ROMA 11

1Kuwade na piza adi Ŋun apazu zuru lonyelo kaŋo ya? ’Bayi‚ ani gbo’da de. Laga na‚ na a Isiraelitio laga i nyumuti lo Abarahama i ketimi na Benyaminanalo. 2Ŋun aku pazu zuru lonye laga kazu lepe adeni ’berolo. Ta aku de kulia naga ma wuroni ku kulia ti Eliya‚ ku naga ma lepe sosozi kulia ku Isiraeli kilo i ’berini ku Ŋun i koŋo yuna ya? 3Lepe akulia adi‚ “Mata‚ ko atatuza kakeyo kolu kilo‚ ko arusugo pirito konu naga a ’i’ileta kine ka‚ ’bo na ka’delo laga akoloki zoru‚ ’bo ko ga’yu tatuza na na itro.” 4’Bo Ŋun ateyitokindro lepe adinyo ya? Adi‚ “Na apitokindro mugu ŋutulu kuwe kilo alifu burio laga aku ruguŋo i teminizo na Baali kilo.” 5Kuwade i ina baŋe de itro limbito kilo kata laga ma lepe gelundri ku ’busa na’buna kilo. 6’Bo kugbo gbo’di ku ’busa na’buna‚ ani gbo’da ’do ku kulia ti konesi naga ma ko kondrini kine. Kedri kodro kugbo ku kulia ti konesi kine‚ kedri kodro ’busa na’buna gbo’di ’bayi. 7Kuwade inyo kuru ya? Kulia naga ma Isiraeli kilo ga’ini kine ko aku rio tro‚ ’bo ŋutulu lo nyume kilo se lo rumbini‚ ’bo ŋutu lo koloki kilo teiliko kasiko kilo ayeŋundra a logo. 8Be naga ma wuronina adi, “Ŋun atikindra ko yuka naga na totona‚ ku konye laga ani medra kilo‚ ku suwo laga ani yinga kilo‚ yeŋundra tozo tinade.” 9’Bo Dawidi akulia adi‚ “Ti tokomona nasikona yeŋundri a biribiri laga lo momoga momoga‚ be ŋurupi lo pupugo ko‚ be rope nasiko na toro. 10Ti konye kasiko kilo ’dizi ’diza, ka’bi ko ku medra‚ ’bo ti ki’dinino kasiko kine trogudyi trogudya ’duu.” 11Kuwade na piza adi pupugo nasikona adi ma ko ’do’dooro a ’dute ya? ’Bayi‚ ani gbo’da de. ’Bo ku ’do’do nasiko naga i toro kata yuna‚ ritena ayeŋundra ku Monyazi kiloni i tikindra na Isiraeli kilo i yule. 12Nyenaga kugbo ’do’do nasiko naga i toro kata yuna naga azowundra koŋo na’bu koru i kani de‚ ’bo tika nasiko naga azowundra koŋo na’buna ku Monyazi kiloni de‚ alanguna tutuluki nasiko naga ma ko rukeni giri ina de izowundra koŋo na’bu naga a inyo i kani! 13’Bo tinade na kulia ku ta laga a Monyazi kilo‚ igbonaga na laga a lososonyo lo Monyazi ŋani kilo ina. Na pupudya mugu ku kita nioŋana, 14kugbo ŋona ku ilo kiko de na roromoki tikindra zuru liolo i yule‚ adi ma na ku ritundri ku’de ŋutulu kasiko i dridriŋini ’busa. 15Kugbo gupazi nasiko ina na tikindra ŋutulu ti ka kilo ti tomore ’beri a worisi ti Ŋun‚ alanguna ruke nasiko ina izowundra inyo ya? Ani gbo’da ru naga i bo na tuwana ya? 16Kugbo ro’dota na kinyo lo trora a kayo kilona naga aŋwe a na tiki Ŋun‚ trugo adi rodotana giri a na lepe itro‚ Bo kugbo kukurita na kedini naga atiki Ŋun‚ trugo adi keniya ti kedini ŋanilo kine igbo’da a ti lepe itro. 17’Bo kugbo keniya ku’de naga a’i’iya kaŋo‚ ’bo do laga a oliva lo drorulo ku ato’depaki kasiko i pirini ku oliva laga i melesi katani i mozu na suwe ti kukuri naga a na’bu ti olivalo kine‚ 18ku pupuru pupuru mugu ku kulia ti keniya ŋani kine. Kugbo do pupudya mugu‚ yole adi agbo’da do lo toliriza kukuri kineni‚ ’bo kukuri kine se na toliriza do. 19Do ikulia adi‚ “Keniya ŋani kine a’i’iya kaŋo i to’depakindra na na i piri ŋanina.” 