MATAYO 28

1I bo na sabatolo, ti wara na kana gbo’dini nyoga‚ i luŋa laga a kayo lo sabitilo Maria na Magadalana druga utu seku Maria ne’dena i medra na gulona. 2Ti kana adodonga mugu koru‚ igbonaga malaikata lo Matalo akiyundra i ’diko yu kani‚ adukadru ŋurupina kaŋo druga gbi’diki kini ina. 3Koŋo na lepena gbo be mo’yu na ka, bongo na lepena a nakpe salala. 4’Beri ti katiyu kilo druga zazangu ku kuzene na lepena, ’bo ko ayeŋundra beti opuo. 5’Bo malaikatalo druga takindra wate kine adi, “Ku kukuzeta, igbonaga na adeni adi ta ga’yu Yesu lo ’beko i kedini mugulo. 6Lepe nide ’bayi, igbonaga lepe aŋiyoro azo beti naga ma lepe kuliani ina. Pondrita ku meteta piri naga ma lepe kazu topirikinina. 7’Bo utita wulewule ku trukokita lotodiniki ti lepe kilo adi lepe aŋiye i dridriŋi na ŋutulu laga atatuwa kilo, ’bo lepe ma lu utu Galili yu kasu koŋo yu. ’Bo ta imemedra lepe yu de. ’Bo boŋeta, na atrukokindro ta azo.” 8Wuleŋa gele ko druga ŋiŋiyoro i gulo yu ku kuzena ku nyola koru itro, ko druga wo i trukokindro na lotodiniki ti lepe kilo. 9’Bo Yesu amomora ku ko, druga romu adi‚ “Koŋo nasuna.” Ko druga pondra, druga moga mukuzi ti lepe kilo i teminizo na lepe. 10Yesu druga takindra ko adi, “Ku kukuzeta, utita ku trukokita luŋaseri kuwe kilo ti ko uti Galili yu. ’Bo ko imemedra na yu de.” 11Kasiko ituni, katiyu ku’de kilo druga lubo kezi yu, druga trukokindro ka’i’ila drumala kilo kuliata giri na kondra ’beri kine. 12Kugbo ko laga atunundra ’beri ku temezi kilo i tomodya na kutuzi‚ ko druga tikindra katiyu ŋani kilo riye‚ 13druga kulia adi‚ “Trukokita ŋutulu kilo adi lotodiniki ti lepe kilo ayeŋundra kuwaze‚ akokoladru lepe ti ta kilo tototo. 14Kugbo kine kulia de naga ayeŋadru ku lo’bizolo i suwo yu‚ yi izuzu zuzu lepe i toruzo na ta.” 15Kuwade ko druga ’depadru riye ŋa ni kine, druga kondra beti naga ma ŋutulu kilo zuzuzi ko ina‚ kuwade ina kuu de akuwe ku Yahudi kilo i dridriŋi yu yeŋundra tozo indikini. 16Nyenaga lotodiniki laga mere gele koyita gele kilo druga utu Galili yu i mere laga ma Yesu takindri ko kukuzu lu. 17Kugbo ko laga amedra lepe‚ ko druga ruguŋo ka i teminizo na lepe‚ ’bo ku’de kilo gbo ku teiliko mure. 18’Bo Yesu druga mizu nyoga druga takindra ko adi‚ “Teriŋi giri naga i ’diko yu ina ku naga nide i kani ina atiki na. 19Kuwade utita‚ lopuketa zuro kilo giri a lotodiniki kuwe‚ i tikindra na ko baputizilo i kari ti Monyelo‚ ku ti Ŋirolo‚ ku ti Yuka Nakiyena kine‚ 20i togo’yu na ko i kondra na kukuzuki giri naga ma na takindri ta kine. ’Bo meteta‚ na igbo’da kasi ta mu luŋa yeŋadru tozo i ’dute na baŋe nu.”

will be added

X\