KULIA NA KPEKI 6

1Na druga medra Tore lo Kebilitolo i ŋazu na si’bi ne’de i dridriŋi na si’bio burio kine, na druga yinga kapatio laga zoru gele lo kulia ku roro be woŋo na piya adi, “Pondri!” 2Na druga medra drongi lokpe, ’bo ŋutu laga lo gbi’diki ku lepe kinilo gbo ku dra. Yogono druga tiki lepe, lepe druga lupodru a katikani laga lo tiga kulialo. 3Ku Tore lo Kebilitolo laga aŋazu si’bi naga a togi murena, na druga yinga kapatio laga zoru laga a togi mure lo kulia adi, “Pondri!” 4Drongi le’de laga a lotrorulo druga lupundro ti ŋutu laga lo gbi’diki ku lepe kinilo aruke i ’dumadru na teili lo trotro kaŋo i kani, ma ŋutulu kilo ku reremozu ’beri. Lepe druga tiki wale lo moro laga a drumalo. 5Ku Tore lo Kebilito laga aŋazu si’bi naga a togi musalana, na druga yinga kapatio laga zoru laga a togi musala lo kulia adi “Pondri!” Na druga medra drongi laga a loruwolo ’bo ŋutu laga lo gbi’diki ku lepe kinilo gbo ku more lo moroni kapalo kanye kenini. 6Na druga yinga beti roro le’de i dridriŋi na kapa laga zoru kilo lo kulia adi, “Gbore na kinyo naga a kilo gele ti gbo’dini a rope lo luŋa gele, gbore na gaya naga a kilo musala ti gbo’dini a rope lo luŋa gele, ’bo ku kokoro kokoro welena, ku suwe ti konye ti zabibu kine!” 7Ku Tore lo Kebilitolo laga aŋazu si’bi naga a togi iŋmanina, na druga yinga roro lo kapatio laga zoru laga a togi iŋmani lo kulia adi, “Pondri!” 8Na druga medra drongi laga a loporelo, ’bo ŋutu laga lo gbi’diki ku lepe kinilo‚ kari ti lepe kine se naga Tuwa‚ ’bo piri na ŋutulu laga atatuwa kilona nu ku lepe i bo yu. ’Bo ko atiki teriŋi i tatuza na dridriŋi gele i iŋmani katani na ŋutulu lo saka i kani kilona ku walia ti moro‚ ku rile, ku tuwanezi, ku kapa ti droru laga i kani kilo. 9Ku Tore lo Kebilitolo laga aŋazu si’bi naga a togi mukanana na druga medra i muko na piri naga a ’i’ile nu‚ yukala ti ŋutulu laga areremoyi ku kulia ti trugo nase na kulia ti Ŋun ku bo na kulia naga ma ko ’dodrini kine. 10Ko druga resa ku roroto laga gboŋa adi, “Mata Kabuloni, laga a lokiye ku teili lo to’dirilo, akoloki gbo’di ŋoru da ti inga do aku ŋedya kulia ti ŋutulu lo saka i kani kilo, i roba na rima kaya kine ya?” 11Ko druga tiki gele gele bongo nakpe, ataki ko adi, ti ko yukani yuka ’do ku baŋe a naŋutru ti inga kenesi ti upi laga kasi ko kugele kilo ku luŋaseri kasiko kilo aku torumokindro ’beri. Koŋa ireremo be naga ma ko lepe remonina. 12Na druga medra Tore lo Kebilitolo i ŋazu na si’bi naga a togi bukiyena. Kana druga dodonga mugu ku teriŋi. Kolona druga lopugo mugu a naruwo be gunia loruwo. Yapa laga alalazulo druga wudra mugu be rima. 13Kasiri ti ’diko kilo druga ’do’do ka be naga ma koligi laga lo dodoŋa ku kobuŋe naga a drumana lugi konye kanye laga lo trora a togi mure kilona. 14’Dikona druga lilikioro be ruŋa na karatasi, ’bo meria kilo giri ku sulazi kine giri a’dotodru ’beri kaŋo kasiko i piritoni. 15I bo ŋanina mataki ti ka kilo ku drumala kilo, ku drumala ti kamoro kilo, ku korineko kilo ku ŋutulu laga ku teriŋi kilo, ŋutulu giri gele gele, upi kilo, ku ŋutulu laga a kumose ka kilo, ko giri druga ’dandru ’beri i drilio kata yu, ku i lelia ti meria kine kata yu. 16Ko atakindra meria kilo ku lelia kine adi, “ ’Duuta kaya kini i mugo na yi ku lepe laga lo gbi’diki i si’dena kinilo i koŋoni, ku ŋoma na Tore lo Kebilitolona itro, 17igbonaga luŋa laga a druma lo ŋoma nasikonalo ayeŋundra azo ina, ’bo i ilo luŋa de ŋa lo romoki lira ya?”

will be added

X\