KULIA NA KPEKI 22

1Malaikatalo druga kpekindra na kare lo pio ti ru naga na momo’yu beti maraya‚ naga na wonu ŋiyu i si’de na Ŋun ku na Tore lo Kebilitolo yu‚ 2naga na wonu i kide na goru lo kezina kine. I goto laga mure ti karelo kilo kedini lo ru ilo kata. Kedini ŋanilo troru konye luŋa mere gele konye mure i kiŋa gele kata yu mu yapazi. Koropo ti kedini ŋani kine a na toruweni zuro kilo. 3Ŋo laga a lomo kilo giri igbo’da ’bayi‚ ’bo si’de na Ŋun ku na Tore lo Kebilitolo ina nyena igbo’da kezi kata yu‚ ’bo upi ti lepe kilo iteteminizo lepe. 4Ko imemedra konye ti lepe kilo‚ ’bo kari ti lepe kine igbo’da kasiko i koŋoto yu. 5Mudena aka gbo’da ’doni. Ko ani miyundro parara na kima ku na kolo. igbonaga Mata laga Ŋun ilo lo igbo’da a parara nasikona, ’bo ko i’de’deba tumatana paratra paratra. 6Malaikatalo druga takindra na adi‚ “Kine kuliata na tayi kine de a naga mŋgba a ’diri. Mata laga a Ŋun lo yukala ti kakeyo kilolo asunyundro malaikata lonyelo i kpekindra na upi kanye kilo kulia naga na ikondra ’beri wule kine. 7’Bo mete‚ na ipondra wule.” Koŋo na’buna ina i ŋutu lo kondra be na kuliata naga na keyo i ina buku de katani kinelo. 8Na laga Yoane a ŋutu laga lo yinga kine kuliata de‚ laga lo medra ko itrolo. Kuwe yingani, kuwe medrani, na druga mereke ka‚ ku malaikata lo kpekindra na kine kuliata de kinelo i mukuzini i teminizo na lepe. 9’Bo lepe druga takindra na adi‚ “Ku kokonu de. Na a upiye ’do kasi ta kugele ku luŋaseri kolu laga a kakeyo kilo‚ ku ŋutulu laga lo kondra be na kuliata ti ina buku de kilo. Teminine Ŋun.” 10Lepe druga takindra na adi‚ “Ku tete’depe kuliata naga na keyo i ina buku de kata kine kaŋo‚ igbonaga luŋalo gbo’di nyogoŋana. 11Ti kakonani lo kulia naro ilo kondri kulia naro kanye kine ’duu‚ ti ŋutu laga a mundrilo gbo’di a mundri ’duu‚ ti ŋutu laga mŋgbalo kondri kulia naga mŋgba kine ’duu‚ ti ŋutu laga a lokiyelo gbo’di a lokiye ’duu.” 12“Mete‚ na ipondra wule i zowundra na rope liolo‚ ma na ku ropakindri ŋutulu giri be naga ma ko kondrini ina. 13Na laga a Alifa seku Omega‚ laga a kayolo seku lo bolo‚ laga a suluwe seku a ’dutelo.” 14Koŋo na’buna ina i ŋutulu laga lo lalazu bongola kase kine‚ ma ko ku gbo’da ku teriŋi na nyeini konye ti kedini lo ru kilo‚ ma ko ku lubo kezi kata yu i ketimito ŋani kine. 15Kaŋo yu ’diozi kata‚ ku ka’dema, ku ŋutulu laga ku konye lopi kilo‚ ku karemo‚ ku ŋutulu laga lo teminizo muloko laga a ’busa ’busa kilo‚ ku ŋutulu giri laga lo nyadru to’bure i kondra na lepe itro kilo. 16“Na laga Yesu asonyodru malaikata liolo konu yu‚ ma lepe ku ’dutukindro tomoresi ti karuko kilo bo na kine kulia de. Na laga a kukurita ku a nyumuti lo Dawidi ilo, a lelego laga lo momo’yulo.” 17Yuka Nakiyena seku ’Diyena se na kulia adi, “Pondri!” Ti kayiŋanilo kuliani adi, “Pondri!” Ŋutu laga ku kure na pio ilo ti pondri. Ŋutu laga lo nyadrulo ti lepe mozuni pio ti ru kine ’ba gbore. 18Na laga Yoane lo takindra ŋutulu giri lo yinga kuliata naga na keyo i ina buku de katani kilo kulia ŋani kine. Kugbo le’de ŋutu laga a’yalakindra ku’de kuliata kasiko kini‚ Ŋun i’yalaki­ndra lepe dreliesei naga awuroki i ina buku de katani kine. 19Kugbo le’de ŋutu laga a’dutundro ku’de kuliata kaŋo i dridriŋi na kuliata ti buku na ina keyo na kulia de kine, Ŋun i’do’dotoro ŋo lo iŋaru lepe laga i kedini lo ru ku i kezi nakiye nago kulia ŋani kine ma wurokini i ina buku de katani kinena katani i lo kaŋo. 20Ka’dotoni lo bo na kine kulia de ilo kulia adi, “A ’diri na ipondra wule!” Amena. Pondri po Mata Yesu! 21’Busa na’bu na Mata Yesuna ti gbo’dini ku ŋutu ti Ŋun kilo giri.

will be added

X\