MATAYO 26

1Kugbo Yesu laga alenga kine kuliata de giri‚ lepe druga takindra lotodiniki kanye kilo adi‚ 2“Ta ade‚ i bo na luŋa mure‚ kolo druma na soponi Rosetona igbogbo’da, Ŋiro lo ŋutulo ititiki i ’beko i kedini laga a larelo i mugu.” 3I bo ŋanina ka’i’ila drumala kilo ku temezi ti ŋutulu kilo druga tunundra ’beri ku ka’i’ilani laga a leŋgbere laga Kayafa i ’bani‚ 4ko druga tomodya kutuzi kugele i moga na Yesu ku toŋulupa i tatuza na lepe. 5’Bo ko akulia adi‚ “Ka’bi ku gbogbo’da i luŋa lo kolo drumalo ŋutulu kilo ka’bi ku reresatu.” 6Kugbo Yesu laga asaka Betania yu‚ ku Simona laga ku rimalo i ’ba yu‚ 7noka ne’de druga pondra ku lepeni ku wele na ŋmwa sisisi naga ku gbore naga ki koruna i ŋese lokpe‚ druga ’bugo wele ŋanina ku Yesu i kuweni ti lepe agbi’diki i mesa kutu. 8’Bo kugbo lotodiniki kilo laga amedra kulia ŋani kine‚ ko druga ŋoŋomatu ŋoŋomatu, druga piza adi‚ “Ina wele de kokoreyi de gbandra ya? 9’Bo ina wele de roromoki togboro ku silingi rodri na tiki lemerika.” 10’Bo Yesu adeni kine kulia de druga teyitokindro ko adi‚ “Ta sasandru nokana gbandra ya? ’Bo lepe akondra na ku ’bu’busi. 11Lemerika kilo gbo kasi ta mu luŋa, ’bo laga na‚ na ani gbo’da kasi ta mu luŋa. 12Ma lepe ’bugi ina wele de kuwe kinina‚ lepe kpeza nuka na inukani nana. 13Na takindra ta a ’diri, mu pirito na trukozini ina kuu na’buna de i kanina, ŋo laga ma nokana kondrilo itrutrukozi itro ma ramani kulia ti lepe kine.” 14I bo ŋanina le’de ŋutu i dridriŋi na ŋutulu laga mere gele ku konye mure kilo‚ laga lo luŋu a Yuda lo Kariotalo‚ druga utu ku ka’i’ila drumala kilo yu‚ 15druga piza ko adi‚ “Kugbo na tikindra lepe kasu kenini‚ ta itikindra na inyo ya?” Ko druga kenakindra lepe silingi meria musala druga tikindra lepe. 16Ŋiyu i lu luŋa de lepe druga ga’yu kiko lo nyokini Yesu mundrara. 17I luŋa laga a kayo lo nyeini mugati naga ’ba kape kinelo‚ lotodiniki kilo ayeŋundra ku Yesuni‚ druga piza lepe adi‚ “Do nyadru ti yi ku kukune Rosetona mo do ku nyosu yeda ya?” 18Lepe druga teyitokindro ko adi‚ “Lubita kezi ku ŋo yu‚ ’bo takita lepe adi‚ ‘Katogoloni akulia adi‚ Luŋa liolo gbo’di nyogoŋa. Na inyosu Rosetona konu kadi yu kugele kasi lotodiniki kuwe kilo.’ ” 19Lotodiniki kilo druga kondra beti naga ma Yesu takindri sena‚ ko druga kukundra Rosetona. 20Ku gbo’dini kotriana, lepe agbi’diki i mesa kutu yu ku lotodiniki mere gele konye mure kilo. 21Ku ko inyosuni lepe druga takindra ko adi‚ “Na takindra ta a ’diri‚ le’de ŋutu kasu dridriŋini inyokindro na mundrara.” 