ROMA 12

1Na ma’yu mugu ku ta, luŋaseri, beti naga ma Ŋun gbo’dini ku ediyona‚ tikita ’beri a ’i’ileta laga zoru‚ laga a ti Ŋun‚ lo tikindra lepe nyola kilo. Ina de a teminizo nasu naga soso. 2Ku gbogbo’data ku gbiyeri lo ina ka de‚ ’bo tikita yoyolozu nasuna ti lopuke mugu a naludu‚ ma ta romoki dendra kulia naga ma Ŋun nyadrini naga a na’bu‚ naga na tikindra lepe nyola‚ naga soso kine. 3Na takindra ta giri gele gele‚ ku ’busa na’bu naga ma Ŋun tikindri na ina adi‚ ku raramita kulia kasu kine ku pura na ’beri‚ ’bo rameta kulia kasu kine ku teiliko laga mada, beti naga ma Ŋun korakindri ŋutulu giri gele gele ku dridriŋi nasiko na rugo ina. 4’Bo i mugu gele katani yi gbo ku dridriŋita ti mugu kine rodri, ’bo kitazi ti dridriŋita ti mugu kine giri ani gbo’da a nagele. 5Kuwade ’dibani kodro ku yi laga a ŋutulu rodri kpe, yi a mugu nagele ku Kristo katani‚ ’bo yi giri gele gele atomodya ’beri a mugu gele. 6Kuwade yi gbo ku ’doketa kaya laga ka’de ka’de ku ’busa na’bu naga na tiki kayanina. Kugbo keyu na kulia, ku yi kewu kulia be naga rugo nikana gbo’dinina. 7Kugbo konaki na ŋutulu kita, ku yi konakindra ko kita. Ŋutu laga a katogolonilo, ti lepe togo’i. 8Ŋutu laga a karudani lo teilikolo, ti lepe ru’i. Ŋutu laga a ka’dokanilo, ti lepe tiki ku teili lo’bu. Ŋutu laga a ka’dolani lo kuwelo, ti lepe kondri ku teili giri. Ŋutu laga lo kondra ku teili lo’bulo, ti lepe kondri ku nyola. 9Ti nyadruna gbo’dini ’ba toŋulupa‚ ŋmoneta ŋmo kulia naga a naro kine‚ ’depakita ’beri i kulia naga a na’bu kine. 10Nyareta nya ’beri ku puso a luŋaseri. Sopeta so ’beri kasu dridriŋini ku teili giri. 11Gbo’dita ku puso‚ ’ba tolu’beto, kobita kobu ku Yuka Nakiyena i konakindra na Matalo kita. 12Nyolanita nyola kasu yendruni, sakanita ku teiliko mada i sasanya katani. ’Delakita ’beri ku teili giri i magu na Ŋun. 13Loketa lo ŋutu ti Ŋun kilo ku kapa laga ’bayi kasikoni kilo. Rukuta ruku komo kilo. 14Tikita koŋo na’bu ku ŋutulu lo wowondru ta kilo. Tikita koŋo na’bu‚ ku lolomuta ko. 15Nyolanita nyola ku ŋutulu laga lo nyonyola kilo kugele, gbineta gbiye ku ŋutulu laga lo gbigbiye kilo kugele. 16Gbo’dita ku teili gele kasu dridriŋini. Ku pupuruta ’beri, ’bo moranita mora ku ŋutulu laga kiloŋadroo kilo kugele. Ku gbogbo’data ku totore kasu konyeni tro. 17Ku teteyitokita kulia naro ku kulia naro, ’bo morita adi konesi kasu kine ti gbo’dini a na’bu ku ŋutulu giri i konyeni. 18Ku roromoki kasuni, sakanita kugele ku teiliko lo trotro ku ŋutulu giri. 19Ŋutulu laga ma na nyadri kilo, ku nyonyokoruta toro‚ ’bo kolokita ti ŋoma na Ŋun ina nyokoki toro ŋanina, igbonaga awuro adi, “Rope lo kulia narolo a kulia kuwe. Na lo iroroba, Matalo lo kulia.” 20’Bo kugbo miriku lolu ilo ku gbo ku mago, tiki lepe nyosu. Kugbo kure na pio na lenga lepe‚ tiki lepe ti mozini. ’Bo ku kone lolu laga delo yukuwena imoga lepe koru. 21Ku ruruku kulia naro i tiga na do‚ ’bo tike kulia naro kine ku kulia na’bu.

will be added

X\