ROMA 2

1Ku kine kulia de‚ ku do laga a ŋa kpe‚ do laga lo ŋedya kulia ti le’de ŋutulo‚ do ’ba kulia naga do irerenyani. ’Bo kugbo do lo ŋedya kulia ti le’de ŋutu‚ do ilo ŋedya kulia konu lepe kine itro‚ igbonaga do lepe kondra kulia ŋani kine itrona. 2Yi adeni adi ŋere lo Ŋun ilo aromoki ŋutulu lo kondra kulia ŋani kine soso. 3Do laga lo ŋedya kulia ti ŋutululo, kugbo do lepe kondra de‚ do rambu adi do ma lu ililira go i ŋedya na Ŋun na kuliana ya? 4Kuwa teili lo Ŋun laga a lo’bu lo’bulo, ku teili lo lepe lo tumada‚ ku lo rile ilo, do ’delakindra ko giri a ’busa ya? Do aku deni adi teili lo’bu lo Ŋun ilo ilo pikundro do i lopugo na teili ya? 5’Bo ku teili logo lolu laga do ani lopukoni tro ilo‚ do ilo riritakindra mugu ŋomana i luŋa laga ma Ŋun ku kpezi ŋoma nanyena ku ŋedya nanye na kulia naga sosona lu. 6Lepe ma lu iroroba kulia ti ŋutulu giri gele gele beti konesi kasiko kine. 7Ŋutulu laga inga aku kanya ku konesi na’bu‚ laga lo ga’yu purana ku sopona ku ru naga na yiŋiki kinina kilo‚ Ŋun ma lu ititikindra ko ru naga ani lengana. 8’Bo ŋutulu laga a karerenya‚ laga lo pazu kulia ti to’diri kine kilo‚ lo kekebu bo na kuliata naro kilo‚ ko irumbi ŋoma ku troro na pele na Ŋun ina. 9Sasanyana ku dreliana igbogbo’da ku ŋutulu giri lo kondra toro kilo, a kayona ku Yahudi kiloni, ’bo ku Monyazi kiloni itro. 10’Bo purana ku sopona ku teili lo trotrolo ku ŋutulu giri lo kondra a lo’bu kilona‚ a kayona ku Yahudi kiloni‚ ’bo ku monyazi kiloni itro. 11’Bo Ŋun ani ge’ya loŋutu tro. 12Ŋutulu giri lo kondra toro ’ba dendra na kukuzuna kilo ko itukaraki ’ba dendra na kukuzuna. ’Bo ŋutulu giri laga adeni kukuzuna lo kondra toro kilo iŋeraki kulia kine ku kukuzu ŋanina. 13Ŋun agbo’da kendra kayiŋa ti kukuzuna kilo mŋgbani‚ ’bo ŋutulu laga lo kondra beti naga ma kukuzuna nyadri­nina kilo‚ se lo ikena mŋgba. 14Monyazi laga ’ba kukuzuna kilo, kugbo ko ku ’beri lo kondra beti naga ma kukuzu ŋanina nyadrinina, ’dibani kodro ku ko laga ’ba kukuzu kpe, ko gbo ku kukuzu nase. 15Ko akpeza adi konesi naga ma kukuzuna nyadrini kine awuro kasiko i teilikoni. Dendra nasiko naga i teili yuna ’dodru bo na kulia kasiko kine itro. Kuwade yoyolozu nasiko naga ka’de ka’dena isosozu ko kuwa ilogu ko 16i luŋa laga ma lu ma Ŋun ku ŋedyi kuliata naga ma ŋutulu ’dandri kase teiliko yu kine ku Yesu Kristo, be naga kuu na’bu niona ma tazini nu. 17’Bo do laga lo lungu mugu a Yahuditio ilo, do atogu mugu ku kukuzuna i muguni, do pudya mugu ku Ŋun. 18Do adeni kulia naga ma Ŋun nyadrini kine, do arugo ŋo laga a lo’bulo, igbonaga do atodiniki kukuzuna ina. 19Do arumbi a ’diri adi do a ka’dolani lo kuwe lo ŋutulu laga ku konye a mudumudu kilo‚ a parara a ŋutulu laga lo saka i mudeni kilo‚ 20a katodinoni lo ŋutulu laga ’ba yo’yu kilo, a katogoloni lo ŋazi kilo itro, kpiye lo kulia ti dendra ku ti to’diri kine a konuŋa i kukuzuna katani, 21do laga a katogoloni lo ku’de ŋutululo, do ani togo’yu mugu itro ya? Do lo trugo adi ka’bi ko ku koko’ya koko’yalo, do lo koko’ya ya? 22Do lo kulia adi‚ “Ku kokonu towute” ilo, do lo kondra towutena ya? Do lo ŋmoza ŋo lo teteminio kilolo, do lo koko’ya kapazi ti kadi na Ŋun kilo ya? 23Do lo pupudya mugu ku kulia ti kukuzunalo, do lepe tikindra Ŋun yukuwe ku kokorozu nonu na kukuzu ŋanina ya? 24Be naga ma wuronina adi‚ “Ku kulia kasu kine Monyazi kilo momorozu kari ti Ŋun kine.” 25A ’diri ku do laga asobu kukuzuna, taarona gbo ku rezema‚ ’bo ku do laga ani sobu kukuzuna, taaro nonuna yeŋundra be naga do aku taarona. 26Kuwade ku ŋutu laga aku taarolo laga asobu kukuzu ŋanina‚ lepe ani kena be naga ma lepe ataaro ina ya? 27’Bo ku ŋutu laga aku taaro ku kulia ti mugulo laga asobu kukuzuna, lepe lo iŋedya kulia konu kine i tiga na do. ’Dibani kodro ku do gbo ku kukuzu naga awurona, ku taarona kpe‚ do lo kokorozu kukuzu ŋanina. 28Gbo’da naga a Yahuditio laga mŋgbalona ani gbo’da a kulia ti kaŋo‚ ’bo taaro naga mŋgbana ani gbo’da a kulia ti mugu naga kaŋona ka’delo tro. 29Yahuditio laga mŋgbalo a ŋutu lo gbo’da de kanye teilinilo ’bo taaro naga mŋgbana a kulia ti teili‚ naga ma Yuka Nakiyena kondrini kine‚ ani gbo’da a kulia ti kukuzu naga awuro kine tro. Ŋutu laga be ilo de ilo rumbi pura ku Ŋun yu‚ agbo’da ku ŋutuni.

will be added

X\