KULIA NA KPEKI 9

1Malaika laga a togi mukanalo druga kudra guke lonyelo, ’bo na druga medra kasirita laga a’duu ka ŋiyu i ’diko yulo‚ ’bo lepe atiki ŋaye na kutu na drili nagulu naga ’ba ’dutena. 2Lepe druga ŋazu kutu na drili naguluna, ’bo i kutu ŋanina kopure alupundro be kopure na tuka naga a drumana, ’bo kolona ku dridriŋi na ’dikolona druga sosomuko ku kulia ti kopure naga na lupundro i drili yuna. 3I bo ŋanina maya druga lupundro i kopure kata yu i kani. Ko atiki teriŋi beti teriŋi na longo’dezi ti ka kilona. 4Ko druga taki adi ka’bi se ku kokoro kokoro droruo ti ka kilo kugbo ŋo giri laga lodo kilo kugbo kade giri‚ ’bo gele’du ŋutulu laga aku te’depaki kpiye lo Ŋun ilo kasiko i koŋosini kilo. 5Ko druga ruke i sasandru na ko yapazi mukana‚ ’bo adi ka’bi ko ku tatu tatu ko‚ ’bo miye nasiko ina gbo be miye na longo’de ku lepe laga a’udya ŋutulo. 6I kulu luŋazi de‚ ŋutulu kilo igaga’yu tuwana‚ ’bo ko aka rumbini. Ko igbogbo’da ku puso na tuwana‚ ’bo tuwana iwoke kasikoni kaŋo. 7Maya ŋani kilo puru be drongiyo laga lo kukundra ’beri i moro. Ŋo laga be yogonoki laga lo kukuna ku drumo kilo se lo gbo kasiko i kuwetoni. Koŋosi kasiko kine gbo be koŋosi ti ŋutulu. 8Kupi kasiko kilo gbo be kupi ti wate‚ kala kasiko kilo gbo be kala ti kemuruko. 9Ko gbo ku ŋo laga be witiko kase kidozini. Woŋo na kopuko kasiko kinena gbo be woŋo na gariki laga rodri laga ma drongiyo ŋani kine ’damaadri ’beri i moro kata yu kilo. 10Ko gbo ku koteta be koteta ti longo’dezi, ku wirito, ’bo teriŋi nasiko na kokoreyini ŋutulu yapazi mukanana nye naga i koteta kasiko kine katani. 11Mata lasiko laga kasiko i koŋo yulo‚ nye laga a malaikata lo drili nagulu naga ’ba ’dutena. Kari ti lepe kine ku kutu na Eberena se naga Abadona, ’bo ku kutu na Girikina se naga Apoluona‚ trugo adi Katukaranilo. 12Drelia naga a kayona arosodru azo. Meteta‚ akoloki dreliesi mure. 13Malaikata laga a togi bukiyelo druga kudra guke lonyelo, na druga yinga roro lo kuu i dridriŋi na nyoŋgbora iŋmani ti piri naga a ’i’ileta naga akukuna ku drumo naga ku Ŋun i koŋo yuna. 14Roro ŋanilo akulia ku malai­kata laga a togi bukiye laga ku gukelo adi‚ “Lake malaika iŋmani laga lo tora i kare laga Ufirate i kutu yu kilo.” 15Kuwade malaika laga iŋmani kilo druga lalaka‚ laga akukunaki a loŋu’du i lu sawa de‚ ku ilu kolo de‚ ku ilu yapa de‚ ku ilu kiŋa de kilo ma ko ku tatuzi dridriŋi gele i musala katani na loŋutuna. 16’Bo na atrukoki kenesi ti kamoro laga lo wowoki ku drongiyo kilo kine‚ ko ayenga a milioni kamazi mure. 17Nyenaga na amedra kulu drongiyo de deŋa i rudesi kata. ’Bo kidozi ti ŋutulu laga lo gbi’diki kasiko kini kilo asoyi ku ŋo laga a witiko laga lo puru be kima‚ ku nabuliye, ku napore be baruti itro. Kuweto ti drongiyo kilo gbo beti kuweto ti kemuruko, ’bo kima ku kopure ku baruti alupundro kasiko i kutuzini. 18Kine dreliesi naga musala kine de naga a kima ku kopure ku baruti naga na lupundro kasiko i kutuzini kine se na tatuza dridriŋi gele i musala katani na loŋutuna. 19’Bo teriŋi na drongiyo kilo gbo i kutuzi kasiko kine kata yu‚ ku koteta kasiko kine kata yu itro. Koteta kasiko kine gbo be munuo‚ laga ku kuweto kilo. Kuweto ŋani kine se na koza ŋutulu kilo. 20Ŋutulu lo koloki laga aku tatuwi ku kilo konyola de kilo‚ ko aku lopugo teiliko ku konesi na konu kenisi kase kilo kine. Ko aku ko’yu ruguŋo ka i teminizo na dreria ku gbeti ti muloko laga a ’busa ’busa laga lo kukuna ku drumo‚ ku riye‚ ku witi lotroru, ku ŋoropo, ku kade, laga ani romoki medra kana, kugbo yinga kulia, kugbo woro kilo. 21Ŋutulu ŋani kilo aku lopugo teiliko ku tatuza nasiko na ŋutuluna, ku ’demba nasiko‚ ku konye lopi kasiko, ku koko’ya nasiko ina itro.

will be added

X\