MATAYO 21

1Ku ko laga ayenga Yerusalema yu nyogoŋa, ko druga yenga Betefage naga i mere laga Oliva i muko yuna‚ ’bo Yesu druga sonyodru lotodiniki kanye kilo mure‚ 2druga takindra ko adi‚ “Utita i ’beŋi laga kasu koŋo kulu de‚ ta irumbi drongi naga amunuki seku tore lonyelo. Yukuwuta ko‚ zikuta ko weni. 3Ku le’de ŋutu laga lo takindra ta ku’de kulia‚ ta ikulia adi‚ ‘Matalo lo nyadru ko.’ Wuleŋa gele lepe isunyundro ko.” 4Kine kulia de ayeŋundra i torumokindro na kulia na ta kakeyoni kine adi‚ 5“Takita kezi na Zionana adi‚ ‘Meteta, Mata lasulo ilo popoo kasuni‚ lepe a mukulia‚ akiza i drongi kini‚ i tore lo drongi kini.’ ” 6Lotodiniki kilo druga tutu‚ ’bo ko akondra beti naga ma Yesu takindri kona‚ 7ko druga zikundro drongina ku tore lo lepelo‚ ko druga pedra bongola kasiko kine kini‚ Yesu druga kiza kini. 8I dridriŋi na mongoyo na ŋutulu kilo‚ rodri kilo apedra bongola kase kine i kikoni. ’Bo ku’de kilo a’dengu keniya ti kade kine‚ druga pedra ko i kikoni itro. 9Ŋutulu laga lo tu ŋero yu kilo ku laga lo kepodru boni kilo druga laiza adi‚ “Hosana ku Ŋiro lo Dawidilo! Ŋutu lo pondra ku kari ti Mata kine ilo ti purani pura! Hosana i piri naga ki yuna.” 10Ku Yesu laga alubo Yerusalema yu‚ ŋutulu giri laga kezi yu kilo druga zazangu, druga piza adi‚ “Ilo ŋa ya?” 11Mongoyo ti ŋutulu kilo druga kulia adi‚ “Ilo de a kakeyoni laga Yesu‚ lo ŋiyu Nazareta, naga Galili yunalo.” 12Ku Yesu laga alubo i kadi na Ŋun ina kata yu druga rikodru ŋutulu laga lo togbodru ku lo gbodru kapazi kadi yu kilo giri‚ lepe druga dudukuza mesala ti ŋutulu lo togboza sente kilo ku si’deta ti ŋutulu lo togbodru a’bugo kine ka. 13Lepe druga takindra ko adi, “Awuro adi‚ ‘Kadi niona iluŋu a kadi naga a maketa‚’ ’bo ta alopugo lepe a kugi na kariaka.” 14Nyenaga ŋutulu laga ku konye a mudumudu kilo ku ko laga ku mukuzi laga ababatratu kilo ayeŋundra ku lepeni i kadi na Ŋun ina katani‚ lepe druga toruzo ko. 15’Bo kugbo ka’i’ila drumala kilo ku katogolo ti kukuzuna kilo laga amedra wonyesi laga ma lepe kondri kilo‚ ku ŋazi laga lo laiza i kadi na Ŋun ina kata yu adi‚ “Hosana ku Ŋiro lo Dawidilo!” kilo, ko druga ŋoŋomatu. 16Ko druga piza adi‚ “Do ayi kulia naga ma kilo ko de kuliani kine ya?” Yesu druga teyitokindro ko adi‚ “Iye‚ na ayi. Ta aku kendra adi, ‘Ku ŋazi lo’di’diki ku ludriko lo nogu kinatazi kilo i kutuni do atolupundro pudya naga sosona’ de‚ ya?” 17Lepe druga kolokindro ko druga lupodru kezini‚ druga utu Betania yu‚ druga ku toto yu de. 18Ku gbo’dini kutumaluna i yitozi na Yesu bo kezi yu‚ lepe druga tika ku mago. 19Ku lepe laga amedra koligi i kiko kutuni‚ lepe autu i muko yu‚ ’bo aku rumbi le’de ŋo i muguni‚ ŋo kine a koropo kine ka’delo. Lepe druga kulia ku koligilo adi‚ “Ku rarada konye boni ’do ’do!” Koligilo druga tetio wuleŋa gele. 20Kugbo lotodiniki kilo laga amedra kine kulia de‚ ko druga rambu ’beri koru‚ akulia adi‚ “Koligilo tetio wuleŋa gele de adidinyo?” 21Yesu druga teyitokindro ko adi‚ “Na takindra ta a ’diri‚ kugbo ta gbo ku rugo‚ kugbo teiliko kasu kilo ani yoyongu‚ ta aka kondra kone laga ma kondri mugu ku koligilo i mugulo de ka’deloni, ’bo ku ta ’dibani takindra ilo mere de adi‚ ‘ ’Dotoro mugu‚ gupara mugu suburi kata yu‚’ kulia ŋani kine ikokonu ’beri de. 22Kulia giri naga ma ta magini kine ku gbo adinyo kpe‚ ku ta laga gbo ku rugo‚ ta iririo kulia ŋani kine.” 23Kugbo Yesu laga alubo i kadi na Ŋun ina kata yu‚ ka’i’ila drumala kilo ku temezi ti ŋutulu kilo ayeŋundra ku lepeni inga ti lepe ilo totogo’yu, druga piza adi‚ “Do kondra kine kulia de ku teriŋi naga ya? Ŋa lo tikindra do ina teriŋi de?” 24Yesu druga teyitokindro ko adi‚ “Na ilo ’do ipiza ta ku piye. Kugbo ta ateyitokindro na‚ na itatakindra ta adi na kondra kine kulia de ku teriŋi niŋa ina. 25Baputizi lo tiki Yoanelo lu ŋiyu yeda ya? I ’diko yu‚ kugbo ku ŋutulu kiloni ya?” Ko druga pipiza ’beri kase dridriŋini, druga kulia adi‚ “Kugbo yi kulia adi‚ ‘Ŋiyu i ’diko yu’, lepe ipiza yi adi, ‘Kuwade ta aku rugo lepe gbandra ya?’ 26Kugbo yi kulia adi, ‘Ŋiyu ku ŋutulu,’ yi kuze mongoyo kilo‚ igbonaga ko giri arugo adi Yoane a kakeyonina.” 