KULIA NA KPEKI 17

1Malaikata gele laga i dridriŋi na malaika laga ku drikerito burio kilolo druga pondra i takindra na na adi, “Pondri, ki na kpeki do ŋera na kulia ti noka naga na towute koru, naga na gbi’diki i pio naga rodri kine ki yu kine. 2Mataki ti ka kilo kazu akondra konye lopi ku noka ŋanina druga ŋutulu ti ka kilo gbo’di amera ku mozu na suwe ti konye ti zabibu ti lepe kine trugo adi, konye lopi.” 3Malaikata ŋanilo druga zonga na i diŋo yu ti na amoka ku Yuka Nakiyena, na druga medra noka naga na gbi’diki ku gboro lotrorulo kinina. ’Bo gboro ŋanilo azore ku kari na momoreyini Ŋun kine kanye muguni, lepe gbo ku kuweto burio ku nyoŋgbora mere gele. 4Ti nokana asozu mugu ku bongola naluwe ku natroru kine. Lepe azupu ku drumo, ku ŋoropo naga ku gbore naga ki kine, ku kilia. Lepe a’deba kanye kenini drikeri naga akukuna ku drumona, naga atozore ku kulia naga na ŋmwa a naro naro naga ’ba kekeli, naga na ŋiyu ku konye lopi kanye kilo kine. 5’Bo kari na mumuyi mumuyi kine awuroki ku lepe i koŋoni. ’Bo bo na kari ŋani kinena adi‚ “Babulona naga a druma naga a ŋote na wate ti towute giri ku na kulia naga na ŋmwa a naro naro i kani kine.” 6Na druga medra noka ŋani naga na mera ku rima ti ŋutu ti Ŋun kine ku rima ti ka’doto ti bo na kulia ti Yesu kine itro. Kugbo na laga amedra lepe, na druga rambu mugu koru. 7’Bo malaikatalo druga takindra na adi‚ “Do rambu mugu ku inyo ya? Na itatakindra do kulia naga na mumuyi mumuyi ti nokana ku ti gboro lo ’dogu lepe laga ku kuweto burio ku nyoŋgbora mere gelelo kine. 8Gboro laga mo do medrilo, lepe ’berona kata, ’bo tinade ’bayi, lepe nyoga ku ŋiyoro i drili naga nagulu naga ’ba ’dutena kata yu i utu i karaki. ’Bo ŋutulu lo saka i kani kilo laga kari kasiko kine aku wuro i buku na runa ŋiyu i ’delaki na ka nu kilo irarambu ’beri i medra na gborolo, igbonaga lepe kazu ’bero kata, ’bo tinade ’bayi, ’bo lepe ipopondra. 9Ku kine kulia de nyadru gbo’di ku dendrana ku totorena. Kuweto naga burio kine a meria burio laga ma nokana gbi’dikini kini kilo. Ko a mataki burio, 10mataki mukana kasiko i dridriŋini a’do’do azo, ’bo mata le’delo kata ’bo le’delo inga aku yeŋundra. Ku lepe laga ayeŋundra, nyadru ti lepe sakani ku baŋe a naŋutru ka’delo. 11’Bo gboro laga kazu ’bero kata, ’bo tinade ’bayi ilo, lepe a mata laga a togi budrolo, lepe a lo mataki burio kilo, ’bo lepe iutu i karaki. 12Nyoŋgbora laga mo do medri kilo a mataki mere gele laga inga aku ’deba tumatana kilo, ’bo ko irurumbi teriŋi na tumatana i luŋa logele kasi gborolo kugele. 13Kilo de gbo ku yoyolozu nagele‚ ko kilo tikindra gborolo teriŋi ku teriŋi nase na tumatana itro. 14Ko imomoro kasi Tore lo Kebilitolo, ’bo Tore lo Kebilitolo ititi ko, igbonaga lepe a Druma lo drumala, a Mata lo mataki ina, ’bo ŋutulu laga kasi lepe kilo ko aluŋu, ko anyume, ’bo ko gbo ku teiliko ti to’diri.” 15Malaikatalo druga takindra na adi, “Pio naga mo do medri naga ma noka naga na towutena gbi’dikini kini kine a ŋutulu ku mongoyo ti ŋutulu, ku zuro‚ ku kutuzi. 16Nyoŋgbora laga mere gele laga mo do medri kilo, ko kasi gborolo iŋmoŋmoza noka na towutena a naro. Ko ikokoloki lepe kana a pilili, ko inyonyosu lepe ’bo itonoga lepe kaŋo ku kima. 17’Bo Ŋun atikindra ko i kondra na ŋo laga ma nye nyadrinilo ma ko gbo’dini ku yoyolozu nagele, ma ko tikindri gborolo tumata nase, ti inga kuliata ti Ŋun kine aku torumokindro ’beri. 18Noka naga mo do medrina a kezi naga a druma na ’deba tumata na mataki ti ka kilona.”

will be added

X\