KULIA NA KPEKI 5

1Nyenaga na amedra i keni lo lutate lo lepe laga lo gbi’diki i si’dena kinilo‚ ne’de buku naga awuro a lo kata‚ a lo ki’di itro‚ naga ate’depa ku si’bio burio ina. 2Na druga medra malaikata laga a riŋi laga lo tokuzo ku roro laga gboŋa adi‚ “Ŋa lo zuki i ŋazu na bukuna ku ŋonyozi na si’bio ku lepe i kutuni kine ya?” 3Le’de ŋutu ’bayi laga i ’diko yu‚ kugbo i kani, kugbo i muko na kana laga lo romoki i ŋazu na bukuna kugbo i medra na lepe. 4Na druga gbi koru igbonaga le’de ŋutu ’bayi laga lo rie i zuki i ŋazu na bukuna kugbo i medra na lepe ina. 5Temezitio gele druga takindra na adi‚ “Ku gbigbiye‚ mete‚ Ke­muru lo ketimi na Yuda, nye laga a Kukurita na Dawidinalo lepe laga arodru, kuwade lepe roromoki i ŋazu nasi bukuna, ku si’bio naga ku lepe i kutuni kine.” 6I dridriŋi nasi si’dena ku ŋo laga zoru iŋmani kilo‚ i dridriŋi na temezi kilo‚ na druga medra Tore lo Kebilito laga ’beti a’duŋo, laga lo lira yu de, laga ku nyoŋgbora burio, ku konye burio laga a yukala naga burio ti Ŋun naga na sunye i kani giri kinelo. 7Lepe druga utu i ’dumadru na bukuna i keni lo lutate lo lepe lo gbi’diki i si’dena kinilo. 8Kugbo lepe laga a’dumadru bukuna, kapa iŋmani laga zoru kilo ku temezi laga meria mure konye iŋmani kilo druga memereke ka ku Tore lo Kebilitolo i koŋo yu. Ti ko giri gele gele gbo ku rababaki, ku drikerito naga atozore ku libani kine, trugo adi magu na ŋutu ti Ŋun kilona. 9Ko druga welo wiri laga a loludu lo kulia adi‚ “Do azuki i ’dumundra na bukuna, ku i ŋazu na si’bio naga ku lepe i kutuni kine, igbonaga do a’duŋo, ’bo do adakakindra Ŋun ku ’buko na rima konu kine, ŋutulu laga lo ŋiyu i ketimito kine giri‚ ku i kutuzi kine giri‚ ku i ŋutulu kilo giri, ku i zuro kilo giri kilo, 10’bo do atoyeŋundra ko a tumata na ka’i’ila ku Ŋun likalo i koŋoni, ’bo ko i’de’deba tumatana i kani.” 11Na druga medra, druga yinga roroto ti malaika rodri, kenesi kasiko kine alifu mere gele luŋa alifu mere gele‚ alifuki luŋa alifuki‚ ti ko kulu alira i si’dena i laga yu ku kapa laga zoru kilo ku temezi kilo. 12Ko kulia ku roroto laga gboŋa adi‚ “Tore lo Kebilito laga a’duŋolo nyelo zuki i tiki na teriŋina, ku tokorinena‚ ku tobodona, ku riŋina, ku sopona, ku purana, ku teminizona!” 13Na druga yinga kapazi giri laga i ’diko yu, ku laga i kani, ku laga i muko na kana, ku laga suburi kata yu, ku kapazi giri laga kata yu kilo i kulia adi, “Teminizona, ku sopona, ku purana, ku todrumana, ti gbo’di a na lepe laga lo gbi’diki i si’dena kinilo, seku Tore lo Kebilitolo paratra paratra!” 14Kapa iŋmani laga zoru kilo druga kulia adi, “Amena,” ’bo temezi kilo druga memereke ka i teminizo.

will be added

X\