MATAYO 18

1I nu baŋe de lotodiniki kilo apondra ku Yesuni‚ druga piza adi, “Ŋa laga a ŋutu druma koru i tumata na ’dikona ya?” 2Yesu druga lungu ludriŋa kanyeni‚ druga tolirikindra lepe i driŋi nasikona, 3druga kulia adi, “Na takindra ta a ’diri, kugbo ta aku lopugo ’beri i yeŋundra be ludriko, ta aka lubo i tumata na ’dikonani. 4Ku ŋutulo laga atoyongu mugu ’ba pudya na mugu be ilo ludriŋa de, ŋutu ŋanilo igbogbo’da a druma koru i tumata na ’dikona. 5“Ŋutu lo rukundro ludriŋa le’de be ilo de ku kari kuwe kinelo, ŋolo rukundro na. 6’Bo ŋutu lo tikindra ludriŋa le’de gele i dridriŋi na ŋazi lo’di’diki lo rugo na kilo de i bayilo, kedri kodro a na’bu kugbo kizo naga a ziyena munuki ku lepe i muruni, ma lepe ’diroro i ko’bulu na suburina kata yu. 7“Dreliana ina a na ina ka de ku kulia ti ŋo laga lo tikindra ŋutulu kilo i ’bayilo! ’Bo ŋo laga lo tikindra ŋutulu kilo i bayilo ani zara i yeŋundra‚ ’bo dreliana ina a na ŋutu lo zondra ŋo ŋani ilo! 8Kuwade keni lolulo kugbo moko lolulo laga lo tikindra do i bayi‚ ’duŋoro lepe‚ gupara kaŋo. Troru lubo nonu i yeŋo kata yu ku keni laga a trutru‚ kugbo ku moko laga a trutru alangu naga mo do biriŋozini ku kenisi mure kugbo ku mukuzi mure i kima naga ani lengana kata yu. 9Kugbo koyita lolulo lo tikindra do i bayi‚ ku’dutu lepe‚ gupara kaŋo. Troru lubo nonu i yeŋo kata yu ku koyita gele, alangu naga mo do biriŋozini ku konye mure i kima naga a noketa nu kata yu. 10“Gbo’dita ku konye ka’bi ta ku ’dadru ludriŋa gele i dridriŋi na ŋazi lo’di’diki kilo de. ’Bo na takindra ta‚ yu de i ’diko yu malaika kasiko kilo ko kulu bobonga koŋo na Monye lio laga i ’diko yulo. 11’Bo Ŋiro lo ŋutulo apondra i ritundro na ŋo laga alikilo.] 12Ta rambu adinyo ya? Kugbo le’de ŋutu gbo ku kebilizi kama gele‚ kuwa ne’de aliki gele‚ lepe ani kolokindro meria buŋa konye buŋa kine i meria ki yu i galadru na ina naga alikina ya? 13Kugbo lepe laga ario lepe‚ na takindra ta a ’diri, lepe gbo ku nyola koru ku lepe, alangu meria buŋa konye buŋa naga aku liki kine. 14Kuwade Monye lasu laga i ’diko yulo ani nyadru ti ludriŋa gele i dridriŋi na ŋazi lo’di’diki kilo de ti karakini kaŋo. 15“Kugbo luŋosu laga akondra do a loro‚ uti ku taki lepe toro na lepena ta mure ’du. Kugbo lepe laga ayinga do‚ ta amora seku luŋosu azo. 16’Bo kugbo lepe aku yinga do‚ zoŋe ŋutu gele‚ kugbo mure kasi do kugele‚ ma kulia giri ti lirani ku kulia naga ma ka’doto mure kugbo musala ma ’dodri kine. 17Kugbo lepe a’biye ku yinga na ko‚ taki tomore na karuko kilo kulia ŋani kine. Kugbo lepe a’biye ku yinga na tomore na karuko kilo itro‚ ti lepe gbo’dini be Monyatio‚ kugbo be kawuroni lo mosoro konu konyeni. 18Na takindra ta a ’diri‚ ŋo giri laga ma ta todyi i kani kilo itotora i ’diko yu ’do‚ ’bo ŋo giri laga ma ta lagi i kani kilo ilalaka i ’diko yu ’do. 19Na takindra ta ’do‚ ku ŋutulu mure kasu dridriŋini gbo ku teili gele ku kulia ti ŋo laga ma ko magini ilo‚ Monye lio laga i ’diko yulo ikokondra ŋo ŋanilo kasikoni. 20Kugbo ŋutulu mure kugbo musala apependra ’beri ku kari kuwe kine‚ na lu kasiko i dridriŋi yu.” 21Ku Petero laga apondra ku Yesuni‚ druga piza lepe adi, “Mata, luŋase liolo ikondra na a loro luŋa muda, ma na bulo ku ’diza toro na lepena ya? Luŋa burio ya?” 22Yesu druga teyitokindro lepe adi, “Na agbo’da takindra do adi luŋa burioni, ’bo meria burio luŋa burio. 23“Kuwade tumata na ’dikona gbo be mata laga lo nyadru kendra kulia i dendra na moriye naga ma lopuno kanye kilo nyosuni kanyeni kine. 24Kugbo lepe laga apoki i kendra, ko druga zondra le’de ŋutu ku lepeni, mori na lepena a silingi milioni milioni. 25Igbonaga lepe aku romoki robana‚ mata lo lepelo atakindra kukuzu ti lepe togboreni, ku noka na lepena, ku ŋazi ti lepe kilo, ku kapa ti lepe kilo giri, i roba na morina. 26Kuwade lopunonilo druga mereke ka ku lepe i koŋoni, druga ma’yu mugu ku lepe, akulia adi, ‘Mata, gbo’di ku teili lo mada ku na, na iroroba kapa kilo giri.’ 27Mata lo lopunoni ŋanilo druga gbo ku ediyo ku lepeni, druga lakadru lepe, a’diza mori ŋanina. 28Kugbo lopunoni ŋanilo laga alupodru kaŋo, lepe druga momora ku lopunoni le’de laga lo kita seku nye lo nyosu mori na silingi kama gele kanyeni, druga moga lepe, a’deba lepe i muruni, druga kulia adi, ‘Rope mori niona.’ 29Kuwade ŋutu ŋanilo druga mereke kani, druga ma’yu mugu ku lepe adi, ‘Gbo’di ku teili lo mada ku na, na iroroba kapa kilo giri.’ 30’Bo lepe a’biye druga lupodru i toradru lepe i kadi naga a drodrorena kata yu yeŋadru tozo i luŋa lo robi lepe morina lu. 31Kugbo upi ku’de laga lo kondra kita kasi lepe kilo laga abonga kulia naga na kondra ’beri kine de, ko druga gbo ku luŋuli koru, ko druga pondra ku takindra mata laselo kulia giri naga na kondri ’beri kine. 32Mata lo lopunonilo druga lungu lepe, druga takindra lepe adi‚ ‘Do a lopunoni laga a loro! Na a’diza mori nonuna giri igbonaga do ama’yu mugu ku nana. 33Kedri kodro a na’bu ku do gbo ku ediyo ku lopunoni lo kita seku dolo beti naga ma na gbo’dini ku ediyo konunina.’ 34Kuwade mata lo lepelo aŋoma koru‚ druga tikindra lepe i kenisi ti ŋutu lu lo kondra lepe a loro kilo yeŋadru tozo i luŋa lo robi lepe mori ŋanina giri lu. 35Monye lio laga i ’diko yulo ikondra de ku ta giri gele gele‚ ku ta ani ’diza torozi ti luŋosuro kasu teilikoni.”

will be added

X\