KULIA NA KPEKI 7

1I bo ŋanina na druga medra malaika iŋmani lo lira i goŋeto iŋmani ti ka kilo kata yu, lo goza kobuŋeto naga iŋmani ti ka kine, kobuŋe ne’de ka’bi ku buradru ka yu, kugbo suburi yu, kugbo i kedini le’de i mugu yu tro. 2Na druga medra malaikata le’de ti lu ŋiyu i muko na ka nu, ku si’bi na Ŋun laga zorulo. Lepe druga resa ku roro laga gboŋa ku malaika laga iŋmani lo tiki teriŋi i kokorozu na ka ku suburi kilo, 3adi, “Ku kokorota kokoro kana ku suburilo ku kade kilo ti inga yi aku te’deba upi ti Ŋun likalo kilo kasiko i koŋotoni.” 4Na druga yinga kenesi ti ŋutulu laga ate’depa kilo‚ alifu kama gele ku meria iŋmani konye iŋmani ŋiyu i ketimito giri ti ŋutu ti Isiraeli kilo‚ 5i ketimi na Yudana‚ alifu mere gele konye mure laga ate’depa kilo, i ketimi na Rubenana alifu mere gele konye mure, i ketimi na Gadana alifu mere gele konye mure, 6i ketimi na Aserina alifu mere gele konye mure‚ i ketimi na Nafatalina alifu mere gele konye mure, i ketimi na Manasena alifu mere gele konye mure, 7i ketimi na Simeonana alifu mere gele konye mure, i ketimi na Levina alifu mere gele konye mure, i ketimi na Isakarina alifu mere gele konye mure, 8i ketimi na Zebuluna alifu mere gele konye mure, i ketimi na Yosefana alifu mere gele konye mure, i ketimi na Benyaminana alifu mere gele konye mure, 9I bo na kine kuliata de, na druga medra mongoyo na ŋutulu rodri, ’bo le’de ŋutu ’bayi lo romoki kendra ko. Ko aŋiyu i zuro yu giri, ku i ketimito kine giri, ku i ŋutulu kilo giri ku i kutuzi kine giri, ko giri druga lira i si’dena i koŋo yu ku Tore lo Kebilitolo i koŋo yu itro, ti ko asozu ’beri ku bongola nakpe kine, ku keniya ti lukpendre kasiko i kenisi yu. 10Ko druga laiza ku roroto laga gboŋa adi “Ritundrona ina a na Ŋun lika lo gbi’diki i si’dena ki yulo, ku na Tore lo Kebilitolo itro.” 11Malaika kilo giri kulu alira gbiri i si’dena i laga yu ku temezi kilo, ku kapa iŋmani laga zoru kilo. Ko druga memereke rupu ka i si’dena i koŋo yu i teminizo, 12druga kulia adi, “Amena! Teminiona, ku purana, ku tobodona, ku iyetelo, ku sopona, ku teriŋina‚ ku todrumana ti gbo’dini a na Ŋun likalo paratra paratra! Amena.” 13Temezitio gele druga piza na adi, “Kilo ŋutulu de laga asozu ’beri ku bongola nakpe kilo a kuŋa? Ko kulu ŋiyu yeda ya?” 14Na druga teyitokindro lepe adi, “Mata liolo, do lepe lo dendra!” Lepe druga teyitokindro na adi, “Kilo de a laga lo lupundro i sasanya naga koru ina kata yu kilo. Ko alalazu bongola kase kine, ko atoke’ya ko a nakpe ku rima ti Tore lo Kebilitolo kine. 15Ku kine kulia de ko kulu i si’de na Ŋun ina i koŋo yu, ko kulu konakindra lepe kita i kadi na lepena kata yu. ’Bo lepe laga lo gbi’diki i si’dena kinilo isasaka a tilimo nasiko. 16Ko aka tika ’do ku magoni‚ ko aka leŋa ’do ku kure na pioni. Kolona aka sa’yu koni‚ ’bo ka na kamakana aka ’udya koni. 17’Bo Tore lo Kebilito laga lo gbo’da i piri na si’dena kide yu ilo nye lo iyugu ko‚ lepe i’dolakindra ko kuweto i kidia ti pio ti ru kine. ’Bo Ŋun iseseza ŋolita kine giri kaŋo kasiko i konyeni.”

will be added

X\