KULIA NA KPEKI 10

1Na druga medra le’de malaikata laga a riŋi, laga lo kiyundra ka ŋiyu i ’diko yu, laga asozu mugu ku ’dikolo be na bongo na guguma, laga ku geri kanye kuwelo. Koŋo na lepena gbo be kolo, kulukuo ti lepe kilo be ŋedepa ti kima lo kopodru ki pirri kilo. 2Buku natrina nu aŋayi ku lepe i keni yu. ’Bo lepe a’delakindra moko lonye lo lutatelo suburi ki, ’bo lo kaduŋelo i kuzo ki. 3Lepe druga resa ku roro laga gboŋa beti rumo na kemuru. Kugbo lepe laga aresa, woŋoto ti piya naga burio kine druga woŋu ku roroto kase kilo. 4Kugbo woŋoto ti piya naga burio kine naga awoŋo azo, na kodro nyoga ku wudyo kulia ŋani kine, ’bo na ayinga roro lo kuu i ’diko yu lo kulia adi, “Mumune mumu kulia naga ma woŋoto naga burio ti piya kine tazini kine, ku wuwuru.” 5Malaikata laga ma na medri ti alira suburi ki i kuzo ki itrolo, druga riodru keni lonye lo lutatelo i ’diko yu‚ 6druga nyosu milio ku lepe laga lo yiŋiki kini‚ laga lo gbeza ’dikona ku kapazi laga kata yu kilo‚ ku kana ku kapazi laga katani kilo‚ ku suburi ku kapazi laga katani kilo ilo, adi pipirisa na ’berina ka’bi ku gbo’gboda ’do‚ 7’bo i luŋa lo kutani guke lo kuru malaikata laga a togi burio lu‚ kulia naga na mumuyi mumuyi ti Ŋun kine itorumokindro ’beri be naga ma lepe trukokindri upi kanye laga a kakeyo kilo ina. 8Roro laga kazu ma na yingi lo kuu i ’diko yu ilo, druga takindra ku na ’do adi‚ “Uti ku ’dumara buku naga aŋayi i keni lo malaikata lo lira suburi ki i kuzo ki itrolo.” 9Kuwade na druga utu ku malaikatalo yu druga takindra lepe adi ti lepe tiki na buku natrina. Lepe druga takindra na adi‚ “ ’Dumadri lepe‚ nyosuni. Lepe igbo’da kamaka konu peleni‚ ’bo lepe itoto’bi be siwu konu kutuni.” 10Na druga ’dumundra buku natrina i keni lo malaikatalo druga nyosu lepe. ’Bo lepe atoto’bi be siwu kuwe kutuni‚ ’bo kugbo na laga anyosu lepe‚ pele niona ayeŋundra kamaka. 11’Bo na ataki na adi‚ “Nyadru kewu kulia ’do ku kulia ti ŋutulu rodri kine, ku zuro kilo, ku kutuzi kine‚ ku mataki kilo itro.”

will be added

X\