KULIA NA KPEKI 13

1Na druga medra gboro lo ŋiyu suburi kata yu, laga ku nyoŋgbora mere gele ku kuweto burio, ku yogonoki ti mataki mere gele ku lepe i nyoŋgbora kini, ku kari naga na momoreyini Ŋun ku lepe i kuweto kinilo. 2Gboro laga ma na medrilo gbo be koka, mukuzi ti lepe kilo gbo be mukuzi ti gboro lo luŋu a dubalo, kutu na lepena gbo be kutu na kemuru. Kitulo druga tikindra lepe teriŋi nanyena ku tumata nanyena ku teriŋi nanye na tumata naga a drumana. 3I dridriŋi na kuweto ti lepe kilo le’delo apuru beti naga azaka i tuwa, ’bo zaka na lepe naga ma tuwanina atoruwe, druga ŋutulu laga i kani kilo giri kekepodru bo na gboro ŋanilo ku rama na ’beri koru. 4’Bo ŋutulu kilo ateminizo kitulo igbonaga lepe atikindra gborolo teriŋi nanye na tumatana ina. Ko druga teminizo gborolo, druga kulia adi, “Ŋa lo gbo beti gboro, ŋa lo romoki moro ku lepe?” 5Druga gborolo ruke i momorozu na Ŋun ku kutu naga a nawala‚ ’bo lepe atiki teriŋi na tumata yapazi meria iŋmani konye mure. 6Lepe druga poki i momorozu na Ŋun‚ i momorozu na kari ti lepe kine‚ ku piri na sakani lepena‚ ku ŋutulu laga lo saka i ’diko yu kilo itro. 7Lepe druga ruke i moro ku ŋutu ti Ŋun kilo i tiga na ko. Teriŋi na tumatana druga tiki lepe ku ketimito kine giri i koŋo yu, ku ŋutulu kilo giri‚ ku kutuzi kine giri‚ ku zuro kilo giri. 8Ŋutulu giri laga lo saka i kani kilo iteteminizo lepe‚ ko a ŋutulu giri laga kari kasiko kine aku wuro i buku na ru na Tore lo Kebilito laga a’duŋolo ina kata yu ti inga kana aku ’delaki. 9Kugbo le’de ŋutu laga ku suwo ti lepe yingi: 10Kugbo le’de ŋutu laga aŋeraki kulia ti drodrora‚ lepe itutu i drodrora yu. Kugbo le’de ŋutu laga lo rembu ŋutu ku wale lo morolo, lepe ireremo ’do ku walelo. Ku kine kulia de nyadru ŋutu ti Ŋun kilo ti gbo’dini ku teili lo rile‚ ku rugo itro. 11Na druga medra gboro le’de laga lo lupundro i kanilo. Lepe gbo ku nyoŋgbora mure be tore lo kebilito, ’bo lepe kulia be kitu. 12Lepe lo kondra ku teriŋi giri naga a na gboro laga a kayolona ku lepe i koŋo yu. Lepe lo tikindra kana ku ŋutulu laga lo saka katani kilo i teminizo na gboro laga a kayo laga zaka na lepe naga ma tuwanina atoruwe ilo. 13Lepe lo kondra kpiyesi naga a drumala kine yeŋadru tozo i tikindra na kimana i kiyundra kani ŋiyu i ’diko yu ku ŋutulu i konyeni. 14Lepe lo ’bo’boliza ŋutulu laga lo saka i kani kilo ku kona na kpiyesi naga ma lepe rukeni i kondrani ku gboro ŋanilo i koŋo yu kine‚ adi ti ŋutulu laga i kani kilo kukune le’de ŋo beti gboro, laga adepa ku wale lo moro, ’bo laga inga zoru ilo. 15Lepe aruke i tikindra ŋo ŋanilo yuka, ma lepe ku kukuliani‚ ma lepe ku tikindra ŋutulu laga a’biye ku teminizo na ŋo lo kukuna beti gborolo kilo i reremoyi. 16Lepe lo tikindra ŋutulu i geraki na kpiyesi i kenisi kase ti lutate kilo kugbo i koŋosi, ŋutulu laga kiloŋadroo kilo ku laga a drumala kilo‚ laga a korineko kilo ku laga a lemerika kilo, laga a kumose ka kilo ku laga a upi kilo. 17Kuwade le’de ŋutu ’bayi laga lo romoki gbodru na kapa kugbo togbodru na kapa ku lepe laga aku geraki kpiye, trugo adi kari ti gboro kine kuwa kenesi ti lepe kine. 18Ku kine kulia de nyadru ti ŋutulu gbo’dini ku totore. Ŋutu laga ku dendralo, ti lepe kene kenesi ti gboro kine‚ igbonaga ko a kenesi ti ŋutulo ina. Kenesi ti lepe kine a kamazi bukiye ku meria bukiye konye bukiye.

will be added

X\