KULIA NA KPEKI 19

1I bo na kine kulia de, na druga yinga kuu naga be roroto ti mongoyo na ŋutulu rodri lo kuu i ’diko yu lo kulia adi, “Aleluya! Ritundrona, ku purana ku teriŋina a na Ŋun likalo. 2’Bo ŋeresi ti lepe kilo soso a ’diri. Lepe aŋedya kulia ti noka naga na towute koru naga na kokorozu kana ku konye lopi kanye kilona. Lepe anyokodru rima ti upi kanye kilo ku noka ŋanina kini.” 3Ko druga laiza luŋa laga a togi murelo adi‚ “Aleluya! Kopure na lepena nyena ŋiyoro paratra paratra.” 4Temezi laga meria mure konye iŋmani kilo ku kapazi iŋmani laga zoru kilo druga memereke ka i teminizo na Ŋun laga lo gbi’diki i si’dena kinilo‚ ’bo ko akulia adi‚ “Amena‚ Aleluya!” 5Roro laga lo kuu i si’dena ki yulo druga kulia adi‚ “Pureta Ŋun likalo‚ ta giri laga a upi ti lepe kilo‚ ta laga lo kuga lepe kilo‚ laga kiloŋadroo kugbo drumala kilo.” 6Na druga yinga kuu naga be roroto ti mongoyo na ŋutulu rodri kilo‚ naga be woŋo na koroki‚ naga be yule na ka naga ku teriŋi, na kulia adi, “Aleluya! ’Bo Mata Ŋun lika Kabulonilo nye lo ’deba tumatana. 7Kuwade ti yi nyolani nyola ku ŋuŋumi, ti yi pure lepe, igbonaga luŋa lo tokomona na ’depani noka na Tore lo Kebilitolona aromoki azo ina, ’bo ’Diye na lepena akukundra mugu azo. 8Lepe atiki bongola na gbiya ku pamba namilinya, naga na momoyu, naga a nakiye kine i soyi, ’bo bongola ŋani kine a konesi naga soso ti ŋutu ti Ŋun kilo.” 9Malaikatalo druga takindra na adi, “Wure de, adi, ‘Koŋo na’buna ina a na ŋutulu laga lo luŋu i tokomona na ’depani noka na Tore lo Kebilitolona katani kilo.’ ” Lepe druga takindra na adi, “Kine kulia de a naga a ti to’diri ti Ŋun kine.” 10Na druga mereke ka ku lepe i mukuzini i teminizo na lepe‚ ’bo lepe druga takindra na adi, “Ku kokonu de. Na ’do a upiye kasi ta ku luŋaseri kolu laga lo ’dodru bo na kulia ti Yesu kine kilo. Teminine Ŋun, igbonaga ŋutulu laga lo ’dodru bo na kulia ti Yesu kine kilo, se laga ku yuka na keyoni kulia kilo.” 11Na druga medra ’dikona ti nu aŋazu mugu gboŋa, ’bo drongi lokpe lu yu de. Ŋutu laga lo gbi’diki kinilo, kari ti lepe kine se naga Teili lo to’diri, ku To’diri. Lepe lo ŋedya kulia kine soso, lepe lo moro moro ku logbiye lo’bulo. 12Konye ti lepe kilo gbo beti ŋedepa ti kima. Lepe gbo ku yogonoki rodri timataki kanye kuweni. Lepe gbo ku kari naga awuroki, naga le’de ŋutu aku dendra, ŋolo a lepe ka’delo. 13Lepe sozu mugu ku bongo naga asuki i rima katana, ’bo kari na luŋuni lepe kine se naga Kulie lo Ŋun. 14Mongoyo na kamoro ti ’diko laga asoyi ku bongola nakpe naga a nakiye kine kilo, ko akepodru lepe i drongiyo lokpe kilo kini. 15Wale lo moro laga lopilo ilo lupundro ku lepe i kutu yu ma lepe ku debi zuro kilo, ’bo lepe iyuyugu ko ku ture laga a witi. Lepe iriorioga piri na liyani suwe ti konye ti zabibu naga a ŋoma a riŋi na Ŋun Kabuloni ina. 16Lepe gbo ku kari naga awuroki kanye bongo kini, kanye nyutri kini itro adi, “Mata lo mataki, Druma lo drumala.” 17Na druga medra malaikata le’de ti lu alira i kolo ki yu. Lepe druga takindra kpenya na ŋiyoro i ’diko kata yu kine giri adi, “Pondrita, ku tuneta ’beri kugele i tokomona naga a druma na Ŋun ina, 18i nyosu na lokorio ti mataki‚ ku lokorio ti drumala ti kamoro kilo, ku lokorio ti ŋutulu laga a riŋiko kilo ku lokorio ti drongiyo ku ti ŋutulu lo gbi’diki kasiko kini kilo, lokorio ti ŋutulu giri, laga a kumose ka kugbo upi kilo, ku laga kiloŋadroo kilo kugbo drumala kilo itro.” 19Na druga medra gborolo ku mataki ti ka kilo ku mongoyo na kamoro kasiko kilo ti ko kulu atunundra ’beri i moro ku ŋutu lo gbi’diki i drongi kinilo, ku mongoyo na lepe na kamoro kilo. 20’Bo gborolo druga moka seku kakeyoni lo to’bure, laga kazu akondra kpiye ku gborolo i koŋo yu i ’bo’boliza na ŋutulu laga lo rumbi kpiye lo gborolo‚ laga lo teminizo gbetita na lepena itro kilo. Ko kilo agupazi mure katru zoru i suburi lo kima lo kokobu ku baruti ilo kata yu. 21Ŋutulu laga akoloki kilo druga reremoyi kaŋo ku wale lo moro lo ŋutu lo gbi’diki i drongi kinilo, laga a wale lo lupundro ku lepe i kutu yulo. Kpenya kine giri druga yiyimotu yiyimotu ku ko.

will be added

X\