KULIA NA KPEKI 21

1Na druga medra ’diko naludu ku ka naludu. Ti ’diko naga a kayona ku ka naga a kayona arosodru azo‚ ’bo suburilo gbo’di ’bayi. 2Na druga medra kezi naga a nakiyena, Yerusalema naga a naluduna ti nu ikiyundra kani i ’diko yu ŋiyu ku Ŋun yu‚ naga akukuna beti naga ma ’diyena zupeni ku lale lonyelonina. 3Na druga yinga roro laga gboŋa lo kuu ŋiyu i si’dena yu‚ lo kulia adi‚ “Mete tinade piri naga ma Ŋun sakanina ina gbo ku ŋutulu kilo kugele. Lepe isasaka kasi ko kugele‚ ’bo ko igbogbo’da a zuru lo lepelo‚ Ŋun lepe igbogbo’da kasi ko kugele. 4Lepe iseseza ŋolita kine giri kasiko i konyeni kaŋo‚ ’bo tuwana igbo’da ’bayi‚ luŋulio, ku gbiye‚ ku miye aka gbo’da ’doni‚ igbonaga kulia ti ’bero kine arosodru azona.” 5Lepe laga lo gbi’diki i si’dena kinilo druga kulia adi‚ “Mete‚ na ilo kondra kuliata kine giri a naluduko.” Lepe druga kulia adi‚ “Wure de‚ igbonaga kine kuliata na tayi kine de a naga mŋgba a ’dirina.” 6Lepe druga takindra na adi‚ “Akona azo! Na laga a Alifa seku Gmega‚ laga a suluwe seku a ’dutelo. Na ititikindra ŋutulu laga ku kure na pio kilo pio naga ’ba gbore na ŋiyu i kidi lo pio ti ru kinelo kata yu. 7Ŋutu laga lo tigalo irumbi kine kulia de‚ na igbo’da a Ŋun lo lepe‚ lepe igbo’da a ŋiro lio. 8’Bo ŋutulu laga lo kukuze kilo‚ ku laga ’ba rugo kilo‚ ku laga lo kondra ŋo laga lo ŋmwa a loro kilo‚ karemo kilo ku laga ku konye lopi kilo‚ ka’dema kilo‚ ku laga lo teminizo muloko laga a ’busa ’busa kilo‚ ku laga a ’bureniko kilo giri‚ piri nasikona igbogbo’da i suburi laga lo kokobu ku kima laga ku barutilo kata yu‚ ina de a tuwa naga a togi murena.” 9Malaikata gele i dridriŋi na malaika laga burio laga ku drikerito burio naga atozore ku dreliesi burio naga a ’dute kine ilo‚ druga pondra i takindra na na adi‚ “Pondri‚ ki na ku kpeki do ’Diye naga a noka na Tore lo Kebilitolona.” 10Lepe druga zonga na ti na amoka ku Yuka Nakiyena i mere laga a druma a lozolo ki yu‚ druga kpekindra na kezi nakiye naga Yerusalema naga na kiyundra kani i ’diko yu ŋiyu ku Ŋun yu‚ 11naga na momo’yu ku mo’yu na Ŋun ina. Lepe a nakiye nakiye be ŋurupi naga ku gbore naga ki de kine‚ be yasipi laga a lokiye be marayalo. 12Lepe gbo ku goro na mari naga a druma nazo ku ketimito mere gele konye mure. Malaika mere gele konye mure kulu i ketimito ŋani kine i kutuzi yu‚ ’bo kari ti ketimito naga mere gele konye mure ti Isiraeli kilo kine awuroki i ketimito ti kezi kine kini. 13I go lo lupundro na kolona lu ketimito musala kata‚ i go lo lolowe lu‚ ketimito musala‚ i go lo yeki lu‚ ketimito musala‚ i go lo ’doro na kolona lu‚ ketimito musala. 14Goro na mari na kezina gbo ku mukoto mere gele konye mure. ’Bo kari naga mere gele konye mure ti lososonyo mere gele konye mure ti Tore lo Kebilitolo kilo kine awuroki kasiko kini. 15Malaikata laga lo kulia ku na ilo gbo ku ’bakuzuti na moroni kapazi naga na kukuna ku drumo ina‚ ma lepe ku modyi kezina ku ketimito ti lepe kine ku goro na mari na lepena itro. 16Goto iŋmani ti kezi ŋanina kilo ko zozo. Tolozona gbo beti tuwalana. Lepe druga modyu kezina ku ’bakuzuti nanyena, rumbi derengi lepe a kilomitazi alifu mure ku kamazi iŋmani‚ ’bo tolozona ku tuwalana ku tolozo naga kina giri zozo. 17Lepe druga modyu goro na mari na lepena itro‚ lepe a mitazi meria bukiye‚ beti naga ma ŋutulu modyinina, ’bo malaikatalo nyelo modyu. 18Goro ŋanina a’duko ku ŋoropo na luŋu a yasipi kine‚ ’bo kezini akukuna ku drumo naga a nakiye na gbo’da beti maraya kine. 19Mukoto ti goro na mari na kezina kine azupu ku ŋoropo naga ku gbore naga ki de kine giri. Muko naga a kayona a yasipi‚ naga a togi murena a safira‚ naga a togi musalana a kalekidona‚ naga a togi iŋmanina a emiralidona‚ 20naga a togi mukanana a saradonukisi, naga a togi bukiyena a saridio, naga a togi buriona a kurusolito‚ naga a togi budrona a berulo‚ naga a togi buŋana a topaze‚ naga a togi mere gelena a kurusoparaso, naga a togi mere gele koyita gelena a yakinto, naga a togi mere gele konye murena a ametusito. 21Ketimito naga mere gele konye mure kine a kilia mere gele konye mure‚ ketimito gele gele kine akukuna ku kilia gele gele. Goru laga i kezi kata yulo akukuna ku drumo naga a nakiye naga na momo’yu leri leri beti maraya. 22’Bo na aku medra kadi na Ŋun kezi kata yu‚ igbonaga kadi na Ŋun ina nye naga a Mata Ŋun Kabuloni lepe‚ ku tore lo Kebilitolo ina. 23Kezi ŋanina ani miyundro kolona kuwa yapalo ti mo’ini kanye kini‚ igbonaga mo’yu na Ŋun ina nye naga a parara na lepena‚ ’bo kima na lepena nye naga a Tore lo Kebilitolo ina. 24Zuro kilo iwoworo ku parara na lepena‚ ’bo mataki ti ka kilo itolubo todruma nasena katani. 25Ketimito ti lepe kine ani kinu parana‚ ’bo mudena aka gbo’da yudeni. 26Todrumana ku teminizo na zuro kilo itolupo kata yu. 27’Bo ŋo giri laga ’ba kekeli kilo aka luboni‚ ku ŋutulu laga lo kondra kulia naga aŋmwa a naro ku ti to’bure kilo‚ ŋo kilo ŋutulu laga kari kasiko kine awuroki i buku na ru na Tore lo Kebilitolo kilo se lo ilubo ’du.

will be added

X\