27Kuwade ko druga teyitokindro Yesu adi‚ “Yi aku deni.” Lepe druga teyitokindro ko adi‚ “Kuwade na aka trukokindro ta teriŋi naga ma na kondri kine kulia de inani. 28“Ta rambu adinyo ya? Le’de ŋutu kazu gbo ku ŋazi mure. ’Bo lepe autu ku ŋiro laga a kayolo yu‚ druga takindra lepe adi‚ ‘Ŋirolo‚ uti ku kone kita kuwe melesi yu.’ 29Ŋirolo druga teyitokindro monye adi‚ ‘Na a’biye‚’ ’bo i bo ŋanina lepe druga lopugo teili‚ druga utu. 30Monyelo druga utu ku ŋiro lo bolo yu‚ druga kulia drodrogele. Ŋirolo druga takindra lepe adi‚ ‘A na’bu‚ Amonye‚’ ’bo lepe aku utu. 31Ŋa laga i ŋazi laga mure kilo de akondra beti naga ma monye lonyelo nyadrinina?” Ko akulia adi, “Ilo laga a kayolo.” Yesu druga kulia ku ko adi, “Na takindra ta a ’diri‚ kawuro ti mosoro kilo ku wate ti towute kine ko kilo ilubo a nze ku ta i tumata na Ŋun ina kata yu. 32’Bo Yoane apondra kasuni i kpekindra na ta kiko lo logbiye lo’bulo‚ ’bo ta aku rugo lepe‚ ’bo kawuro ti mosoro kilo ku wate ti towute kine arugo lepe. Ku ta laga amedra kine kulia de kpe‚ ta aku lopugo teiliko i bo ŋanina i rugo na lepe. 33“Yiŋeta kulia na guguma ku’de. Monye’ba le’de kazu a’udru zabibu kanye melesi kata‚ a’begu mari i nyogani, a’boga drili na liyani suwe ti konye ti zabibu kine‚ a’dugo morogo‚ druga kolokindro melesi nanyena ku katiyu kiloni ti lepe lu utu i ne’de ka. 34Kugbo luŋa lo trorani konyelo laga ayeŋundra nyogoŋa, lepe druga sonyodru upi kanye kilo ku katiyu ŋani kilo yu i zondra na konye ŋani kilo. 35Katiyu kilo druga momoga upi ti lepe kilo‚ druga kidro le’delo, arembu le’delo, abibiringo le’delo ku ŋoropo. 36Lepe druga sonyodru upi ku’de ’do laga rodri arodru laga a kayo kilo. Katiyu kilo druga kondra ko drodrogele. 37I bo ŋanina‚ lepe druga sonyodru ŋiro lonye lepelo kasiko yu‚ druga kulia adi‚ ‘Ko isosobu ŋiro liolo.’ 38’Bo kugbo katiyu kilo laga abonga ŋirolo‚ ko druga kulia kase dridriŋini adi, ‘Ilo de nye laga a kalumelo‚ ti yi reme lepe kaŋo‚ ma yi ninundra luma ti lepe kilo.’ 39Ko druga moga lepe‚ druga rikodru lepe kaŋo i melesi katani‚ druga reremi lepe. 40Kuwade kugbo monye melesilo laga ayeŋundra, lepe ikondra inyo ku katiyu ŋani kilo ya?” 41Ko druga teyitokindro lepe adi‚ “Lepe itutukaraki ŋutu loro kulu de kaŋo‚ ’bo lepe ikolokindro melesina i ku’de katiyu laga lo itikindra lepe nyomo kilo mu za’beki kiloni.” 42Yesu druga piza ko adi‚ “Ta aku kendra i kulia na wuwuro kine adi‚ ‘Ŋurupi laga ma ka’duko kilo redrilo, ayeŋundra a ŋurupi laga a druma lo goŋe lo kadilo. Matalo lo kondra ilo kone de‚ laga kaya konyeni a kulia ti rame na ’beri de‚ ya?’ 43Kuwade na takindra ta‚ tumata na Ŋun ina i’du’dumazi kasuni‚ ititiki le’de zuru‚ laga lo rada konye iloni. 44Ŋutu lo ’duki i ilo ŋurupi de kinilo i’be’beleŋo toŋ toŋ. ’Bo ku lepe lo ’duki i le’de ŋutu ki‚ lepe iŋiŋinyi lepe munyumunyu.]” 45Kugbo ka’i’ila drumala kilo ku Farisayo kilo laga ayinga kulia na guguma ti lepe kine‚ ko adeni adi lepe gumba kulia ŋani kine kase mugu. 46’Bo kugbo ko aga’yu moga lepe‚ ko akuze mongoyo ti ŋutulu kilo‚ igbonaga ko arugo lepe a kakeyoni ina.

will be added

X\