KULIA NA KPEKI 3

1“Wurokindri malaikata lo tomore na karuko laga Saridisi yu kilo adi: ‘Ŋutu laga lo gbo’da ku yukala naga burio ti Ŋun kine ku kasiri laga burio kilo‚ nyelo kulia adi‚ “ ‘Na adeni konesi konu kine. Do adena adi do zoru ti derengi do atuwa. 2Pureni pure. Tolire ŋo lo koloki inga kasuni laga nyoga ku tuwa kilo‚ igbonaga na aku rumbi konesi konu kine soso ku Ŋun liolo i koŋonina. 3Kuwade yole ŋo laga mo do rumbilo, ku laga mo do yingilo. Ririte ŋo ŋanilo‚ lopuke teili. Ku do laga a’biye ku pure‚ na iyeyenga konu yu be kolani‚ ’bo do aka dendra baŋe naga ma na ku yengi konu yu nuni. 4’Bo do lo gbo ’duu ku ku’de ŋutulu Saridisi yu laga aku to’budyo bongola kase kine kilo. Ko iwoworo kasi na kugele ku bongola nakpe igbonaga ko azukina. 5Ŋutu laga lo tigalo isosoyi de ku bongola nakpe‚ ’bo na aka zezeza kari ti lepe kine i buku na runa kata yuni. Na i’di’dindra kari ti lepe kine ku Monye liolo i koŋoni ku malaika ti lepe kilo i koŋoni itro. 6Ŋutu laga lo gbo’da ku suwolo‚ ti lepe yingi kulia naga ma Yuka Nakiyena takindri tomoresi ti karuko kilo kine.’ 7“Wurokindri malaikata lo tomore na karuko laga Filadelafia yu kilo adi: ‘Ŋutu laga a lokiye‚ laga mŋgba‚ laga lo gbo’da ku ŋaye lo Dawidilo, nye lo ŋazu‚ ’bo le’de ŋutu ’bayi lo kindru‚ nye lo kindru‚ ’bo le’de ŋutu ’bayi lo ŋazulo nyelo kulia adi‚ 8“ ‘Na adeni konesi konu kine. Mete‚ na atikindra do kaakutu naga aŋayi gboŋana, ’bo le’de ŋutu ’bayi lo romoki kindru lepe! Na adeni adi teriŋi nonuna ’baziŋa, ’bo kpe‚ do akondra be naga ma na kulianina, do aku renya na. 9Mete‚ ŋutulu ti tomore na Satani‚ laga lo kulia adi se a Yahudi‚ ’bo agbo’da deni‚ ’bo a ’bureniko, mete‚ na ititikindra ko i utu ku ruguŋo ka konu mukuzi yu‚ ma ko ku dendri adi na anyari do. 10Igbonaga do akondra ku teili lo rile be naga ma na nyadrina ina‚ na iriridra do kaŋo i luŋa lo modru laga nyoga ku yeŋundra i kani giri i modyu na ŋutulu laga lo saka i kani kilolo. 11Na iyeyenga wule. ’Depakindri mugu i ŋo laga konu yulo‚ ka’bi le’de ŋutu ku ninadru yo­gono lolulo kaŋo. 12Na itoyeŋundra ŋutu lo tigalo a ziki’di lo ’biluni kadi na ŋun liolo. Lepe aka lupodru kaŋoni, bo na iwudyo ku lepe i muguni kari ti Ŋun liolo ku ti kezi na Ŋun liolo‚ naga a Yerusalema naludu naga na kiyundra ka ŋiyu ku Ŋun liolo i ’diko yuna‚ ku kari kuwe naluduko kine. 13Ŋuta laga lo gbo’da ku suwolo‚ ti lepe yingi kulia naga ma Yuka Nakiyena takindri tomoresi ti karuko kilo kine.’ 14“Wurokindri malaikata lo tomore na karuko laga Laodokia yu kilo adi: ‘Ŋutu laga Amena, laga a ka’dotoni lo bo na kuliana, laga ku teili lo to’diri‚ laga mŋgba‚ laga lo suluza kapazi giri laga ma Ŋun gbezi kilolo‚ nye lo kulia adi. 15“ ‘Na adeni konesi konu kine. Do ani gbo’da lili kuwa kamaka. Na kodro nyadru adi gbo’di lili kuwa kamaka. 16’Bo igbonaga do gbo talaana, agbo’da lili kuwa kamakani ina‚ na izawundra do kaŋo kuwe kutuni. 17Kugbo do laga lo kulia adi‚ Na a korine‚ na gbo ku kapazi‚ ne’de telemera ani tiga na‚ rumbi derengi do aku deni adi do gbo ku sasanya, ku drelia‚ ku telemera, ku konye a mudumudu, ku mugu naga a pilili. 18Kuwade na tretrelakindra do i gborundro na drumo kuweni‚ naga atokela ku kima kine‚ mo do ku gbo’da a korine‚ ku bongola nakpe mo do ku sozi mugu‚ yukuwe na mugu nonu naga a pilili ina ka’bi ku puru‚ ku wele na ŋinyani konye, mo do ku medri kana ’busa. 19Ŋutulu laga ma na nyadri kilo na bita riringa ko‚ na togo’yu ko ku rope na toro, kuwade gbo’di ku puso‚ lopuke teili. 20Mete‚ na lo lira i kaakutuni i trutrungo. Kugbo le’de ŋutu laga ayinga roro liolo‚ kugbo aŋakindra na kaakutu ŋanina‚ na ilubo ku lepe yu i nyosu seku lepe kugele, lepe seku na itro. 21Na ititikindra ŋutu laga lo tigalo i gbi’diki seku na kugele i si’de niona kini beti naga ma lepe tigina‚ druga gbi’diki seku Monye liolo i si’de na lepena kinina. 22Ŋutu laga lo gbo’da ku suwolo‚ ti lepe yingi kulia naga ma Yuka Nakiyena takindri tomoresi ti karuko kilo kine.’ ”

will be added

X\