KULIA NA KPEKI 1

1Kulia na kpikpiya naga ma Ŋun tikindri Yesu Kristo ma lepe ku kpekindri upi kanye kilo kuliata naga na ikondra ’beri wule kine. Lepe asunyundro malaikata lonyelo i todinikindro na upiye lonye laga Yoane kulia ŋani kine. 2Yoane atrugo kulia ti Ŋun kine ku kulia na ’doru Yesu Kristo kine itro‚ trugo adi ŋo lo meri lepe giri kilo de. 3Koŋo na’buna ina i ŋutu laga lo kenakindra ŋutulu kuliata na keyo kine ilo‚ koŋo na’buna ina i ŋutulu lo yinga kulia ŋani kine kiloni itro‚ laga lo kondra kulia naga na wuwuro katani kine‚ igbonaga luŋalo gbo’di nyogoŋa ina. 4Yoane aroma ku tomoresi naga burio ti karuko laga Asia yu kilo: ’Busa na’buna ti gbo’dini kasuni ku teili lo trotro lo ŋiyu ku Ŋun laga kata tinade, laga lo gbo’da kazu ’bero, laga lo ipopondra ilo yu, ŋiyu ku yukala naga burio naga i si’de na lepena i koŋo yu kine itro, 5ŋiyu ku Yesu Kristo laga a ka’dotoni lo bo na kulia, laga ku teili lo to’diri, laga lo ŋiye a kayo i dridriŋi na ŋutulu laga atatuwa kilo yu, laga a druma lo mataki laga i kani kilolo. Lepe lo nyadru yi, lo lakundra yi i torozi kaya kine ku kulia ti rima kanye na ’bukozi kine. 6Lepe lo toyeŋundra yi a tumata na ka’i’ila ku Ŋun Monye lonyelo i koŋoni. Purana ku teriŋi na tumatana ti gbo’dini a na lepeŋa, paratra paratra. Amena. 7Meteta, lepe lu popondra ku ’dikolo kine, ’bo ŋutulu giri gele gele imemedra lepe ku konye kase kilo, ŋutulu lo tyegu lepe kilo giri. Zuro laga i kani kilo giri iluluzo luluzo ku kulia ti lepe kine. Iye‚ Amena. 8“Na laga a Alifa seku Omega,” Mata Ŋun lo kulia, laga kata tinade, laga lo gbo’da kazu ’bero, laga lo ipopondra ilo, nye laga a Kabuloni. 9Na laga Yoane‚ luŋase lasu‚ lo ŋarundra sasanyana, ku tumatana ku teili lo rile kasi ta kugele ku Yesu katani ilo, na kazu lu saka i sula na luŋu a Patamo nu kata yu, ku kulia ti kulia ti Ŋun kine seku bo na kulia na ’doru na ku Yesu Kristo kine itro. 10Kugbo na laga amoka ku Yuka Nakiyena ku Matalo i kolo yu, na druga yinga kuwe ki’di yu roro laga gboŋa be guke, 11laga lo kulia adi, “Wure i buku kata ŋo laga mo do medri kilo‚ sonyoro buku ŋanina i tomoresi naga burio ti karuko laga Efeso yu‚ ku Samuruna, Perigamo, Tuwatira, Saridisi‚ Filadelafia‚ ku Laodokia kilo.” 12Na druga lopugo mugu i medra adi roro liŋa lo kulia ku na. Ku na laga alopuko, na druga medra lororozi lo ’delani kimazi laga burio‚ lo kukuna ku drumo kilo. 13I lorozozi ŋani kilo i dridriŋini ŋo laga be ŋutu kata, laga asozu mugu ku bongo yeŋadru tozo i mukuzi, laga atora ku kapa naga a drumo kanye gedyoni ilo. 14Kuwe lo lepelo‚ ku kupi ti lepe kilo a lokpe be warota‚ a lokpe salala be toro, ’bo konye ti lepe kilo gbo be ŋedepa ti kima. 15Mukuzi ti lepe kilo aziya be witi lotroru laga lo tokela i tuka kata, ’bo roro lo lepelo gbo be woŋo na koroki laga rodri kilo. 16Lepe gbo ku kasiri burio i keni lonye lo lutatelo‚ wale lo moro laga a lopi ku goto murelo alupundro ku lepe i kutuni‚ ’bo koŋo na lepena gbo beti kolo na sa’yu ku teriŋi koruna. 17Kugbo na laga amedra lepe‚ na druga mereke ka ku lepe i mukuzini be ŋutu laga atuwa. ’Bo lepe druga tanyakindra keni lonye lo lutatelo kuwe kini‚ druga kulia adi‚ “Ku kukuze, na laga a kayolo ku a ’dutelo itro. 18Na a ŋutu laga zorulo. Na kazu atuwa, ’bo mete‚ na gbo’di zoru paratra paratra. Na gbo ku ŋayeta ti tuwana ku ti piri na ŋutulu laga atatuwa kilona itro. 19Kuwade‚ wure ŋo laga mo do medri kilo‚ ŋo laga lo gbo’da tinade, ku laga lo ikokondra ’beri kolele kilo. 20Kulia naga na mumuyi mumuyi ti kasiri laga burio laga mo do medri i keni lio lo lutatelo kilo, ku lororozi ti kimazi laga burio laga akukuna ku drumo kilo, se kilo de: kasiri laga burio kilo se laga a malaika ti tomoresi naga burio ti karuko kilo, ’bo lororozi ti kimazi laga burio kilo se laga a tomoresi naga burio ti karuko kilo.

will be added

X\