ROMA 5

1Kuwade ku naga ma yi kenani mŋgba ku Ŋun i konyeni ku rugona ina, yi arumbi teili lo trotro ku lepeni ku Mata lika Yesu Kristo. 2Lepe azondra yi, ku rugona‚ i ’busa na’buna katani‚ i piri naga ma yi lirani tinadena. Yi gbo ku nyola ku naga ma yi yendri mo’yu na Ŋun naga na iŋaru yina. 3Agbo’da de ka’deloni, ’bo yi gbo ku nyola ku kulia ti sasanya nikana kine, igbonaga yi adeni adi sasanyana zowundra teili lo rile, 4teili lo rilelo zowundra gbiyeri laga a lo’bulo‚ gbiyeri laga a lo’bulo tikindra yendru ku kulia naga ŋero yu kine. 5Yendru na kulia naga ŋero yu kine tikindra yi i gbo’da ’ba yukuwe‚ igbonaga Ŋun atozodru nyadru nanyena kaya teilikoni ku Yuka Nakiye naga ma lepe tikindri yinana. 6I luŋa laga ma yi gbo’dini ’ba teriŋi lu‚ Kristo atuwa i piri na ŋutulu laga ani kuga Ŋun kilo i luŋa lo gelu Ŋun lu. 7’Dibani kodro kugbo kulia ti le’de ŋutu kine naga soso kpe‚ rie na ŋutu laga lo tuwa ku lepe i pirinilo igbo’da a riŋi‚ ŋona le’de ŋutu kata lo romoki i togo’yu na teili i tuwa ku ŋutu lo’bulo i pirini. 8’Bo Ŋun akpekindra yi nyadru nanyena igbonaga kazu ma yi gbo’dini inga ku torozina kpe, Kristo atuwa kaya pirini. 9Ku naga ma yi kenani mŋgba ku tuwa na lepena ina, alanguna lepe iriritundro yi i ŋoma na Ŋun ina katani. 10’Bo kugbo yi kazu a mero ti Ŋun, lepe atomodya yi a worisi kanye ku tuwa na Ŋiro lonyelona. ’Bo tinade kugbo yi laga a worisi ti Ŋun kilo, alanguna yi iririte ku ru na Kristona. 11Agbo’da de ka’deloni, ’bo yi gbo ku nyola ku Ŋun katani ku Mata lika Yesu Kristo, laga atomodya yi gbo’di a worisi ti Ŋun ilo. 12Kuwade torona alupundro i kani ku kulia ti ŋutu gele kine, ’bo tuwana alupundro ku kulia ti torona kine. Tuwana druga yeŋundra ku ŋutulu kilo girini igbonaga ŋutulu kilo giri akondra toro ina. 13A ’diri torona asaka i kani ti inga kukuzuna ’bayina, ’bo ti inga kukuzuna ’bayina, torona ani kena tro. 14’Bo ŋiyu ku Adama yu yeŋadru tozo ku Mose yu tuwana asaka a mata lo ŋutulu giri i koŋoni, ’dibani kodro ku ko laga aku kondra toro beti naga ma Adama kondrini i kokorozu na kukuzu na Ŋun ina kpe. ’Bo Adama a kpiye lo Ŋutu laga lo ipopondralo. 15’Bo ’doke laga ma Ŋun tikindri ku ’busa na’bu nanyenalo ani gbo’da beti toro ŋanina. ’Bo ku ŋutulu rodri atatuwa ku toro na ŋutu gele‚ alanguna ’busa na’bu na Ŋun ku ’doke laga ku ’busa na’bu na ŋutu gele laga Yesu Kristo ilo ariara koru i ŋutulu rodri. 16’Doke ŋanilo ani gbo’da be kulia na yeŋundra ku kulia ti toro na ŋutu gelena. Ŋera na kuliana ayeŋundra kazu i bo na toro gele i tikani na ŋutulu‚ ’bo ’dokelo ayeŋundra i bo na torozi rodri i kenani na ŋutulu mŋgba. 17Kugbo tuwana agbo’da a mata lo ŋutulu giri i koŋoni ku toro na ŋutu gele ŋanilona, alanguna ŋutulu laga lo rumbi ’busa na’bu naga zore ku ’doke lo kenani ko mŋgba kilo, ko igbo’da a mataki i tuzoru nasena ku ŋutu gele laga Yesu Kristo. 18Kuwade ku kulia ti toro gele kine, ŋera na kuliana amoga ŋutulu giri i tiga na ko, gbode kone gele laga sosolo atikindra ŋutulu giri i kena mŋgba i tikini na ko ru. 19Be naga ŋutu gele aku sobu kuliana, atikindra ŋutulu rodri ayeŋundra a katoronya, gbode ku kulia ti ŋutu gele laga asobu kulialo, ŋutulu rodri iyeyeŋundra mŋgba. 20Kazu kukuzuna alupundro i tikindra torona i zore, ’bo i piri na tozoreni torona, ’busa na’buna azore alangu koru. 21Kuwade be naga ma torona gbo’dini a mata i zakindra na loŋutu tuwa ina, ’busa na’buna ti gbo’dini a mata i kenani na ŋutulu mŋgba, i tikindra na ko ru naga ani lengana ku Yesu Kristo, Mata likalo.

will be added

X\