MATAYO 20

1“Tumata na ’dikona gbo be monye’ba laga lo lupodru kutumalu ’bero i luluŋudru na kakita lo ku lubo kanye melesi na zabibuna yu kilo. 2Kugbo ko laga akukundra kulia kasi kakita kilo adi irumbi silingita gele i luŋa gele, lepe druga sonyodru ko kanye melesi yu. 3Kugbo lepe laga alupodru kaŋo yu i ’dipundro na kolo, lepe druga medra ku’de ti kulu aliliratu a ’busa i piri na togboreni kapazi nu. 4Lepe druga kulia ku ko adi, ‘Utita melesi yu itro, na iroroba ta ku rope laga soso.’ Kuwade ko autu. 5Lepe druga lupodru tupara kide inide ’do, ku kulu’balaŋa itro, ’bo lepe druga kondra be naga a kayona. 6Ku gbo’dini kotriana‚ lepe alupodru, druga rumbi ku’de ti aliliratu a ’busa. Lepe druga piza ko adi, ‘Ta liliratu inide a ’busa paratra de gbandra ya?’ 7Ko druga teyitokindro lepe adi, ‘Igbonaga le’de ŋutu aku lungu yina.’ Lepe druga takindra ko adi, ‘Utita melesi yu itro.’ 8Ku gbo’dini kuwazeni monye melesi na zabibulo druga takindra ka’dolani lonye lo kitalo adi, ‘Luŋe kakita kilo. Tiki ko ropeta kasiko kilo suluki ku ŋutulu ti bo kilo yeŋadru ku ŋutulu laga a kayo kilo.’ 9Kugbo ŋutulu laga lo lubo kotria kilo laga apondra‚ ko gele gele arumbi silingita gele gele. 10Kugbo ko laga a kayo kilo laga apondra ko druga rambu adi se iririondru alangu‚ ’bo ko gele gele arumbi silingita gele gele itro. 11Kugbo ko laga arumbi de‚ ko druga ngunguruto ngunguruto ku monye’balo, 12ko druga kulia adi‚ ‘Ŋutulu ti bo laga kilo de akondra kitana ku sawa gele ’du‚ ’bo do akondra ko be yi laga asasandru ’beri paratra ku kitazi naga a riŋi koru kine‚ laga asala ku kolo koru kilo.’ 13Lepe druga teyitokindro ŋutu gele kasiko i dridriŋini adi‚ ‘Wori lio‚ na aku kondra do a loro. Do aku kukundra kulia seku na i rumbi na silingita gele ya? 14’Dumara rope lolulo‚ utini. Na nyadru tikindra ŋutu lo bolo be naga ma na tikindri dona. 15Na ani romoki kondra beti naga ma na nyadrinina ku ŋo laga a liolo ya? Kuwa do somuko konye ku kone lio lo’bulo ya?’ 16Kuwade ŋutu ti bo kilo se lo igbo’da a ti ŋero‚ ’bo ti ŋero kilo igbo’da a ti bo.” 17Kugbo Yesu laga lu utu Yerusalema yu‚ lepe druga luŋudru lotodiniki laga mere gele konye mure kilo i merete‚ druga takindra ko adi‚ 18“Meteta, yi kilo utu Yerusalema yu. Ŋiro lo ŋutulo ititiki ku ka’i’ila laga drumala ku katogolo ti kukuzuna kilo, ko iŋerakindra lepe tuwa, 19ko itikindra lepe ku Monyazi kilo‚ ko i’dadru lepe, ko ikpindra lepe, ko i’begu lepe i kedini mugu. ’Bo i luŋa lo musala lu lepe itotoŋiye.” 20I bo ŋanina ŋote na ŋazi ti Zebedayo kilona druga pondra ku Yesuni ku ŋazi kanye kilo, druga ruguŋo ka ku lepe i koŋoni, druga magu le’de ŋo ku lepeni. 21Yesu druga piza lepe adi, “Do nyadru inyo ya?” Nokana druga teyitokindro lepe adi, “Taki kukuzu adi ŋazi kuwe laga mure kilo de ti ku gbi’dikini gelelo i keni lolu lo lutatelo yu, gelelo i keni lolu lo kaduŋelo, i tumata nonuna kata yu.” 22’Bo Yesu druga kulia adi, “Ta aku de kulia naga ma ta magini kine. Ta roromoki mozu i drikeri naga ma na ku mozini nu ya?” Ko druga teyitokindro lepe adi, “Yi iroromoki.” 23Lepe druga takindra ko adi‚ “Ta imomozu i drikeri naga ma na tu mozini nu kata yu, ’bo gbi’diki naga i keni lio lo lutatelo ku lo kaduŋelo ina ani gbo’da a kulia kuwe naga ma na ku tikindri kine‚ ’bo nu piri de a na ŋutulu laga ma Monye liolo kukunakindri ko kilo.” 24Kugbo ŋutulu laga mere gele kilo laga ayinga kine kulia de‚ ko druga ŋoŋoma ku luŋaseri laga mure kilo de. 25’Bo Yesu druga lungu ko kanyeni, druga takindra ko adi, “Ta adeni adi drumala ti Monyazi kilo bita gbo kasiko i koŋo yu a mataki‚ drumala kasiko kilo yakiza ko ku teriŋi. 26’Bo kasunina aka gbo’da deni, ’bo ŋutu laga lo nyadru gbo’da a druma kasu dridriŋinilo ti lepe gbo’dini a kalokoni lasu‚ 27’bo ŋutu laga lo nyadru gbo a kayo kasu dridriŋinilo ti lepe gbo’dini a upiye lasu. 28Kuwade Ŋiro lo ŋutulo agbo’da pondra i konaki na kitani‚ ’bo i konakindra na ŋutulu kita‚ i tikindra na ru nanyena i dakundra na ŋutulu rodri itro.” 29Kasiko i pilara naga Yeriko yuna‚ mongoyo na ŋutulu rodri akekepodru lepe. 30’Bo ŋutulu mure laga ku konye a mudumudu kilo ti agbi’diki i kiko kutu yu‚ ’bo kugbo ko laga ayinga adi Yesu lo rosodru‚ ko druga laiza adi‚ “Ŋiro lo Dawidilo, gbo’di ku ediyo ku yi po!” 31Mongoyona druga ringa ko‚ druga takindra ko adi ti ko yiŋani tali‚ ’bo ko druga laiza ’do ku teriŋi koru adi‚ “Mata‚ gbo’di ku ediyo ku yi‚ Ŋiro lo Dawidilo!” 32Yesu druga lira‚ druga lungu ko i piza na ko adi‚ “Ta nyadru ku na konaki ta inyo ya?” 33Ko druga teyitokindro lepe adi‚ “Mata‚ ti konye kaya kilo ŋayini ŋayi po!” 34Yesu druga ’bo’yu konye kasiko kilo ku teili lo ediyo‚ ko druga medra kana agbole‚ druga kekepodru lepe.

will be added

X\