KULIA NA KPEKI 20

1Na druga medra malaikata le’de i kiyundra kani ŋiyu i ’diko yu, laga lo gbo’da ku ŋaye lo drili nagulu naga ’ba ’dutena‚ ku maarota laga a druma kanye kenini. 2Lepe druga moga kitu laga a munu lo ’bero‚ laga a kasosoyini lo kulialo nye laga Satani ilo, druga todya lepe kiŋazi alifu gele, 3druga gupadru lepe i drili kata yu, ma lepe ku kinudri lepe i te’depakindra na lepe tri, ka’bi lepe ku ’bo’boliza zuro kilo ’do tro, ti inga kiŋazi laga alifu gele kilo aku lenga. I bo ŋanina ti lepe lakeni ku baŋe a naŋutru. 4Na druga medra si’deta ku’de, ku ŋutulu laga lo gbi’diki kasiko kini kilo, ti ŋera na kuliana atiki ko. ’Bo na amedra yukala ti ŋutulu laga ma kuweto kasiko kilo ’duŋoni ku kulia ti bo na kulia na ’doru ko ku Yesu kine, ku kulia ti Ŋun kine itro, laga kazu aku teminizo gborolo kugbo ŋo lo kukuna beti lepelo, laga aku rumbi kpiye lo lepelo kase koŋosini kugbo kase kenisini kilo. Ko aru ’do, druga ’deba tumata kasi Kristo kugele kiŋazi alifu gele. 5ŊutUlu laga atatuwa lo koloki kilo aku ru ’do ti inga kiŋazi laga alifu gele kilo aku lenga. Ina de a ŋiye naga a kayona. 6Koŋo na’buna ina a na ŋutulu laga lo gbo’da ku piri i ŋiye naga a kayona kilo, ko a lokiye itro. Tuwa naga a togi murena ani gbo’da ku teriŋi ku ŋutulu laga be kilo de kilo kini, ’bo ko igbo’da a ka’i’ila ti Ŋun ku ti Kristo, ko i’deba tumatana kasi lepe kiŋazi alifu gele. 7Kugbo kiŋazi laga alifu gele kilo laga alenga, Satani ilalake kanye dro­drora yu. 8Lepe ilulupundro i ’bo’boliza na zuro laga i goto iŋmani ti ka kilo, se laga a Goga seku Magoga, i tunundra na ko i moro. Kenesi kasiko kine gbo be kuzo naga suburi i kuti yu kine. 9Ko druga woro i tuwala na ka i longa na piri naga nago na ŋutu ti Ŋun kilona gbiri‚ ku kezi naga na nyanyarana. ’Bo kima druga ’duu ŋiyu i ’diko yu i tonoga na ko. 10Kasosoyini lo kulia laga kazu lo ’bo’boliza ko ilo druga gupazi i suburi lo kima laga ku barutilo kata yu, i piri na gbo’dini gborolo seku kakeyoni lo to’burelo nu. Ko isasanya yu de tupara ku tukaze paratra paratra. 11Na druga medra si’de naga a druma nakpena, ku lepe lo gbi’diki kinilo. Kana seku ’dikona druga wo ku lepe i koŋoni kaŋo, ’bo piri ne’de aku reki kaŋo. 12Na druga medra ŋutulu laga atatuwa kilo, drumala kilo ku kiloŋadroo kilo, ti ko kulu alira i si’de ŋanina i koŋo yu, ’bo bukulo druga ŋaŋayi. Buku ne’dena druga ŋayi, naga a buku na runa. Ŋutulu laga atatuwa kilo druga ŋeraki kulia beti naga awuroki i bukulo kata yu ina, be na konesi kasiko kine. 13Suburilo druga tolupundro ŋutulu laga atatuwa laga kanye kata yu kilo. Tuwana seku Piri na ŋutulu laga atatuwa kilona druga tolupundro ŋutulu laga atatuwa kase kata yu kilo. Ko druga ŋeraki kulia be na konesi kasiko kine. 14I bo ŋanina Tuwana seku Piri na ŋutulu laga atatuwa kilona druga gupazi i suburi lo kimalo kata yu. Suburi lo kimalo a tuwa naga a togi murena. 15Kugbo kari ti le’de ŋutu kine naga aku rie ti awuro i buku na runa kata yu‚ druga ŋutu ŋanilo gupazi i suburi lo kimalo kata yu.

will be added

X\