FILIPI 1

1Paulo seku Timoteo laga a upi ti Kristo Yesu kilo, aroma ku ŋutu ti Ŋun laga ku Kristo Yesu katani Filipi yu kilo giri‚ ku kameta ti karuko kilo ku kaloko ŋani kilo itro. 2’Busa na’buna ku teili lo trotro lo ŋiyu ku Ŋun Monye likalo yu‚ ku Mata laga Yesu Kristo yu itrolo ti gbo’dini ku ta. 3Na tikindra Ŋun liolo iyete luŋazi giri laga ma na rambini ta kilo. 4I magu nio naga ku ta giri mu luŋana katani na magu Ŋun ku nyola‚ 5igbonaga ta atomodya ’beri kasi na kugele i kondra na kita na kuu na’buna, ŋiyu i luŋa laga a kayo lu yeŋundra tozo tinade ina. 6Na lidra mugu adi Ŋun laga kazu lo suluza kita naga a na’bu kasu katani ilo, nye lo itutuzo kita ŋanina i luŋa lo Kristo Yesu lu. 7A na’bu ku na rambu ta giri deŋa, igbonaga kulia kasu kine kine kuwe teilini ina, ’bo ta giri atomodya ’beri kasi na kugele i ’busa na’buna katani, i naga ma na drodroranina, i naga ma na ’dodrini bo na kulia ti kuu na’buna ku i kpeza na ko soso itrona. 8Ŋun adeni adi puso nasuna giri alenga na koru ku nyadru na Kristo Yesuna. 9Na magu Ŋun de adi nyadru nasuna ti ’durodri ŋero yu ’do ’do ku dendrana ku trime na kulia kinena itro, 10ma ta ku tritrimbi ŋo laga a lo’bu, ma ta ku gbo’da ku teiliko lokiye, ’ba kulia na sosoyi sosoyi kasu ’berini kine i luŋa lo Kristo lu, 11ma ta ku radani konye ti logbiye lo’bu lo ŋiyu ku Yesu Kristo yu kulu koru ma ta ku teminizo Ŋun ku pura. 12Luŋaseri‚ na nyadru deneta adi kuliata na kondra ’beri kuwe muguni kine se na tokuwodru kuu na’buna, 13kuwade kuu na’bu ŋanina akuworo ku katiyu giri ti Praitorio kilo i dridriŋini, ku ŋutulu ku’de kilo itro. Ko adeni adi na adrodrora ku kulia ti Kristo kine. 14Kulia ti drodora niona kine atikindra ŋutulu rodri i dridriŋi na luŋaseri kilo i gbo’da ku rugo naga mŋgba naga ma ko rugini Matalona, ’bo, ko atogo’yu teiliko kase kilo i trugo na kulia ti Ŋun kine ’ba kuze. 15A ’diri ku’de kilo ŋutulu trugo kulia ti Kristo kine ku yuma, ku rerenya itro, ’bo ku’de kilo ku teiliko laga lo’bu. 16Kilo de akondra de ku nyadruna, igbonaga ko adeni adi na lo gbo inide ku naga ma na ’dodri bo na kulia ti kuu na’buna kinena. 17’Bo kulu de laga lo trugo kulia ti Kristo kine ku rerenya kulu, agbo’da ku teili lo’buni, ko rambu sasandru na na i drodrora niona katani. 18Adinyo kuru ya? Na anyola, igbonaga Kristo lo truko ku kikoli kilo giri, kugbo ku teili lo to’bure, kuwa ku teili lo to’diri ina. ’Bo na inyonyola ’duu, 19igbonaga na adeni adi kine kulia de se na ilopuke a rite niona, ku kulia ti magu nasuna kine, ku kulia ti Yuka na Yesu Kristo naga atiki na kine itro. 20Be naga ma na mondrini ku teili giri, ku yendruna itrona, na aka gbo’da ku yukuwe ku le’de ŋo geleni, ’bo ku naga ma na trugi kulia ku teili logo ’duu ’duuna, ti Kristo purani pura kuwe gbi­yerini‚ tinade‚ be naga luŋa giri‚ kugbo ku ru niona‚ kugbo ku tuwa niona. 21Ru niona ŋolo a Kristo‚ ’bo tuwana a rezema. 22Ku na gbo ku ru na muguna‚ trugo adi trora na konye ti kita niona kata‚ kuwade na aku de na inyumundro ŋo laga a inyo. 23Na gbo ku kuliata mure kideni. Kulia naga ma na nyadri kine se kine de. Na nyadru kodro utu ku gbo’da seku Kristo kugele‚ se naga troru a na’bu koru. 24’Bo kugbo na laga zoru‚ a na’bu kasuni. 25Igbonaga na aliri kine kulia dena‚ na adeni adi na isaka ’duu‚ na isaka kasi ta kugele ma rugo nasuna ku ’durodri ŋero yu ku nyola‚ 26ma ta ku pudyini ’beri koru ku Kristo katani ku kulia kuwe kine‚ igbonaga na iyeŋadru kasu yu ’do ina. 27’Bo gbiyeri lasulo ti zukini ku kuu na’bu na Kristona, kuwade ku na laga ayeŋadru i medra na ta kugbo ku na laga ’bayi‚ ma na ku yinga adi ta alira tritri ku yuka nagele‚ adi ta kulu momodyu koru ku teili logele ku kulia ti rugo na kuu na’buna kine. 28Ku kukuzeta kulia ti mero kasu kilo tro. kine kulia de a kpiye laga soso kasikoni ku kulia ti karaki nasikona kine‚ ’bo akpeza rite nasu naga na ŋiyu ku Ŋun yuna itro. 29’Bo ’busa na’buna atiki ta ku kulia ti Kristo kine‚ agbo’da i ruko na lepe ka’deloni, ’bo i rumbi na luŋuli ku kulia ti lepe kine itro. 30Yi kilo moro moro nagele kasi ta kugele. Ta kazu amedra na i moro ŋanina‚ ’bo na lo momoro ’duu‚ be naga ma ta yingina.

will be added

X\