KULIA NA KPEKI 8

1Kugbo Tore lo Kebilitolo laga aŋazu si’bi naga a togi buriona, ’dikona druga yiŋa tali beti dridriŋi na sawa. 2Na druga medra malaika laga burio lo lira ku Ŋun i koŋo yu kilo, gukia burio druga tiki ko. 3Malaikata le’de druga pondra i lira i piri naga a Tiletana laga ku sele’be naga na kukuna ku drumo na ’urani libani ina. Lepe druga tiki libani a druma ma lepe ku tomodyi lepe kugele ku magu na ŋutu ti Ŋun kilo giri i piri naga a ’i’ileta na kukuna ku drumo naga i si’dena i koŋo yuna. 4Kopure na libani ina druga ŋiyoro ku magu na ŋutu ti Ŋun kilona Ŋiyu i keni lo malaikatalo ku Ŋun i koŋo yu. 5Malaikatalo druga ’dumundra sele’be ŋanina druga kupundro kima na ŋiyu i piri naga a ’i’iletana ki yuna zore, druga ’bukodru ka yu. Yule na kana ku woŋo naga koru ku lelele na piyana ku dodonga na kana druga kpekpeza ’beri. 6Nyenaga malaika laga burio laga ku gukia burio kilo druga kukundra ’beri i kudra na ko. 7Malaikata laga a kayolo druga kudra guke lonyelo. I bo ŋanina toro ku rima na ŋoŋole ku kima kine druga ’do’dooro ka yu. Dridriŋi gele i musala katani na kana druga tonoka kaŋo, dridriŋi gele i musala katani na kade kilona druga tonoka kaŋo, ’bo droruo giri laga lodo kilo atonoka kaŋo itro. 8Malaikata laga a togi murelo druga kudra guke lonyelo. Ŋo laga be mere laga a druma lo kokobu ku kimalo druga biriŋozi suburi kata yu. 9Dridriŋi gele i musala katani na suburina druga yeŋundra a rima, dridriŋi gele i musala katani na kapazi laga zoru laga suburi kata yu kilo atatuwa kaŋo, ’bo dridriŋi gele i musala katani na ki’bolo kine akokoreyi kaŋo. 10Malaikata laga a togi musalalo druga kudra guke lonyelo, ’bo kasirita laga a drumalo druga ’duu ka i ’diko yu, ti lepe lu kokobu be kima na trukoni, lepe druga ’duki i dridriŋi gele i musala katani na karia kilo ku kidia ti pio kilo. 11Kari ti kasirita ŋanilo se naga Kisu. Dridriŋi gele i musala katani na karia kilo druga yeyeŋundra a kisuma, ŋutulu rodri druga tatuwa tatuwa ku pio ŋani kine igbonaga ko ayeŋundra a kisumana. 12Malaikata laga a togi iŋmanilo druga kudra guke lonyelo. Dridriŋi gele i musala katani na kolona druga kokorozu kokorozu, ku dridriŋi gele i musala katani na yapalo, ku dridriŋi gele i musala katani na kasiri kilo, gbode dridriŋi gele i musala katani nasikona druga sosomuko. Dridriŋi gele i musala katani na tuparana parara ’bayi, ’bo dridriŋi gele i musala katani na tukazena gbo de ’do. 13Na druga medra, na ayinga yugu laga lo resa ku roro laga gboŋa ti lepe lu ŋiyoro i ’diko kide yu, adi, “Wu wu! Wu wu! Wu wu! ina ku ŋutulu laga lo saka i kani kilo, ku kulia ti kuta na gukia laga musala laga ma malaika laga musala kilo ma kudri tinaŋade kilo!”

will be added

X\