22Ko druga saka ku luŋuli koru‚ druga poki i pipiza na lepe gele gele adi‚ “Mata‚ ilo na ya?” 23Lepe druga teyitokindro ko adi‚ “Ŋutu lo sukindro keni lonye i ta’bu kata seku nalo‚ nyelo inyokindro na mundrarana. 24Ŋiro lo ŋutulo ilo tu i kikoni beti naga ma wurokini lepena‚ ’bo dreliana ina i ŋutu laga lo nyokindro Ŋiro lo ŋutulo mundraralo! Kazu kodro kugbo ŋutu ŋanilo laga aku yuŋe a na’bu.” 25Yuda laga lo nyokindro lepe mundraralo druga piza adi‚ “Katogoloni‚ ilo na ya?” Yesu druga teyitokindro lepe adi‚ “Do akulia ’do.” 26Ku ko inyosuni, Yesu a’dumundra mugati‚ ’bo ku lepe laga a’boriza lepe‚ lepe druga gbegbenyeza katana‚ druga tikindra lotodiniki kilo‚ druga kulia adi‚ “ ’Dumarata, nyosunita, ina de a mugu nio.” 27Lepe druga ’dumundra drikerina‚ ’bo ku lepe laga atikindra iyetelo, druga tikindra ko‚ druga kulia adi‚ “Ta giri mozinita. 28’Bo kine de a rima kuwe ti tomore na wonu ku ŋutulu rodri kine ma torozi kine ’di’diya. 29Na takindra ta‚ na aka mozu kine suwe ti konye ti zabibu de ’doni yeŋadru tozo i naga ma yi ku mozini a naluduko kasi ta kugele i tumata na Monye liona kata yu nu.” 30Ku ko laga awe’yu wirilo‚ ko druga lupodru, druga utu i mere laga Oliva yu. 31Yesu druga takindra ko adi‚ “Ta giri ibabayi i ina tukaze de ku kulia kuwe kine‚ igbonaga awuro adi‚ ‘Na igbugburu kayukunilo, ’bo mongoyo na kebilizi kine irereki,’ ina. 32’Bo i bo na ŋiye niona‚ na itutu kasu ŋero Galili yu.” 33Petero druga teyitokindro lepe adi‚ “Kugbo ko giri laga ibabayi ku kulia konu kine‚ laga na‚ na aka bayini.” 34Yesu druga teyitokindro lepe adi‚ “Na takindra do a ’diri‚ i ina tukaze de ti inga sukurilo aku sira‚ do irerenya na luŋa musala.” 35Petero druga teyitokindro lepe adi‚ “ ’Dia kodro ku yi tatuwa seku do kugele kpe‚ na aka renya doni.” Lotodiniki kilo giri druga kulia de itro. 36Yesu druga tu kasi ko i piri na luŋu a Getesemane nu. Lepe druga takindra lotodiniki kanye kilo adi‚ “Gbi’dikinita inide‚ ti inga na lu utu i magu na Ŋun.” 37Lepe druga zonga Petero ku ŋazi laga mure ti Zebedayo kilo‚ lepe druga poki i gbo’da ku luŋuli koru ku teili laga tomoni. 38Lepe druga takindra ko adi‚ “Teili liolo ilo gbo ku luŋuli koru be naga na itutuwana. Sakanita inide‚ gbo’dita ku konye ku na kugele.” 39Lepe druga utu ŋero yu ’baziŋa, druga mereke rupu ka, druga magu adi, “Monye lio, ku roromoki, ’dokoro ina drikeri na kulia na potroru ina de kuweni kaŋo. ’Bo ku kokonu kulia naga ma na lepe nyadrini kine, ti gbo’dini be naga mo do lepe nyadrinina.” 40Kugbo lepe laga apondra ku lotodiniki kiloni, lepe druga ku rumbi ko i toto, druga piza Petero adi, “Ta ani romoki gbo’da ku konye gboŋa ku na sawa gele ’du ya? 41Gbo’dita ku konye, magita magu, ka’bi ta ku lubo i luluka kata. Teililo gbo ku puso, ’bo muguna gbo ’ba teriŋi.” 