KULIA NA KPEKI 16

1Na druga yinga roro laga gboŋa lo kuu ku Ŋun kadi yu, lo takindra malaika laga burio kilo adi, “Utita i ’bugo na ŋoma na Ŋun naga i drikerito naga burio kine kata yu ina i kuzo ki yu.” 2Malaikata laga a kayolo druga utu i ’bugo na ŋo laga i drikeri nanyena katanilo i kuzo ki yu. ’Dikasi ku’de naga a naro koru druga kowundra ku ŋutulu kilo i ’berini, ŋutulu laga ku kpiye lo gborolo‚ laga lo teminizo ŋo lo kukuna beti lepe kilo. 3Malaikata laga a togi murelo druga ’bugo ŋo laga i drikeri nanyena katanilo suburi kata yu, suburilo druga yeŋundra be rima ti opuo, kapazi giri laga zoru laga suburi kata yu kilo ko druga tatuwa tatuwa kaŋo. 4Malaikata laga a togi musalalo druga ’bugo ŋo laga i drikeri nanyena katanilo karia kata yu ku kidia ti pio kilo, druga ko yeŋundra a rima. 5Na druga yinga malaikata lo pio lo kulia adi, “Do lo ŋedya kine kulia de soso, Do laga kata tinade, laga lo gbo’da kazu ’bero ilo, do laga a Lokiye lokiyelo. 6’Bo ŋutulu kilo a’bugo rima ti ŋutu ti Ŋun kilo kine ku ti kakeyo kilo kine, ’bo do atikindra ko i mozu na rima kine. Kuwade ko aropa soso.” 7Na druga yinga roro lo kuu i piri naga a ’i’iletana adi, “Iye, Mata Ŋun Kabuloni, ŋeresi kolu kilo soso a ’diri.” 8Malaika laga a togi iŋmanilo druga ’bugo ŋo laga i drikeri nanyena katanilo i kolo ki yu, ’bo kolona atiki teriŋi i ’udya na ŋutulu ku kima. 9Ŋutulu kilo druga sala ku ’udya naga ku teriŋina. Ko druga momorozu kari ti Ŋun laga ku teriŋi na kilo konya de, ’bo ko aku lopugo teiliko i pudya na lepe. 10Malaikata laga a togi mukanalo druga ’bugo ŋo laga i drikeri nanyena kata yulo i si’de na gborolo na tumata ina kini, ’bo tumata na lepena druga sosomuko. Ŋutulu kilo druga kokoza ŋedepa kase kilo ku kulia ti ’beri na mimiye naga koru kine. 11Ko druga momorozu Ŋun lo ’dikolo ku kulia ti ’beri kase na mimiye kine, ku ti ’dikasi kase kine, ’bo ko aku lopugo teiliko ku konesi kase kine. 12Malaikata laga a togi bukiyelo druga ’bugo ŋo laga i drikeri nanyena katanilo i kare laga a druma laga Ufirate kata yu. Pio kine druga ’bi’biyadru kaŋo i kolokindro na mataki laga i lupundro na kolo kilo kiko. 13Na druga medra yukala musala naga a naro naro‚ naga be lo’dokia kine i lupundro ku kitulo i kutu yu‚ ku gborolo i kutu yu‚ ku kakeyoni lo to’burelo i kutu yu. 14Kine yukala de a dreria loro laga lo kondra kpiyesi, laga lo lupodru kaŋo ku mataki ti ka kilo yu i tunundra na ko i moro i luŋa laga a druma lo Ŋun Kabuloni lu. 15“Mete, na lo ipondra be kolani! Koŋo na’buna ina a na ŋutu laga lo tizu mugu go‚ laga lo tizu bongola kanye kine a nakiyelo, lepe ka’bi ku woro a pilili‚ lepe ka’bi ku gbo’da ku yukuwe.” 16Yukala kine druga tunundra mataki kilo i piri naga na luŋu ku kutu na Eberena adi‚ Aramagedona. 17Malaikata laga a togi buriolo druga ’bugo ŋo laga i drikeri nanyena katanilo i ’dikolo kide yu. Roro laga a drumalo druga kuu ku Ŋun kadi yu, ŋiyu i si’dena yu adi, “Akona azo!” 18Lelele na piyana druga peza ku woŋo naga koru, ku yule na kana, ku dodonga na kana. Ina dodonga na kana de a druma koru, ’bo ŋiyu i baŋe naga ma loŋutu gbo’dini i kani nu, kana aku dodonga mugu de tro. 19Kezi naga a drumana druga kikiliza mugu musala, kezino ti zuro kine druga rurusuko ka. Ŋun druga rambu kulia ti Babulona naga a drumana kine itro, atikindra lepe i mozu i drikeri na suwe ti konye ti zabibu naga a ŋoma nanye naga ku teriŋi ina. 20Sulazi kine giri druga wowoke, ’bo meria laga a drumala kilo aku rie gele tro. 21Kudulo druga zi ku toro naga tomoni naga beti kilo meria mukana kine, druga ’do’do ku ŋutulu kilo kini ŋiyu i ’diko yu. Kuwade ŋutulu kilo amomorozu Ŋun ku kulia ti konyola lo torolo kine, igbonaga ilo konyola de a loro koruna.

will be added

X\