20Gbode. ’Bo ko a’i’iya kaŋo igbonaga ko ’ba rugona. ’Bo do ilira i piri ŋanina soso ku rugona ka’delo. Kuwade ku pupuru pupuru mugu ’bo gbo’di ku kuze. 21’Bo ku Ŋun laga kazu aku koloki keniya naga mŋgba kine‚ lepe aka kolokindro doni. 22Kuwade boŋe teili lo ’bu’busi lo Ŋun ilo seku teili logo lo lepe lo ropani torolo. Ku ŋutulu lo ’do’do i toro katani kilo‚ teili logo lo ropani torolo kata‚ ’bo kugbo do lo saka ’duu i ’bu’busi na teili lo lepelo katani‚ ’bu’busi na teili lo lepelona igbogbo’da konuni. Kugbo ani gbo’da de‚ do i’i’iya ’i’iya kaŋo itro. 23’Bo ŋutulu ŋani kilo kugbo ko laga ako’yu ’baka nase na rugona‚ ko itoto’depaki ’do. ’Bo Ŋun gbo ku teriŋi i to’depakindra na ko i piri. 24Kugbo do laga a’i’iya kaŋo i oliva lo drorulo i mugu yu i to’depaki ku oliva laga i melesi kata yu laga aku kpele dolo i mugu yu‚ alanguna keniya ŋani kine iroromoki to’depaki ’do ku oliva lasiko lo kpele kolo i muguni. 25Luŋaseri‚ na nyadru adi yoleta kine kuliata na mumuyi mumuyi kine de‚ ka’bi ta ku gbo’da ku totore kasu konyeni. Teiliko logo kazu ayeŋundra ku Isiraeli ku’de kiloni‚ ti inga kenisi ti Monyazi kilo aku yeŋundra giri‚ 26’bo i bo ŋanina Isiraeli kilo giri iririte, be naga ma wuronina adi‚ “Kaninelo iŋiyu Ziona yu‚ lepe i’dutundro teili laga ma ŋutulu redri Ŋun ilo i zuru lo Yakobolo kata yu.” 27“Ina de igbo’da a tomore nio kasi ko i luŋa laga ma na yunadri torozi kasiko kine lu.” 28Ku naga ma ko redri kuu na’buna ina‚ ko a mero ti Ŋun‚ ku kulia kasu kine. ’Bo ku naga ma Ŋun nyumundri ko ina‚ ko anyara‚ ku kulia ti merenyezi kasiko kilo kine. 29’Bo doketa ti Ŋun kilo‚ ku luŋe lo lepelo ani romoki lopuko tro. 30Kazu ’berona ta aku sobu kulia ti Ŋun kine, ’bo tinade ta arumbi ediyo ku ’baka na sobu na Isiraeli na kuliana. 31Kuwade ku ediyo lo tiki talo, ko tinade ’ba sobu na kulia, ma ko riondri ediyo tinade. 32’Bo Ŋun atodya ŋutulu giri i ’baka na sobu na kuliana katani ma lepe gbo’dini ku ediyo ku ŋutulu giri. 33Tokorine na Ŋun ina, ku tobodo na lepena ku dendra na lepena a druma koru! Ŋedya na lepe na kuliana ani romoki yolo tro, ’bo bo na kulia ti lepe kinena ani romoki dena. 34“Ŋa laga adeni yoyolozu na Matalona? Ŋa lo tretrelakindra lepe kulia kine ya? 35Ŋa laga atikindra lepe ’doke a kayo adi ma lepe teyitokindro ŋutu ŋanilo ya?” 36’Bo kapazi kilo giri ŋiyu ku lepe yu, ko giri gbo zoru ku kulia ti lepe kine, ko a ti lepe itro. Ti lepe purani pura paratra paratra. Amena.

will be added

X\