, ani gbo’da de. Ku yi laga kazu atatuwa i toroni, yi roromoki saka ’do i toro katani adidinyo ya? 3Ta aku deni adi yi giri laga a’deba baputizi lo tolubo yi i Kristo Yesu katani kilo, a’deba baputizi lo tolubo yi i tuwa na lepena katani itro ya? 4Ku baputizi ŋanilo yi anuka kasi lepe, yi alubo i tuwa na lepena kata yu. Kuwade be naga kazu Kristo ma toŋiyeni i dridriŋi na ŋutulu laga atatuwa kilo ku teriŋi naga koru na Monyelo ina, yi itro roromoki woro i ru naluduna katani. 5’Bo kugbo yi laga atomoraki kugele ku lepe i kpiye lo tuwa na lepena katani, alanguna yi itomodya ’beri kugele ku lepe i ŋiye na lepena katani itro. 6Yi adeni adi gbiyeri lika lo ’bero laga kayani ilo a’beko ku Kristo kugele i kedini mugu‚ ma teriŋi na gbiyeri laga ku torolo ma lengi ’busa‚ ka’bi yu ku gbo’da a upi ti torona ’do. 7’Bo kugbo ŋutu laga atuwa‚ lepe alakundra mugu i toroni. 8Kugbo yi laga atatuwa kasi Kristo kugele‚ yi arugo adi yi ma lu igbo’da zoru kasi lepe kugele itro. 9Yi adeni adi Kristo atoŋiye i dridriŋi na ŋutulu laga atatuwa kilo azo‚ ’bo lepe ’baka tuwa ’doni. Tuwana gbo’di ani gbo’da a mata lo lepe ’do. 10Tuwa naga kazu ma lepe tuwani nu‚ lepe kazu atuwa i toroni‚ luŋa gele ’du‚ ’bo tinade ma lepe gbo’di zoru ina‚ lepe ilo zoru ku Ŋun yu. 11Kuwade keneta ’beri a opuo i toroni‚ ’bo zoru ku Ŋun yu ku Kristo Yesu katani. 12Kuwade ku kokolokita torona i gbo’da a mata lo ’beri kasu na romoki tatuwa tatuwa kine‚ i tikindra na ta i kondra be naga ma ki’beŋa kasu kine nyadrinina. 13Ku titikita ’beri kasu kine i toroni‚ i gbo’da a kapazi laga a ti kulia naro‚ ’bo tikita ’beri ku Ŋun ni be na ŋutulu laga lo toŋiye zoru i dridriŋi na ŋutulu laga atatuwa kilona, ’bo tikita ’beri kasu kine ku Ŋun ni i gbo’da a kapazi laga a ti logbiye lo’bulo. 14’Bo kuru kuwade torona aka gbo’da a mata lasuni, igbonaga ta ani saka i bo na kukuzuna, ’bo i bo na ’busa na’bu na Ŋun ina ina. 15Adinyo kuru ya? Ti yi kondri torona igbonaga yi ani saka i bo na kukuzuna, ’bo i bo na ’busa na’bu na Ŋun ina ya? ’Bayi, ani gbo’da de. 16Ta aku deni adi ku ta tikindra ’beri a upi i sobu na kulia ti le’de ŋutu‚ ta a upi ti ŋutu laga ma ta sobi kulia ti lepe kinelo ya? Ŋona ti toro naga na zakindra ta tuwa‚ ŋona ti sobu na kulia naga na tikindra ta i kena mŋgba. 17’Bo iyete lo Ŋun‚ igbonaga kazu ta asaka a upi ti toro‚ ’bo tinade ta kilo sobu ku teili giri kulia ti to’diri naga kazu ma ta kolokini kine. 18Ta kazu alake i toroni‚ kuwade ta ayeŋundra a upi ti logbiye lo’bulo. 19Na takindra ta a ŋutuŋutu ku naga ma ta gbo’dini ’ba teriŋina. Be naga ma ta kazu tikindri ’beri i gbo’da a upi ti kuliata naga ’ba kekeli kine‚ ku ti kulia naro i kondra na torozina, ’bo tinade tikita ’beri giri a upi ti logbiye lo’bulo ma ta kelani ’busa. 20’Bo kazu inga ma ta gbo’dini a upi ti toro nu‚ logbiye lo’bulo aku tomba ta. 21’Bo ta kazu arumbi rezema laga inyo i kuliata naga ma ta kazu kondrini naga na tikindra ta tinade yukuwe kine ya? ’Dute na kulia ŋani kine a tuwa. 22’Bo tinade ta alake i toroni‚ ta ayeŋundra a upi ti Ŋun‚ kuwade rezema laga ma ta rumbilo a kela nasuna‚ ’bo ’dute na lepena a ru naga ani lengana. 23’Bo ropeta ti toro kilo a tuwa; ’bo ’doke laga ma Ŋun tikindri kanalo a ru naga ani lengana ku Yesu Kristo Mata likalo.

will be added

X\