ROMA 4

1Kuwade ma yi kulia adinyo ku kulia ti Abarahama, merenye lika laga a lo mugulo ya? 2Kazu kodro ku Abarahama laga akena mŋgba ku kulia ti konesi naga ma lepe kondrini kine‚ lepe roromoki pupudya mugu‚ ’bo agbo’da ku Ŋun i koŋonini. 3’Bo kulia na wuwuro kine akulia adinyo ya? Adi‚ “Abarahama arugo Ŋun‚ ku kulia ŋani kine Ŋun akendra lepe mŋgba.” 4Kakitanilo rurumbi ropeta‚ ’bo rope ŋanilo ani gbo’da a ’doke‚ ’bo a rope. 5’Bo kugbo ŋutu laga ani kondra kitalo laga arugo Ŋun lo kendra ŋutulu laga lo pazu nye kilo mŋgbalo, ŋutu ŋanilo ikena mŋgba ku rugo nanyena. 6Kuwade Dawidi itro atazu kulia ti koŋo na’bu na ŋutu laga ma Ŋun kendri mŋgba ’ba kondra na konesilo, adi‚ 7“Koŋo na’buna ina ku ŋutulu laga ma Ŋun ’dizi kulia naro kasiko‚ laga ma Ŋun mugini torozi kasiko kine kaŋo kilo. 8Koŋo na’buna ina ku ŋutu laga ma Matalo aka kendra toro na lepenanilo.” 9Ina koŋo na’bu de a na ŋutulu laga lo taaro kilo ka’delo, kugbo a na ŋutulu laga aku taaro kilo itro ya? Yi kulia adi Ŋun akendra Abarahama mŋgba ku kulia ti rugo na lepena kine. 10Ŋun kendra lepe de nanu ya? Ti lepe aku taaro‚ kugbo i bo na taaro na lepena ya? Agbo’da i bo na taaro na lepenani, ’bo ti lepe aku taaro. 11Lepe arumbi taarona a kpiye‚ adi lepe akena mŋgba ’bero ku rugona‚ ti inga lepe aku taaro. Kuwade Abarahama gbo’di a merenye lo ŋutulu giri laga arugo kilo‚ ma ko kenani mŋgba‚ ’dibani kodro ku ko aku taaro kpe. 12Lepe a merenye lo ŋutulu laga ataaro kilo itro‚ agbo’da ku kulia ti taaro nasikona ka’deloni, ’bo ku naga ma ko kepodri bo na Abarahama ku rugo na lepena ti inga lepe aku taaro ina. 13Sare laga ma Ŋun sarakindri Abarahama ku nyomo ti lepe kilo adi ko i’de’deba ina ka de a luma kase ilo agbo’da Ŋun sara ku naga ma Abarahama sobi kukuzunani, ’bo ku naga ma lepe kenani mŋgba ku Ŋun i konyeni ku kulia ti rugo nanyena kine ina. 14Kugbo ŋutulu lo sobu kukuzuna kilo lo igbo’da a kaluma‚ kpeza adi rugona ayeŋundra a ’busa‚ ’bo sare ŋanilo ayeŋundra a ’busa itro. 15Kukuzuna zowundra ŋoma na Ŋun‚ ’bo kugbo kukuzuna ’bayi, kokorozu na kukuzuna gbo ’bayi itro. 16Ku kine kulia de sarelo atiki ku kiko lo rugolo, ma lepe gbo’dini a ’busa na’bu na Ŋun, ma lepe lirani ku nyomo ti Abarahama kilo giri. Agbo’da ku ŋutulu laga lo kondra kukuzuna kilo ka’deloni, ’bo ku ŋutulu laga lo rugo kilo beti naga ma Abarahama ruginina. ’Bo lepe a merenye lika giri. 17Be naga ma wuronina adi, “Na a’delakindra do a merenye lo zuro rodri.” Kuwade sarelo a lo’bu ku Ŋun laga ma Abarahama rugilo i konyeni. Ŋun lo tikindra ŋutulu laga atatuwa kilo rulo‚ lepe lo lungu kapa laga inga ’bayi kilo be naga ma ko gbo’dini katana. 18Abarahama arugo, druga yendru ku teili logo. Kuwade lepe ayeŋundra a ’diri a merenye lo zuro rodri, be naga ma takini lepena adi, “Nyomo kolu kilo igbo’da de.” 19’Dibani kodro ku kiŋazi ti lepe kilo ayenga be nyoga kamazi kpe, ku lepe laga ayo’yu kulia ti mugu nanye naga gbo’di nyoga ku tuwa kine, druga kulia ti Sara naga ma gbo’dini a undo kine, lepe tro aku ko’yu rugo nanyena. 20Teili lo lepelo aku yoyongu mugu i rugo nanye na sare lo Ŋun ilo, ’bo lepe a’durodru ku teriŋi i purani na Ŋun, 21igbonaga lepe adeni soso adi Ŋun iroromoki kondra beti naga ma lepe saranina. 22Ku kine kulia de lepe akena mŋgba ku rugo nanyena. 23Kine kulia de, adi, “Lepe akena mŋgba” aku wuro ku kulia ti lepe kine ka’delo, 24’bo ku kulia kaya kine itro. ’Bo yi akena mŋgba ku naga ma yi rugini Ŋun lo toŋizu Yesu Mata lika i dridriŋi na ŋutulu laga atatuwa kilona. 25Lepe atatuwi ku torozi kaya kine, druga toŋiye ma yi ku kenani mŋgba ku Ŋun i konyeni.

will be added

X\