ROMA 1

1Paulo‚ upiye lo Kristo Yesu‚ lo luŋu i gbo’da a lososonyo, lo gelaki ka’de ku kulia ti kuu na’bu na Ŋun inalo. 2Ŋun asarakindra kuu na’bu ŋanina ’bero ku kakeyo kiloni i kulia na wuwuro naga nakiye kine katani. 3Kuu na’bu ŋanina na trugo kulia ti Ŋiro lo lepe‚ lo yuŋe i kadi na Dawidi ku kulia ti mugu kine‚ 4’bo ku kulia ti Yuka Nakiye kine‚ lo kpiya a Ŋiro lo Ŋun ku teriŋi ku naga ma lepe toŋiyeni i dridriŋi na ŋutulu laga atatuwa kilona‚ lepe laga Yesu Kristo Mata likalo. 5Ku lepe‚ Ŋun atikindra na ’busa na’bu i gbo’da a lososonyo ku kari ti Yesu Kristo kine‚ i lungu na ŋutulu ti zuro kilo giri i rugo‚ ku i sobu na kulia ti Ŋun kine. 6’Bo ta lepe laga kasiko i dridriŋi ni kilo aluŋu i gbo’da a ti Kristo. 7Na aroma ku ŋutulu giri laga ma Ŋun nyadri Roma yu kilo‚ laga lo luŋu i gbo’da a ŋutu ti Ŋun kilo: ’Busa na’buna ku teili lo trotro lo ŋiyu ku Ŋun Monye likalo yu ku Mata Yesu Kristo yu itrolo ti gbo’dini ku ta. 8A kayona na tikindra Ŋun liolo iyete ku ta giri‚ igbonaga rugo nasuna akuworo i kani girina. 9Ŋun lio laga ma na konakindri lepe kita ku yuka nionalo i naga ma na trugi kuu na’bu na Ŋiro lo lepelona, nye lo ’dodru bo nio na kuliana a ’diri‚ adi na ’di’dindra ta 10mu luŋa i magu nio na Ŋun ina. Na ma’yu mugu ku lepe adi ku lepe laga nyanyari ti lepe ŋakindri na tinade kiko lo utuni na kasu yulo. 11Igbonaga puso nasuna alenga na koruna, na nyadru medra na ta, ma na ku tikindri ta ’doke le’de lo Yuka Nakiyena i toliriza na ta. 12Kuwade ku yi togole teiliko kaya kilo kasi ta‚ ku rugo nikana‚ nasuna ku niona. 13Na nyadru deneta luŋaseri, mu luŋazi na pedra kulia kuwe teilini kodro i utu kasu yu‚ kodro ma na ku rumbi konye ti Kristo kasu dridriŋini be naga ku zuro ku’de kilo i dridriŋinina, ’bo ku’de kulia agoza na yeŋundra tozo tinade. 14Na gbo ku mori ku Giriki kilo ku monyazi ku’de kilo itro‚ ku ŋutu laga ku dendra kilo ku laga ’ba dendra kilo itro. 15Kuwade na gbo ku puso i trukokindro na ta laga Roma yu kilo kuu na’buna itro. 16’Bo na ani gbo’da ku yukuwe ku kulia ti kuu na’buna tro‚ igbonaga lepe a teriŋi na Ŋun na riteni ŋutulu giri laga a karuko kilona‚ Yahudi kilo a kayo‚ ’bo Monyazi kilo itro. 17I kuu na’bu ŋanina katani kulia naga ma Ŋun kendri ŋutulu kilo mŋgba kine na kpeza ’beri ku karuko kiloni‚ ku kulia ti rugona ka’delo. Be naga ma wuronina adi‚ “Ŋutu laga akena mŋgba ku rugonalo, nye lo igbo’da zoru.” 18Nyenaga ŋoma na Ŋun ina akpeza mugu ŋiyu i ’diko yu‚ i moro ku kulia naga ma ŋutulu kilo redri Ŋun kine giri‚ ku kulia naro