FILIPI 3

1Luŋaseri kuwe kilo‚ kulia naga a tutuweto kine‚ nyolanita nyola ku Matalo katani. Laga na‚ na ani kanya i wurokindro na ta ’do kulia naga ma na wudyi a kayo kine‚ ’bo ta lepe itoliria ku kine kulia de. 2Gbo’dita go ku ’diozi kilo‚ gbo’dita go ku ŋutulu lo kondra a loro kilo‚ gbo’dita go ku ŋutulu laga lo nyadru kikiliza na ’beri kilo. 3’Bo yi lepe gbo ku taaro naga mŋgbana, yi kilo teminizo Ŋun ku yuka‚ yi kilo pupudya ’beri ku kulia ti Kristo kine‚ yi agbo’da pupudya ’beri ku teriŋito naga na kondra ’beri kaya ’berini kineni. 4’Bo na lepe kodro roromoki pudya mugu ku teriŋito naga na kondra ’beri kuwe muguni kine. Kugbo le’de ŋutu rambu adi nye roromoki pudya mugu ku kulia naga na kondra ’beri kanye muguni kine, laga na arodru. 5Na ataaro i luŋa budrolo‚ na a Isiraelitio, laga i ketimi na Benyaminana, na a Eberetio, kayuŋo kuwe kilo a Ebere. Ku kulia ti kukuzuna kine na a Farisayotio. 6Na kazu gbo ku puso i wowondru na tomore na karuko kilona. Ku kulia naga ma loŋutu kenani mŋgba ku sobu na kukuzuna kine na ’ba kulia naga na sosoyi sosoyi kuwe muguni. 7’Bo na ayo’yu kuliata giri naga a rezema kuweni kine a ’busa ku kulia ti Kristo kine. 8A ’diri na ayo’yu kuliata kine giri a ’busa ku kulia ti dendra naga a na’bu koru naga ma na dendrini Kristo Yesu Mata liolo kine. Ku kulia ti lepe kine‚ na atelikindro kapazi kilo giri‚ ’bo na yo’yu kapazi ŋani kilo be na korodona ma na ku rumbi Kristo‚ 9ma na ku rie ku lepe katani ’busa. Na agbo’da gbo ku logbiye lo’bu lio lepe na ŋiyu ku sobu na kukuzunani, ’bo na rumbi logbiye lo’bu liolo ku naga ma na rugini Kristona. Logbiye lo’bu ŋanilo Ŋun lo tikindra na ku rugo. 10Na nyadru dendra Kristo ku teriŋi na toŋiyeni lepena itro‚ ’bo na nyadru ŋarundra luŋulio ti lepe kilo ma na ku yeŋundra be lepe ku kulia ti tuwa na lepena kine‚ 11adi ku roromoki, ma na ku yenga i ŋiye naga ku ŋutulu laga atatuwa kilo i dridriŋi yu ’busa. 12Na agbo’da kulia adi na ario kunu kulia deni‚ kugbo adi na aromoki sosoni. ’Bo na lo wowoke ŋero yu ma na ku mokundra kunu kulia de a kuweŋa‚ be naga kazu ma Kristo Yesu mogini na a lonyena. 13Luŋaseri, na agbo’da yo’yu adi na amoga kunu kulia de a kuweŋani, ’bo na kondra kulia nagele kine de‚ na gbo’di aboŋoni kulia naga kuwe bo kunu kaŋo‚ na lo morodyu ku teriŋi i kulia naga ŋero yu kunu. 14Na lo wowoke ŋero i pata yu ma na ku rumbini rope laga a luŋe naga ma Ŋun lungini yi i ’diko yu ku Kristo Yesu katana. 15Kuwade yi laga aguguli kilo ti yi rame deŋa. ’Bo ku ta laga ku yoyolozu naga ka’dena, Ŋun ikpekpekindra ta kulia ŋani kine. 16’Bo ti gbiyeri likalo gbo’dini soso be na kukuzuki naga ma yi kepodri yeŋundra tozo tinade kinena. 17Luŋaseri, ta giri miruta na. Boŋadrita ŋutulu laga lo kepodru bo na kpiye laga ma yi kolokindri ta ilo. 18’Bo ŋutulu rodri kilo woworotu be na mero ti kuu na’bu na kedini laga a lare lo Kristo ilona. Na atrukokindro ta kine kulia de luŋa rodri‚ tinade na lo trukokindro ta ku ŋolita itro. 19’Dute na kulu ŋutulu de ina igbo’da a karaki nasiko. Mulete lasiko a magori kasiko kine‚ pudya nasiko na ’berina a yukuwe nasiko‚ ko yoyolozu kulia ti ina ka de kine. 20’Bo zuru likalo lu i’diko yu. Yi kilo momondru ku teili giri Kariteni laga lo ipondra i ’diko yu lu‚ ŋolo a Mata Yesu Kristo. 21Lepe itotowudra ’beri kaya naga ’ba pura kine i yeŋundra be na mugu nanye naga a na’bu na’buna ku teriŋi naga ma lepe romoki ’delakindri kapazi kilo giri i sobu na nye ina.

will be added

X\