FILIPI 2

1Kugbo ruda na teiliko kata ku Kristo katani‚ kuwa loko na teiliko naga ku nyadruna, ku more na Yuka Nakiyena, kuwa nyadru naga ku pusona‚ kuwa ediyolo, 2tikita nyola niona ti zoreni zore‚ ku naga ma ta gbo’dini ku yoyolozu nagelena, ku nyadru nagelena‚ ku yuka nagelena, ku rambu na kulia gelena itro. 3Ku kokonuta le’de ŋo gele tro ku rerenya, kuwa ku sisinga na ’beri‚ ’bo ku yoyolozu naga ’ba pura na ’berina yoleta ku’de ŋutulu a lo’bu arodru ta lepe. 4Ta giri gele gele ka’bi ta ku rarami kulia kasu lepe kine ka’delo‚ ’bo rameta kulia ti ku’de ŋutulu kine itro. 5Yoleta be naga kazu ma Kristo Yesu yoyolozina. 6Lepe kazu gbo ku gbiyeri lo Ŋun ilo‚ ’bo lepe aku yo’yu adi gbo’da naga seku Ŋun kugelena a ŋo laga nye rarakundra. 7Lepe akolokindro mugu kana‚ a’depundra gbiyeri lo upiyelo, ayeŋundra be na ŋutuna. Ma lepe ’debini mugu na ŋutuna‚ 8lepe atemizundro mugu ka ’ba pudya na mugu. Lepe asobu kulia yeŋadru tozo i tuwa‚ tozo i tuwa naga i kedini laga a larelo ki yuna. 9Ku kine kulia de‚ Ŋun atoŋizu lepe ki ku teminizo koru‚ agbizo lepe ku kari naga arodru kari ku’de kine giri‚ 10adi ma ŋutulu giri ku ruguŋo ka ku kuŋusi ku kari ti Yesu kine‚ kugbo i ’diko yu‚ kugbo i kani‚ kugbo i muko na kana‚ 11ma ŋutulu giri ma tazu gboŋa adi Yesu Kristo a Mata i purani na Ŋun Monyelo. 12Ku kine kulia de‚ ŋutulu laga ma na nyadrini kilo‚ ta asobu kulia kuwe kine mu luŋa ku na laga gbo kasi ta kugele. Kuwade alanguna tinade ku na laga ’bayi kasu dridriŋini, koneta kitana ku kuze‚ ku zangu i kpeza na rite nasu lepena‚ 13igbonaga Ŋun lepe ilo kita kasu katani ma ta ku nyadru ŋo laga lo tikindra lepe nyolalo, ma ta ku kondrini ŋo ŋanilo itro. 14Koneta kuliata giri ’ba ngunguruto‚ ’ba rerenya, 15ma ta ku gbo’da ’ba kulia naga na sosoyi sosoyi kasu ’berini kine‚ ’ba to’bure, a ŋazi ti Ŋun laga ’ba merikozi i dridriŋi na ŋutulu laga a bidrori laga lolopugo ’beri laga ma ta mo’ini be kasiri i kani kasiko i dridriŋini kilo. 16’Depeta kulia ti ru kine tritri‚ kuwade i luŋa lo Kristo lu na ipudya mugu adi na agbo’da kondra a ’busani, ’bo na agbo’da trereka ku ta a ’busani. 17Rugo nasuna gbo beti ŋo laga a ’i’ile lo Ŋun. ’Dibani kodro ku rima kuwe kine i’bukozi i ŋo laga a ’i’ile ŋanilo kini kpe‚ na inyonyola kasi ta giri kugele. 18Kuwade ta itro‚ nyolanita nyola kasi na kugele. 19Kugbo Mata Yesu laga anyadru, na nyadru sonyodru Timoteo wule kasu yu‚ ma na ku rumbi ruda na teilina ku yinga nio na kulia kasu kine. 20Le’de ŋutu ’bayi kuweni laga ku yoyolozu naga be ina de‚ laga lo i’delakindra teili soso be na ku kulia kasu kine. 21Ko giri ga’yu kulia kase lepe‚ agbo’da kulia ti Yesu Kristo kineni. 22’Bo ta adeni soso gbiyeri lo Timoteo laga a lo’bulo, igbonaga lepe akondra kita na kuu na’buna seku na kugelena, beti naga ma ŋiro kondri kita seku monye lonyelo ina. 23Kuwade kugbo na laga adeni soso adi kulia kuwe kine igbo’da adidinyo‚ na isosonyodru lepe. 24Kugbo Mata laga anyadru, na lepe iyeyeŋadru kasu yu wule. 25Na arambu a na’bu i sonyodru na Epafurodito kasu yu. Lepe a luŋase lio‚ a kakitani laga a kamoroni seku na kugelelo‚ laga lo sunyu ta kuwenilo‚ i konakindra na na kita. 26Puso nasuna giri alenga lepe koru. Lepe ayeŋundra ku luŋuli igbonaga ta ayinga kulia ti tuwane lo lepelo kinena. 27A ’diri lepe kazu gbo ku tuwane‚ ayeŋundra nyoga ku tuwa. ’Bo Ŋun gbo ku ediyo ku lepeni‚ agbo’da ku lepeni ka’deloni, ’bo kuweni itro‚ ka’bi na ku rumbi luŋuli i ku’de luŋulio kini. 28Kuwade na nyadru sonyodru lepe‚ ma ta ku gbo’da ku nyola i medra na lepe ’do‚ ma ’do’do nio na teilina ku gbigbi’diki ’busa. 29Kuwade rukundrita lepe ku Matalo katani ku nyola koru. Kuketa ku ŋutulu laga be kilo de kilo‚ 30igbonaga lepe kodro ’do’do ku tuwa ku kulia ti kita na Kristona. Lepe akolodru mugu i tuwa i konakindra na na kita naga ma ta zarinina.

will be added

X\