giri ti ŋutulu laga lo pazu kulia ti to’diri ku kulia naro kasiko kine ina. 19Kulia ti Ŋun naga na romoki dena tinade kine akpeza ’beri soso kasiko i konyeni, igbonaga Ŋun akpekindra ko kulia ŋani kine ina. 20Ŋiyu i gbeki na kana gbiyeri lo lepe laga ani romoki boŋalo‚ ina de a teriŋi na Ŋun naga ani lengana, seku gbiyeri lo lepe laga a Ŋun ilo‚ akpeza ’beri gboŋa i ŋo laga lo gbeki lepe kilo katani. Kuwade ko ’ba kulia na teteyitoki. 21’Dibani kodro ko adeni Ŋun kpe‚ ko aku sobu lepe a Ŋun‚ aku tikindra lepe iyete tro‚ ’bo ko aku yoyolozu kuliata naga soso tro‚ ’bo teiliko kasiko laga ’ba dendra kilo ayeŋundra a mude. 22Ko akulia adi se gbo ku totore‚ ’bo ko ayeŋundra a mali mali. 23Ko alopugo todruma na Ŋun laga ani romoki tuwa tro ilo a gbeti ti ŋutulu laga lo romoki tatuwa kilo‚ kuwa ti kpenya‚ kuwa ti kappa‚ kuwa ti kapa laga lo woro ku gedyo kilo. 24Kuwade Ŋun akolokindro ko i ki’beŋa ti teiliko kasiko kilo katani i kondra na kulia naga ’ba kekeli kine‚ i kondra na kulia ti yukuwe kine kasiko i ’berini kasiko i dridriŋini. 25Ko alopugo kulia ti Ŋun naga ti to’diri kine a kulia ti to’bure, ’bo ko ateminizo kapazi laga ma lepe gbekindri kilo druga teminizo ko, i piri na Ŋun laga lo gbekindra kapazi kilo ilo. Ti lepe purani pura paratra paratra! Amena. 26Ku kine kulia de Ŋun akolokindro ko i ki’beŋa kasiko naga naro ti yukuwe kine katani. Wate kasiko kine alopugo kuliata naga wate ma kondrini ku ’beri kasiko kine be naga kodro ko ani romoki kondra kine. 27Lalia kilo ako’yu toto naga ku wate kine be naga ma ŋutulu kondrini ina kaŋo druga ko wudra ’beri kase dridriŋini ku ki’beŋa naro kine. Lalia kilo akondra kulia naga a naro ti yukuwe kine ku lalia ku’de kilo‚ kuwade ko arumbi kase ’berini rope na toro be naga ma ko torondri ’beri ina. 28Igbonaga ko aku rambu dena na Ŋun ina a na’bu ina‚ Ŋun akolokindro ko i yoyolozu narona katani i kondra na kulia ti yukuwe kine. 29Ko azore ku torozi ka’de ka’de giri‚ ku kulia naro‚ yule, kulia ti teili loro‚ ko azore ku konye loro‚ rembu‚ rerenya‚ toŋulupa, ŋmwa na ŋutulu‚ ko a kamoŋa ti ŋutulu‚ 30kasosoyi, kaŋmwa ti Ŋun itro‚ a ti budru‚ ku kuweto a drumala, a kasisiŋa ti ’beri‚ ko ga’yu kulia naro naluduko ka’de ka’de‚ ani sobu kayuŋo kase kilo; 31’Ko ’ba rambu‚ kayoyoŋo ti sareta kase kilo‚ ’ba nyadru‚ ’ba ediyo. 32’Dibani kodro ku ko adeni kukuzu na Ŋun adi ŋutulu lo kondra kilo ŋo de kilo ti tatuwani kaŋo de kpe‚ ko lepe kokondra kulia ŋani kine‚ ’bo ko rurugo ŋutulu laga lo kondra de kilo itro.

will be added

X\