KULIA NA KPEKI 12

1Kpiye laga a drumalo druga puru i ’diko yu, noka ne’de naga asozu mugu ku kolo be bongo na guguma ina ti yapalo ilo ku lepe i mukuzini, ku lepe i kuweni yogono lo kasiri mere gele konye mure kata. 2Ti lepe gbo ku pele, ’bo lepe ti awake ku ta’du nanyena, agbiye, ’bo kodro ta’duundra ŋiro. 3Kpiye le’de druga puru i ’diko yu, mete, kitu laga a druma lotroru, laga ku kuweto burio ku nyoŋgbora mere gele, ku yogonoki ti mataki burio ku kuweto ti lepe kilo kinilo. 4Kote na lepena druga pigo dridriŋi gele i musala katani na kasiri ti ’diko kilo druga biriŋodru ko ka. Kitu ŋanilo druga lira ku noka naga nyoga ku ta’duna i koŋoni ma lepe ku wilodri ŋiro lo lepelo ku lepe naga ata’du. 5Nokana druga ta’duundra ŋirolo a lalale, laga lo iyugu zuro kilo giri ku ture laga a witilo, ’bo ŋiro lo lepelo druga nininazi kaŋo ku Ŋun yu ku si’de na lepena yu itro. 6Nokana druga wo kaŋo i diŋo yu, i piri naga ma Ŋun kukunakindri lepe nu, ma ku tiyuni lepe yu de luŋazi alifu gele kamazi mure ku meria bukiye. 7Nyenaga morona druga ’do’dolaki i ’diko yu, Mikaeli ku malaika ti lepe kilo moro ku kitu ŋanilo. Kitulo ku malaika ti lepe kilo druga moro itro. 8Ko atika, ’bo piri nasikona aku rie i ’diko yu ’do. 9Kitu laga a drumalo druga gupazi ka yu, laga a munu lo ’berolo, laga lo luŋu a Kasosoyini lo kulialo, nye laga Satani, laga a ka’bo’boliani lo ŋutulu giri laga i kani kilo, lepe druga gupazi ka yu, ’bo malaika ti lepe kilo druga gupazi ka yu kugele kasi lepe. 10Na druga yinga roro laga gboŋa lo kuu i ’diko yulo adi, “Tinade ritundrona, ku teriŋi na tumata na Ŋun likalona akpeza ’beri azo, ku teriŋi na tumata na Kristo lo lepelona, igbonaga kasosoyini lo kulia lo sosozu kazu luŋaseri kaya kilo, tupara ku tukaze ku Ŋun likalo i koŋo yu ilo agupazi ka yu ina. 11Ko atiga lepe ku kulia ti rima ti Tore lo Kebilitolo kine‚ ku bo na kulia naga ma se ’dodri kine itro. ’Bo ko aku rambu kulia ti ru nasena kine yeŋadru tozo i tuwa. 12Ku kine kulia de, do naga a ’dikona, nyolani nyola, ku ta laga lo saka kata yu kilo! ’Bo dreliana ina a nasu, kana ku suburilo, igbonaga kasosoyini lo kulialo ilo akiyadru ka kasu yu, ku ŋoma koru ina, ’bo lepe adeni adi baŋe nanyena gbo’di a naŋutru!” 13Kugbo kitulo laga adeni adi nye agupazi ka yu, lepe druga poki i wowondru na noka naga na ta’duundra ŋiro lalalelona. 14’Bo nokana atiki kopuko naga mure ti yugu laga a drumalo kine, ma lepe ku ŋiyoroni ku munulo pazo i diŋo yu ’busa i piri naga ma lepe ku tiyuni i kiŋazi musala ku dridriŋi nu. 15Munulo druga yakadru pio kine beti kare kanye kutuni ku nokana i boni, ma lepe ku ’dokozi ku pio ŋani na zore kine. 16’Bo kana druga logu nokana, kana druga ŋazu kutu nanyena i mozu na pio naga ma kitulo yakadri kanye kutuni kine. 17Kitulo druga ŋoŋoma ku nokana druga utu i moro ku ŋazi laga a nyomo ti lepe laga akoloki kilo, ko laga lo sobu kukuzuki ti Ŋun kine, laga lo ’dodru bo na kulia ti Yesu kine kilo. 18Ti kitulo alira i kuzo naga suburu i kutu yu kunu.

will be added

X\