FILIPI 4

1Kuwade luŋaseri kuwe lo nyari na kilo, laga ma puso nasuna lengi na kilo, ta laga a nyola nio, a yogono lio laga ma na pudyi mugulo itro, liranita tritri ku Matalo katani, ŋutu laga ma na nyadri koru kilo. 2Na ma’yu mugu ku Ewodia, na ma’yu mugu ku Suntuke itro adi ti ko gbo’dini ku yoyolozu nagele ku Matalo katani. 3Na piza do laga a kakitani laga mŋgba seku na kugelelo‚ loke kine wate de naga akondra kita ku teili giri kasi na kugele i tokuwodru na kuu na’buna kine‚ seku Kelementi itro ku kakita ku’de laga kasi na kugele kilo, laga kari kasiko kine awuro i buku na runa katani kilo. 4Nyolanita nyola mu luŋa ku Matalo katani. Na ikulia ’do adi nyolanita nyola. 5Ŋutulu kilo giri ti dene teiliko kasu laga mada kilo. Matalo gbo’di nyogoŋa. 6Ku wiwinyata wiwinya ku le’de ŋo tro, ’bo i kuliata giri katani tikita Ŋun i dendra na piyesi kasu kine‚ ku maguna‚ ku mama’yu na ’beri‚ ku tiyi na iyete itro. 7Teili lo trotro lo Ŋun lo rodru rambu na ŋutulu giri koru ilolo itizu teiliko kasu kilo ku yoyolozu nasuna ku Kristo Yesu katani. 8Luŋaseri‚ kulia naga a tutuweto kine‚ yoleta ’duu kuliata giri naga a ’diri‚ ku naga na sosopo‚ ku naga soso‚ ku naga a nakiye‚ ku naga na kpekpele, ku naga na bebela kine ’dia gbo adinyo kpe‚ kugbo ŋo laga a lo’bu kata‚ ku laga lo pupura‚ yoleta kine kulia de. 9Ŋo laga ma ta zuzumbi, ku laga ma ta rumbi‚ ku laga ma ta yingi‚ ku laga ma ta medri kuwenilo, koneta ŋo ŋani kilo. ’Bo Ŋun lo teili lo trotrolo isisi’da kasi ta kugele. 10Na anyola koru ku Matalo katani adi tinade i bo na baŋe a nazo‚ ta atoŋizu rambu nasuna ku kulia kuwe kine. A ’diri ta kazu arambu kulia kuwe kine‚ ’bo ta aku rio kiko ŋanilo. 11Agbo’da na lo gbi kapani‚ igbonaga na adenundra gbo’da naga ku teili lo madana‚ ’dibani kodro ku kulia kuwe kine gbo adinyo kpe. 12Na adeni gbo’da naga kanana, ’bo na adeni, gbo’da naga ku kapazi zorena itro. I kuliata giri katani, na adiniki saka naga ku yimona ku magona itro. 13Na roromoki kondra kuliata kine giri ku teriŋi naga ma Kristo tikindri nana. 14’Bo ta akondra ku teiliko lo’bu i ŋarundra na drelia niona. 15Ŋutu ti Filipi kilo, ta adeni adi kazu i suluza na kuu na’buna i naga ma na kolokindri Makedonia nu, tomore gele ’bayi na karuko lo tomodya ’beri kasi na kugele i tikindra na na ’doketa kugbo i rukundro na ’doketa ŋo kilo ta ka’delo. 16’Dibani kodro ku na laga Tesalonike yu kpe, ta asunyukindro na loketo ku kulia ti telemera niona kine, agbo’da luŋa gele ’duni, ’bo luŋa mure. 17Na agbo’da ga’yu ’doketani, ’bo na ga’yu trora na konye naga na itikindra ta rezema i ’diko yuna. 18’Bo na gbo ku kapazi giri arodru. Na ayimo azo, igbonaga na arumbi ’doketa laga lo ŋiyu kasu yu ma Epafurodito zondri kilo, laga lo ŋmwa sisisi, a ’i’ile laga soso ku Ŋun i konyeni, laga lo tikindra lepe nyola itrolo. 19’Bo Ŋun liolo itozodru ta ku kuliata giri naga ma ta gbini kine be naga ma tokorine na lepe naga ku Kristo Yesu katanina gbo’dini koruna. 20Ŋun Monye likalo ti purani pura, paratra paratra. Amena. 21Rometa roma ku ŋutu ti Ŋun kilo giri ku Kristo Yesu katani. Luŋaseri laga kasi na kugele kilo aroma ku ta. 22Ŋutu ti Ŋun kilo giri aroma ku ta, alanguna ŋutulu laga lo gbo’da ku Kaisari i ’ba yu kilo. 23’Busa na’bu na Mata Yesu Kristo ina ti si’dani ku ta.

will be added

X\