ROMA 10

1Luŋaseri, na gbo ku puso koru‚ ’bo na magu Ŋun ku Isiraeli kilo adi kodro ti ko riteni rite. 2Na lo ’dodru bo na kulia kasiko kine adi ko gbo ku puso ku kulia ti Ŋun kine‚ ’bo dendra nasiko ’bayi. 3Ko aku de kiko laga ma Ŋun kendri ŋutulu kilo mŋgbalo‚ ’bo ko aga’yu kiko lo kenani ’beri mŋgba ilo, kuwade ko apazu kulia naga ma Ŋun kendri se mŋgba kine. 4’Bo Kristo nye lo tutuzo kukuzuna ma ŋutulu giri laga a karuko kilo kenani mŋgba ku Ŋun i konyeni. 5’Bo Mose awudyo adi ŋutu lo saka ’duu i kondra na kukuzuna adi ma nye kenani mŋgba ilo igbo’da zoru ku kone ŋanilo. 6’Bo ku kulia naga ma Ŋun kendri ŋutulu kilo mŋgba ku rugona kine, lepe atazu adi, “Ku kukulia konu teilini adi, ‘Ŋa lo kiyadru i ’diko yu ya?’” trugo adi zuwe na Kristo kanina. 7“Kugbo ŋona adi, ‘Ŋa lo kiyadru ka i drili naga naguluna kata yu ya?’ ” trugo adi zuwe na Kristo i dridriŋi na ŋutulu laga atatuwa kilo yuna. 8’Bo lepe kulia adinyo ya? Adi, “Kulia ŋani kine kine konu lagani, konu kutuni, konu teilini itro,” trugo adi kulia ti rugo naga ma yi trukokindri kine. 9Kugbo do lo tazu ku kutu nonuna adi, “Yesu laga a Mata” ’bo ku do arugo konu teilini adi Ŋun atoŋizu lepe i dridriŋi na ŋutulu laga atatuwa kilo, do iririte. 10’Bo i teilini ŋutulo rugo ma nye kenani mŋgba ku Ŋun i konyeni, ’bo ku kutuna ŋutulo tazu kulia ma nye riteni. 11’Bo kulia na wuwuro kine akulia adi, “Le’de ŋutu ’bayi lo irugo lepe laga lo irumbi yukuwe.” 12’Bo kora na dridriŋi ku Yahudi kilo ku Monyazi kilo gbo’di ’bayi, igbonaga Mata lo ŋutulu girilo ilo gele, lepe lo tikindra ŋutulu giri lo lungu nye kilo koŋo na’bu nanyena ’ba weleta. 13’Bo, “Ŋutulu giri gele gele lo lungu kari ti Matalo kine kilo iririte.” 14’Bo ko ilungu kari ti ŋutu laga inga ko aku rugolo adidinyo ya? ’Bo ko irugo ŋutu laga inga ko aku yiŋi kari ti lepe kinelo adidinyo ya? ’Bo ko iyinga ti katrukoni ’bayi adidinyo ya? 15Katruko kilo itrukodru ti ko aku sunyuzi adidinyo ya? Be naga ma wuronina adi‚ “A ’diri pondra na katruko ti kuu na’buna kilona ina ’bu’busi de ya!” 16’Bo ku’de kilo ŋutulu aku rugo kuu na’bu ŋanina, igbonaga Isaya akulia adi‚ “Mata, ŋa laga arugo kulia naga ma yi trugi kine ya?” 17Kuwade rugona yeŋundra ku kulia na yiyiŋa kine, ’bo kulia na yiyiŋa kine yeŋundra ku truko na kulia ti Kristo kine. 18’Bo na piza adi ko aku yi ya? Ko ayi a ’diri, be naga ma wuronina adi‚ “Roroto kasiko kilo akuworo i kani giri, ’bo kulia kasiko kine ayenga i ’dute na ka yu.” 19Na piza ’do adi Isiraeli kilo kazu aku yo’yu ya? A kayona Mose akulia adi‚ “Na ititikindra ta i yule ku ŋutulu laga ani gbo’da a zuru kilo Na itikindra ta i ŋoma ku kulia ti zuru laga a malimalilo.” 20’Bo Isaya akulia ’do ’ba kuze adi‚ “Na arie ku ŋutulu laga kazu aku ga’yu na kilo. Na akpeza mugu ku ŋutulu laga kazu aku piza kulia kuwe kine kiloni.” 21’Bo ku kulia ti Isiraeli kilo‚ lepe akulia adi, “Na a’dagu kenisi kuwe kilo paratra i wundra na zuru laga ani sobu kulia‚ lo teyitundro kulia ku kutu nago ilo.”

will be added

X\