42Lepe druga utu i luŋa laga a togi murelo ’do‚ druga magu adi, “Monye lio, kugbo ina drikeri de ani romoki ’dotozi tro ’baka na mozu nio na lepena‚ kulia konu kine ti gbo’dini.” 43Kugbo lepe laga apondra ’do‚ lepe druga ku rumbi ko i toto, igbonaga konye kasiko kilo gbo’di tomonina. 44Kuwade lepe druga kolokindro ko ’do‚ druga utu‚ druga magu i luŋa laga a togi musalalo‚ druga tazu kulia nagele kine. 45Lepe druga pondra ku lotodiniki kiloni‚ druga piza ko adi‚ “Ta itoto‚ ta iyuyuka ’duu ya? Boŋeta‚ luŋa ŋanilo gbo’di nyogoŋa, Ŋiro lo ŋutulo inyoki mundrara i kenisi ti katoronya kilo. 46Ŋineta‚ kita tu. Meteta‚ ŋutu lo nyokindro na mundraralo gbo’di nyogoŋa.” 47Kugbo lepe inga ilo kukulia, Yuda laga i dridriŋi na ŋutulu laga mere gele konye mure kilolo‚ druga yeyeŋundra kasi mongoyo na ŋutulu laga ku walia ti moro ku turia itro kilo‚ ti ko kulu ŋiyu ku ka’i’ila drumala kilo ku temezi ti ŋutulu kilo. 48Ti kanyoni lo mundraralo akpekindra ko kpiye adi‚ “Ŋutu laga ma na ku nyu’i gbangiri lo lepelolo ilo lepe‚ moketa nye.” 49Lepe druga pondra wuleŋa gele ku Yesuni‚ druga romu ku lepe adi‚ “Katogoloni, koŋona!” Lepe druga nyu’ya gbangiri lo lepelo. 50Yesu druga takindra lepe adi‚ “Wori lio‚ kone ŋo laga mo do pondrilo.” Ko druga pondra‚ druga sukindro kenisi kase ku Yesu kini i moga na lepe. 51’Bo le’de ŋutu i ŋutu laga kugele kasi Yesu i dridriŋini kilo druga riodru keni lonye‚ i’dutundro na wale lonye lo morolo‚ druga deba upiye lo ka’i’ilani laga a leŋgberelo‚ adepu suweta lo lepelo ka. 52Yesu druga takindra lepe adi‚ “Teyitoro wale lolulo bo kanye piri yu‚ igbonaga ŋutulu giri lo ’dumundra walia kilo itatuwa ku walia kilo ina. 53Do rambu adi na kedri kodro ani romoki magu Monye lio‚ adi ti ku ’bunyeki na‚ lepe kedri kodro aka sunyukindro na tinaŋade mongoyo ti kamoro ti malaika alangu mere gele konye mureni ya? 54’Bo kulia na wuwuro na kulia adi kine kulia de ti gbo’dini de kine ma torumoki adidinyo ya?” 55I lu so de Yesu druga piza mongoyo kilo adi‚ “Ta lupundro beti ŋona ku moga kolani, ku walia ti moro, ku turia itro i moga na na ya? Mu kolozi na asaka kasi ta i kadi na Ŋun ina kata yu i togo’yu, ta aku moga na. 56’Bo kine kulia de ayeŋundra giri adi ti kulia na wuwuro ti kakeyo kilo kine torumokini.” Lotodiniki kilo giri druga kokoloki lepe‚ druga wowoke. 