KULIA NA KPEKI 11

1Na druga tiki ’bakuzuti naga a more be ture‚ ’bo na ataki adi‚ “Ŋine‚ more kadi na Ŋun ina ku piri naga a ’i’iletana ku ŋutulu laga lo teminizo yu de kilo itro. 2’Bo koloki rii na kadi naga a lo kaŋona‚ ku momoru lepe‚ igbonaga lepe atiki zuro kilona. Ko iroro roro kezi nakiyena ku mukuzi yapazi meria iŋmani konye mure. 3Na ititikindra ka’doto kuwe laga mure ti bo na kulia kilo i kezu na kulia luŋazi alifu gele‚ kamazi mure ku meria bukiye‚ ti ko asozu ’beri ku gunia.” 4Kilo de a kade mure laga Gliva kilo‚ ko a lororozi laga mure ti kimazi lo lira ku Mata lo kalo i koŋo yu kilo. 5Kugbo le’de ŋutu laga lo nyadru kokorozu ko‚ kima ilupundro kasiko i kutuzini i tukarakindra na mero kasiko kilo. Kugbo le’de ŋutu lo nyadru kokorozu ko, ti lepe remoni de ’do. 6Ko gbo ku teriŋi i ’de’ya na ’dikona‚ kudulo ka’bi ku ziye i luŋazi laga ma ko kezi kulia kunu kata yu. Ko gbo ku teriŋi i toyeŋundra na karia kilo a rima‚ ku i kokorozu na kana ku konyola giri‚ be naga ma ko nyadrinina. 7Kugbo ko laga alenga ’dodru nase na bo na kuliana, gboro laga lo lupundro i drili nagulu naga ’ba ’dutena kata yulo‚ nye lo imoro kasi ko i tiga na ko‚ i tatuza na ko itro. 8’Bo opuo kasiko kilo ikokoloki i kikoli ti kezi naga a drumana kata yu naga na luŋu ku kulia na guguma adi Sodoma kugbo Ezipeto, piri naga ma Mata lasikolo ’bekoni i kedini laga a larelo mugu nu. 9I luŋazi musala ku dridriŋi ŋutulu giri lo ŋiyu i ketimito kine kilo ku i kutuzi kine ku i zuro kilo imemedra opuo kasiko kilo‚ ’bo ko ireredra nuga na kona. 10Ŋutulu laga lo saka i kani kilo inyonyola ku kulia kasiko kine‚ ko izozonya, ko i’do’doga ’beri kase dridriŋini, igbonaga kilo kakeyo laga mure kilo de kazu se lo sasandru ŋutulu laga lo saka i kani kilo ina. 11’Bo i bo na luŋazi musala ku dridriŋi yuka na ru na ŋiyu ku Ŋun yuna druga lubo kasiko katani, ko druga lilira, ŋutulu laga lo medra ko kilo druga poki i kuze koru. 12Ko druga yinga roro laga gboŋa laga lo kuu i ’diko yu lo kulia ku se adi, “Kiyundrita inide!” Ko druga kiyadru i ’diko yu i ’dikolo kata yu, ti mero kasiko kilo kilo i medra na ko. 13I ilu luŋa de, kana druga dodonga mugu koru, dridriŋi gele i mere gele katani na kezina druga rurusuko, ’bo ŋutulu alifu burio atatuwa ku dodonga na ka ŋanina. Ŋutulu laga akoloki kilo ko druga kuze koru, druga pudya Ŋun lo ’diko ilo. 14Drelia naga a togi murena arosodru azo. Meteta drelia naga a togi musalana nyena ipondra wuleŋa. 15Malaikata laga a togi buriolo druga kudra guke lonyelo. Roroto laga gboŋa kilo druga kuu i ’diko yu lo kulia adi, “Tumata na kana ayeŋundra a tumata na Mata lika ku Kristo lo lepelo, ’bo lepe i’de’deba tumatana paratra paratra.” 16Temezi laga meria mure konye iŋmani lo gbi’diki i si’deta kase kine ki ku Ŋun i koŋo yu kilo druga memereke rupu ka i teminizo na Ŋun, 17i kulia adi, “Yi kilo tikindra do iyete, Mata Ŋun Kabuloni, laga lo gbo’da tmade ku lo gbo’da ’bero itrolo, igbonaga do a’dumundra teriŋi nonu naga a drumana, do apoki i ’deba na tumata nonuna. 18Zuro kilo aŋoŋomatu, ’bo ŋoma nonuna druga nyena yeŋundra, ku luŋa lo ŋerani kulia ti ŋutulu laga atatuwa kilo, ku luŋa lo ropakini upi kolu kilo, ko laga a kakeyo, ku ŋutu ti Ŋun kilo, ku ŋutulu lo kuga do, ŋutulu laga kiloŋadroo, ku laga a drumala kilo. Luŋa lo tukarakini katukara ti kana kilo, nye laga ayeŋundra azolo.” 19Kadi na Ŋun naga i ’diko yuna druga ŋayi. Sanduku na tomore na lepena druga meta i kadi na lepena kata yu. Kimazi ti piya kine druga kpekpeza ’beri, ku roroto ku woŋo na piya, ku dodonga na kana. ku kudu lo ziye ku toro korulo.

will be added

X\