ROMA 13

1Ti ŋutulu giri gele gele sobini kulia ti ka’dola ti kuweto laga kase koŋoni kilo, igbonaga ’dola na kuwe ne’de ’bayi naga aku ’delaki ku Ŋun‚ ’bo Ŋun a’delakindra ko giri ina. 2Kuwade ŋutu lo rerenya kasi ka’dola ti kuwe kilolo‚ lepe rerenya ku kulia naga ma Ŋun nyumundri kine‚ ’bo ŋutulu lo rerenya rerenya kilo ma lu iŋeŋeraki kulia. 3’Bo ka’dola ti kuwe kilo ani tokuzendru ŋutulu laga lo kondra a lo’bu kilo‚ ’bo ŋutulu laga lo kondra toro kilo. Do nyadru gbo’da ’ba kuze ku ka’dolanilo i koŋo yu ya? Kone a lo’bu ma lepe ku be’i do ’busa. 4’Bo lepe a kalokoni lo Ŋun lo logu do. ’Bo ku do laga akondra a loro‚ do kuze soso‚ igbonaga teriŋi na lepe na ropani torona a kulia naga mŋgba‚ lepe a kalokoni lo Ŋun i konakindra na ŋutu lo kondra a lorolo ku ŋoma. 5Ku kine kulia de sopeta so kulia kasiko kine‚ agbo’da ku kulia ti ŋoma nasikona ka’deloni, ’bo ku kulia ti dendra naga kasu teilikonina itro. 6Kuwade ropeta mosorolo itro‚ igbonaga ka’dola kilo a kakita ti Ŋun laga lo kondra kulia ŋani kine ku teili giri ’duu kilo. 7Kuwade ropeta ŋo lo ŋeraki ta kilo giri. Kugbo mosorolo, ropeta mosorolo, kugbo luwalolo, ropeta luwalolo. Kugbo kukana‚ kuketa‚ kugbo sopona‚ sopeta. 8Ku gbogbo’data ku mori na le’de ŋutu tro‚ ’bo mori naga na nyadruna ti gbo’dini kasu dridriŋini ka’delo. ’Bo ŋutu lo nyadru ŋutu laga lo saka kanye gurubeni kilolo atorumokindro kukuzuna. 9Kukuzuki kine adi‚ “Ku kokonu towute‚ Ku reremi ŋutu‚ Ku koko’ya koko’ya, Ku susuki konye i kapa ti lege kini‚” kugbo ku kukuzu naga ya ina‚ ko giri atomora kugele i kine kulia de katani adi‚ “Nyare ŋutulu laga lo saka konu gurubeni kilo be na nyadrini do muguna.” 10Nyadruna ani kondra ŋutu a loro tro‚ kuwade nyadruna torumokindro kukuzuna. 11’Bo ’do ta adeni baŋena‚ adi luŋa laga ma ta pureni i toto ilo ayeŋundra, igbonaga rite nikana gbo’di nyoga arodru nu baŋe naga ma yi rugini ’bero nu. 12Kana gbo’di ina wawara, tuparana gbo’di nyoga‚ kuwade ti yi kole konesi ti mude kine kaŋo‚ ti yi ’depe kapa ti moro ti parara kilo. 13Ku yi woroni soso be na ŋutu laga lo woro para kilona‚ agbo’da ku kulia ti gindra ku ti merani‚ agbo’da ku kulia ti konye lopi ku ti yukuwe na nyara kineni‚ ku ŋaŋalapata‚ ku sasakata ku yuma itro. 14’Bo ’depakita ’beri ku Mata laga Yesu Kristoni, ’bo ku titikita kiko lo konani ki’beŋa ti mugu kine tro.

will be added

X\