MATAYO 3

1I nu baŋe de Yoane lo tikindra baputizilo ayeŋundra‚ i trugo na kulia i diŋo na Yudayana kata yu‚ 2druga kulia adi‚ “Lopuketa teiliko, igbonaga tumata na ’dikona gbo’di nyogoŋa ina.” 3’Bo ilo de a ŋutu laga ma kakeyoni Isaya tazini kulia ti lepe kinelo adi‚ “Roro lo ŋutu lo laiza i diŋo yu, adi: Kukuneta kiko lo Matalo‚ ’bo rineta kikoli ti lepe kilo gbogbo.” 4’Bo ti Yoane asozu bongo na kukuna ku kupi ti kamelo‚ ’bo kapa na muko na lepena a ’beriko, ’bo kapa ti lepe lo nyenyei kilo a maya ku wele na siwa ti droru. 5Ŋutulu ti Yerusalema ku Yudaya giri‚ ku pirito giri naga Yorodani i kutu yu kine kilo druga lupodru ku lepe yu. 6Ku ko laga atrugo torozi kase kine‚ lepe druga tikindra ko baputizilo i kare laga Yorodani ilo kata yu. 7Kugbo Yoane laga amedra ŋutulu rodri ti Farisayo kilo ku ti Sadukayo kilo i pondra i baputizini, lepe druga piza ko adi‚ “Ŋazi ti ’boro’boro kilo! Ŋa lo trukokindro ta adi wokinita ku ŋoma na ipondra ina ya? 8Kuwade radanita konye lo romoki kpeza lopuko nasu na teiliko kilo‚ 9’bo ku yoyota kuliata kasu teilikoni adi‚ ‘Abarahama a monye lika‚’ igbonaga na takindra ta‚ Ŋun roromoki toŋizu kilo ŋoropo de a ŋazi ti Abarahama ina. 10Tinade tululo a’delaki i kade mukotoni azo. Kade giri laga ani rada konye lo’bu kilo itrotroko ka‚ ibibiriŋo i kima. 11“A ’diri laga na‚ na tikindra ta baputizilo ku pio ku kulia ti lopuko na teiliko kine‚ ’bo le’de ŋutu ilo ipondra kuwe boni‚ laga lo ilangu na ku teriŋi ilo‚ ’bo na ani romoki i ’dogu na kamuka ti lepe kine. Lepeŋa itikindra ta baputizilo ku Yaka Nakiyena ku kima itro. 12Sete lo lepelo ilo ku lepe i kenini‚ lepe irere purugi nanyena a nakiye. Lepe i’bu’bugo konye ti kinyo kilo i gugu‚ ’bo naga puta kine lepe itotonyoro ku kima naga ani tatuwina.” 13Yesu druga ŋiyoro Galili yu kaŋo‚ druga ku yenga Yorodani yu ku Yoane yu i ’deba na baputizilo ku lepe yu. 14’Bo Yoane kodro aku nyari‚ ’bo akulia adi‚ “Na kedri kodro lo ’deba baputizi ilo konuni, ’bo do pondra kuweni adidinyo ya?” 15Yesu druga teyitokindro lepe adi, “Koloki kine kulia de ti gbo’dini de ki’do, ku yi torumoki kulia giri naga ma Ŋun nyadri kine.” Kuwade nyena rugi lepe. 16Ku Yesu laga a’deba baputizilo, wuleŋa gele ku lepe laga alupundro i pio kata yu‚ ’dikona druga ŋakindra mugu ku lepeni‚ lepe druga medra Yuka na Ŋun i kiyundra ka beti a’buguti i gbi’diki kanye kini‚ 17’bo roro le’de druga kuu i’diko yu‚ adi‚ “Ilo de a Ŋiro lio laga ma na nyadrilo‚ na anyola ku lepe.”

will be added

X\