ROMA 14

1Rukundrita ŋutu laga ’ba teriŋi kanye rugonilo, ’bo ku rerenyata rerenya kasi lepe ku kuliata naga na rarama kine tro. 2Ŋutu le’delo rugo nyosu na kapazi kilo giri‚ ’bo le’de laga ’ba teriŋi ilo nyadru nanyena nyosu ’detilo naruwo ka’delo. 3Kanyonilo ka’bi ku ’da’dari ŋutu laga ani nyosulo, ’bo ŋutu laga ani nyosulo ka’bi ku ŋeŋeri kulia ti ŋutu laga a kanyoni ilo‚ igbonaga Ŋun arugo lepena. 4Do a ŋa lo ŋedya kulia ti kakitani lo le’de ŋutu ya? Kulia ti lepe kine kunu ku mata lo lepelo yu‚ kugbo ŋona ililira, kugbo ŋona i’du’duki. A ’diri ililira, igbonaga Matalo tikindra lepe i lirani ina. 5Le’de ŋutu lo rambu adi kolo ne’de naga a druma arodru ne’dena, ’bo le’delo rambu adi kolozi kine giri zozo. Ti ŋutulu giri gele gele dene yoyolozu nasena. 6Ŋutu lo rambu kulia ti kolona kine rambu de ku kulia ti Matalo kine‚ ’bo kanyonilo nyosu i teminizo na Matalo‚ igbonaga lepe tikindra Ŋun iyete ina. ’Bo ŋutu laga aredra nyosu ne’de ilo redra nyosuna i teminizo na Matalo‚ igbonaga lepe tikindra Ŋun iyete itrona. 7’Bo le’de ŋutu ’bayi lo gbo’da zoru ku kulia kanye lepe. Le’de ŋutu ’bayi lo tuwa ku kulia kanye lepe. 8Kugbo yi laga gbo zoru yi gbo de ku kulia ti Matalo kine‚ kugbo yi laga tatuwa tatuwa yi tatuwa ku kulia ti Matalo kine. Kuwade kugbo yi laga zoru‚ kugbo yi kilo tatuwa tatuwa kpe, yi a ti Matalo. 9’Bo ku kine kulia de Kristo atuwa, ’bo lepe aru ’do, adi ma lepe ku gbo’da a Mata lo ŋutulu laga atatuwa kilo ku ŋutulu laga zoru kilo itro. 10’Bo do ŋedya kulia ti luŋosu kine gbandra ya? Do ’dadru luŋosu gbandra ya? ’Bo yi giri ma lu ililira i si’de na Ŋun na ŋerani kuliana i koŋo yu‚ 11igbonaga awuro adi‚ “Na kongu mugu ku kari kuwe lepe‚ Matalo lo kulia‚ adi ŋutulu giri iruruguŋo ka ku kuŋusi kuwe koŋoni‚ ’bo ŋutulu kilo giri ma lu irurugo Ŋun.” 12Kuwade yi ma lu gele gele ikpekpeza kulia kaya kine ku Ŋun i koŋo yu. 13Ku kine kulia de ka’bi yi ku ŋeŋeri kulia ti le’de ŋutu kaya dridriŋini ’do tro. Alanguna ti yi rame adi ka’bi le’de ŋutu ku ’de’delaki kumu i pupugo na luŋase le’de itro‚ kugbo ŋo lo tikindra lepe i bayi. 14Na adeni‚ na aliri ku Mata Yesu katani adi le’de ŋo laga ’ba kekeli ku mugu ’bayi‚ ’bo le’de ŋutu ku arambu adi ŋo ŋanilo ’ba kekeli‚ lepe gbo ’ba kekeli ku ŋutu ŋanilo. 15Kugbo ŋo laga mo do nyosuni ilo laga tikindra luŋosu luŋuli de‚ trugo adi nyadru nonu na lepe ’bayi. Ka’bi do ku tutukaraki ŋutu laga ma Kristo tuwani ku lepelo ku kapa laga mo do nyosuni kilo. 16Kuwade kulia konu naga a na’bu kine ka’bi ku tayizi a kulia naro. 17’Bo tumata na Ŋun ina ani gbo’da a na kapazi lo nyenyei kuwa lo mamata‚ ’bo a kulia ti logbiye lo’bulo, ku ti teili lo trotrolo ku ti nyola naga i Yuka Nakiye katana. 18Kuwade ŋutu laga lo konakindra Kristo kita de ilo tikindra Ŋun nyola‚ ’bo lepeŋa aruko ku ŋutulu itro. 19Kuwade ti yi kepodri ŋo laga lo zowundra teili lo trotrolo, ku kulia naga ma yi tolirizi ’beri kaya dridriŋini kine. 20Ku nunuta kita na Ŋun ina ku kulia ti nyosuto kine. A ’diri kapazi kilo giri a lokiye, ’bo nyei na kapazi laga lo tikindra ŋutu le’de i bayi kilo a loro. 21Nyei na lokore kugbo mata na suwe ti konye ti zabibu kine kugbo kona na kulia ku’de naga na tikindra luŋosu i bayi kine ani gbo’da a na’bu. 22Rugo naga mo do rugina‚ tine rugo ŋanina do lepe seku Ŋun. Ku ŋutu laga ani ŋedya kulia kanye lepe kine a naro kanye kondra na kulia naga ma nye rugini kinena‚ ŋutu ŋanilo a lo koŋo na’bu. 23’Bo ŋutu laga ma teili lo lepelo yoyongi yoyongi ilo‚ ŋera na kuliana itiga lepe‚ igbonaga lepe kondra ’ba rugona. ’Bo kulia giri naga ’ba rugo kine‚ ko a ti toro.

will be added

X\