ROMA 3

1Kuwade Yahudi kilo rodru ku inyo ya? ’Bo rezema na taarona a inyo ya? 2Arodru ku kuliata giri. A kayona Ŋun atikindra Yahudi kilo i riridra na kulia kanye kine. 3Kugbo ku’de kilo laga ’ba teiliko ti to’diri, kulia adinyo ya? Ku teiliko kasiko ti to’diri laga ’bayi‚ teili lo Ŋun lo to’dirilo gbo ’bayi itro ya? 4’Bayi‚ ani gbo’da de. ’Dibani kodro ku ŋutulu giri laga a ’bureniko kpe‚ Ŋun lepe a ’diri‚ be naga ma wuronina adi‚ “Konu kuliani, do ikekena mŋgba‚ ’bo i ŋera na kulia konu kine‚ do ilalangu.” 5’Bo kugbo konesi kaya naro kine temetakindra konesi naga soso ti Ŋun kine‚ ma yi kulia adinyo ya? Ŋun laga a loro ku naga ma lepe ŋomani ku yi ina ya? ’Bo na kulia be naga ma ŋutulu kulianina. 6’Bayi‚ ani gbo’da de. Kugbo gbo de, Ŋun roromoki ŋedya kulia ti ŋutulu ti ina ka de kilo kine adidinyo ya? 7’Bo kugbo konesi kuwe ti to’bure na kpeza kulia ti to’diri ti Ŋun kine i tikindra na lepe pura arodru, lepe ŋedya kulia kuwe kine a naro beti ŋutu loro gbandra ya? 8’Bo yi ani kondra toro ma kulia na’bu kine lupundroni gbandra ya? Ku’de ŋutulu takindra adi na tazu de, ’bo ŋutulu ŋani kilo iŋeraki kulia naga soso. 9Adinyo kuru ya? Yi laga a Yahudi kilo, kulia kaya kine arodru kulia ti ku’de kilo ŋutulu ya? ’Bayi tro‚ ’bo na asosozu kulia a kayona adi Yahudi kilo ku Monyazi kilo ko mure katru gbo i teriŋi na toro katani. 10Be naga ma wuronina adi‚ “Ŋutu lo’bu ’bayi‚ ’dibani gele ’bayi. 11Kadenani lo kulia ’bayi‚ kagalani lo Ŋun ’bayi. 12Ko giri agirara i merete‚ ko giri ayeŋundra a loro‚ ŋutu lo kondra a lo’bu ’bayi‚ ’dibani gele ’bayi.” 13“Roroto kasiko kilo gbo be gulomo naga gboŋa‚ ko ’bo’boliza ŋutulu ku ŋedepa kase kilo.” “Kulia na lupundro kasiko i kutuzini kine be wiri lo ’boro’boro.” 14“Kutuzi kasiko kine azore ku lombu‚ ku teiliko lo potroru.” 15“Ko wo ku mukuzi i ’bugo na rima‚ 16karakina ku dreliana kine gbo kasiko i kikolini‚ 17’bo ko aku de kiko lo teili lo trotrolo tro.” 18“Kuka na Ŋun ’bayi kasiko i teilikoni.” 19Nyenaga yi adeni adi kulia giri naga na wuro i kukuzuna katani kine se na taki ŋutulu laga lo gbo’da i bo na kukuzuna kilo‚ adi ma ŋutulu giri yiŋa tali‚ ti ŋutu ti ka kilo giri gbo’dini i ŋedya na Ŋun na kuliani. 20’Bo le’de ŋutu ’bayi lo kena mŋgba ku Ŋun i konyeni ku sobu nanye na kukuzuna. Ku kukuzu ŋanina ŋutulu kilo dendra adi se akondra toro. 21Tinade kiko laga ma Ŋun kendri ŋutulu mŋgbalo akpeza mugu. Ani gbo’da ku kulia ti kukuzuna kine‚ ’dibani kodro kukuzuna ku kakeyo kilo a’dodru bo na kulia ŋani kine kpe. 22Ŋun kendra ŋutulu kilo giri mŋgba ku naga ma ko rugini Yesu Kristona, ’bo kora na dridriŋi na ŋutuluna ’bayi. 23Ŋutulu kilo giri akondra torona‚ ’bo ko ani yenga i mo’yu na Ŋun ina kata yu. 24’Bo Ŋun kendra ko mŋgba ku ’busa na’bu nanye naga a ’doke laga kanalo‚ ku naga ma Kristo Yesu dakundri ko ina. 25Ŋun atikindra Yesu adi ku tuwa na lepena ti gbo’dini a ’i’ile lo kukunani kulia ti torozi ti ŋutulo kilo ku rugo nasiko naga ma ko rugi lepena. Ŋun atikindra Kristo i kpeza na kiko laga ma nye kendri ŋutulu kilo mŋgbalo. Kazu ’berona Ŋun atoyongu mugu ka’bi nye ku roba torozi naga ma ŋutulu kilo kondri kine. 26’Bo i ina baŋe de‚ lepe akpeza adi nye laga mŋgba‚ ’bo nye ikendra ŋutulu laga lo rugo Yesu kilo mŋgba itro. 27Kuwade pura na ’berini ina ya ya? Akoloki kaŋo. Ku kulia ti inyo ya? Ku kulia ti konesi kine ya? ’Bayi‚ ku kulia ti rugo kine. 28Kuwade yi adeni adi ŋutulo ilo kena mŋgba ku kulia ti rugo kine‚ agbo’da ku kondra na lepe na kukuzunani. 29Ŋona Ŋun a Ŋun lo Yahudi kilo ka’delo ya? Ani gbo’da a lo Monyazi kilo itro ya? Lepe a lo Monyazi kilo itro. 30’Bo Ŋun lepe gele’du. Lepe ikendra ŋutu laga ataaro kilo mŋgba ku kulia ti rugo nasikona kine. Lepe ikendra ŋutu laga aku taaro kilo mŋgba ku kulia ti rugo nasikona kine itro. 31Kuwade yi itoyeŋundra kukuzuna a ’busa ku kulia ti rugona kine ya? ’Bayi‚ ani gbo’da de. Yi kilo toliriza kukuzu ŋanina.

will be added

X\