57Ŋutulu lo moga Yesu kilo druga zonga lepe ku Kayafa laga a ka’i’ilani laga a leŋgberelo yu, katogolo ti kukuzuna kilo ku temezi kilo ti atundra ’beri azo. 58’Bo Petero akepodru bo na lepena pazo pazo, yeŋadru tozo i rii na ka’i’ilani laga a leŋgberelona, lepe druga lubo kata yu, druga saka kugele ku katiyu kilo, i medra na ’dute na kine kulia de. 59Kuwade ka’i’ila drumala kilo ku kayolo ti kuliata kilo giri aga’yu bo na kulia naga ma ŋutulu ’dodri a ti to’bure ku Yesu i muguni kine, ma ko ku tatuzi lepe, 60’bo ko aku rio, ’dia kodro ku ŋutulu rodri ayeŋundra laga lo ’dodru bo na kulia ti lepe kine ku to’bure kpe. I bo ŋanina ŋutulu mure druga yeŋundra, 61ko druga kulia adi, “Ilo ŋutu de akulia adi, ‘Na iroromoki randru kadi na Ŋun ina kaŋo, na i’du’du lepe i bo na luŋazi musala.’ ” 62Ka’i’ilani laga a leŋgberelo druga ŋi ki, i piza na Yesu adi‚ “Do ani teyitokindro kulia ya? Kulia naga ma kilo ŋutulu de ’dodri konu muguni kine a ti to’diri ya?” 63’Bo Yesu druga yiŋa tali. Ka’i’ilani laga a leŋgberelo druga takindra lepe adi‚ “Na takindra do i nyosu na milio ku kari ti Ŋun laga zorulo‚ trukoki yi kugbo do a Kristo‚ Ŋiro lo Ŋun ilo ya.” 64Yesu druga teyitokindro lepe adi‚ “Do akulia ’do‚ ’bo na takindra do‚ ŋiyoro tinade‚ do imemedra Ŋiro lo ŋutulo i gbi’diki i keni lo lutate lo Monye Teriŋilo i pondra i ’dikolo ti ’diko kine kini.” 65Ka’i’ilani laga a leŋgberelo druga kendra bongo nanyena‚ druga kulia adi‚ “Lepe amomorozu Ŋun. Yi nyadru ku’de ka’doto ti bo na kuliana a ti nyo? Tinade ta ayinga momorozu na lepena azo. 66Ta rambu adinyo ya?” Ko druga teyitokindro adi‚ “Lepe roromoki a lo tutuwa.” 67Ko druga yagu kamula ku Yesu i konye yu‚ druga gbudro lepe. Ku’de kilo ananaŋazu lepe, 68druga kulia adi, “Do Kristo, trukoki yi ŋutulo a ŋa lo gbudro dolo?” 69Nyenaga Petero agbi’diki kaŋo yu, i rii yu‚ ’bo upiye ne’de druga pondra ku lepeni, druga kulia adi, “Do itro asaka kasi Yesu lo Galililo kugele.” 70’Bo lepe arenya kine kulia de kasiko i koŋo yu giri adi, “Na aku de kulia naga mo do tazini kine.” 71Ku lepe laga alupodru i bu yu, upiye ne’de druga medra lepe, druga takindra ŋutulu laga yu de kilo adi, “Ilo ŋutu de asaka kasi Yesu lo Nazaretalo kugele.” 72Lepe arenya kine kulia de ’do, druga nyosu milio adi, “Na aku de ŋutu ŋanilo tro.” 73I bo na baŋe a naŋutru ŋutulu laga yu de kilo druga pondra, druga takindra Petero adi, “A ’diri do itro a ŋutu lasiko, igbonaga kulie lolulo nyelo kpeza do ina.” 74Lepe druga poki i kongu na mugu i nyosu na milio adi, “Na aku de ŋutu ŋanilo tro.” Wuleŋa gele sukurilo druga sisira. 75Petero druga rambu kulia na ta Yesu kazu kanyeni kine adi‚ “Ti inga sukurilo aku sira‚ do irerenya na luŋa musala.” Lepe druga lupodru‚ druga poki i gbiye koru.

will be added

X\