MATAYO 16

1Nyenaga Farisayo kilo ku Sadukayo kilo apondra druga piza Yesu i kpekindra na se kpiye lo ŋiyu i ’diko yulo i modyu na lepe. 2’Bo lepe druga teyitokindro ko adi, “Kuwa kotriana ta kulia adi, ‘Kana igbo’da a na’bu, igbonaga ’dikona a natroru ina.’ 3Kugbo kutumaluni, ta kulia adi, ‘Indikinina konye ti ka kilo a loro, igbonaga ’dikona a natroru ku ’dikolo kine na.’ Ta roromoki tritrimba kulia ti konye ti ’dikona kilo de, ’bo ta ani romoki tritrimba kpiyeta ti baŋesi kine gbandra ya? 4Yuŋe naga a naro ’ba teiliko naga mŋgbana ga’yu kpiye, ’bo le’de kpiye aka tikini, kpiye laga lo Yonalo ’du nyelo igbo’da.” Kuwade lepe akolokindro ko, druga tutu. 5Kugbo lotodiniki kilo laga ayenga i lu lozo, ko aboŋoni zonga na nyosuto. 6Yesu druga takindra ko adi, “Gbo’dita ku konye, gbo’dita go ku kape ti Farisayo ku Sadukayo kilo.” 7Ko druga tataazu kulia kase dridriŋini adi, “Yi aku zondra nyosuto.” 8Yesu ku dendri kine kulia de, lepe druga piza ko adi, “Ta laga ku rugo naga a natrina, ta pipiza ’beri kasu dridriŋini adi ta gbo ’ba nyosuto de gbandra ya? 9Ta inga aku meri? Ta aku yo’yu ’diloto naga mukana ti ŋutulu alifu mukana kilo, ku nyakaleta muda laga ma ta tundri kilo ya? 10Kugbo ’diloto naga burio ti ŋutulu alifu iŋmani kilo, ku gobela muda laga ma ta tundri kilo ya? 11Ta aku deni adi na agbo’da takindra ta kulia ti nyosuni adidinyo ya? Gbo’dita go ku kape ti Farisayo ku Sadukayo kilo.” 12Ko druga dedeni adi lepe agbo’da trukokindro se i gbo’da go ku kulia ti kape ti mugatini, ’bo ku kulia ti togolesi ti Farisayo ku ti Sadukayo kilo. 13Kugbo Yesu laga ayenga i ka naga nyoga ku Kaisaria Filipo ina kata yu, lepe druga piza lotodiniki kanye kilo adi, “Ŋutulu kilo kulia adi Ŋiro lo ŋutulo a ŋa ya?” 14Ko druga teyitokindro lepe adi, “Ku’de kilo akulia adi do a Yoane lo tikindra baputizilo, ku’de kilo adi Eliya, ku’de kilo adi Yeremia kugbo le’de ŋutu i dridriŋi na kakeyo kilo.” 15Yesu druga piza ko adi, “Laga ta lepe, ta kulia adi na a ŋa ya?” 16Simona Petero druga teyitokindro lepe adi, “Do a Kristo laga a Ŋiro lo Ŋun laga zorulo.” 17Yesu druga teyitokindro lepe adi, “Simona, ŋiro lo Yonalo, koŋo nonuna a na’bu! Agbo’da ŋutulu ti mugu na rima lo kpekindra do kine kulia deni, ŋolo a Monye lio laga i ’diko yulo. 18’Bo na takindra do, do laga Petero, (trugo adi, lele) ’bo i ilo lele de kini na i’dugo tomore na karuko kuwe kilo, ’dibani kodro teriŋi na tuwana kpe aka tiga tomore ŋaninani. 19Na ititikindra do ŋayeta ti tumata na ’dikona. Ŋo laga mo do todyi i kani kilo itotora i ’diko yu itro, ’bo ŋo laga mo do lagi i kani kilo ilalaka i ’diko yu itro.” 20Lepe druga kukuzu lotodiniki kilo ku teriŋi ka’bi ko ku trutrukoki le’de ŋutu adi nye a Kristo. 21I bo na luŋa ŋanilo Yesu apoki i kpekindra na lotodiniki kanye kilo adi nyadru ti nye utini Yerusalema yu i sasanya ku kuliata rodri ku temezi kilo yu, ku ka’i’ila drumala kilo ku katogolo ti kukuzuna kilo, adi ko irerembu nye, ’bo nye itotoŋiye i luŋa lo musala lu. 22Druga Petero zonga lepe i merete, druga poki i ringa na lepe, akulia adi, “ ’Bayi, Mata! Kine kulia de ka’bi ku kokonu ’beri de konu muguni tro!” 23’Bo Yesu alopuke, druga takindra Petero adi, “Uti kuwe ki’di yu Satani! Do a kumu lo pupugo na. Do ilo ani yo’yu kulia ti Ŋun kine, do lo yo’yu kulia ti ŋutulu.” 24Yesu druga takindra lotodiniki kanye kilo adi, “Kugbo le’de ŋutu lo nyadru kipundro bo niona, ti lepe pane mugu kaŋo, ti lepe ’dukundri kedini lonye laga a larelo, ku keporo na. 25Kugbo ŋutu lo nyadru ritundro ru nanyenalo, lepe iteteliki ru nanyena. ’Bo ŋutu laga lo telikindro ru nanyena ku kulia kuwe kine ilo‚ lepe iririo ru nanyena. 26’Bo kugbo ŋutu laga atundra kapazi ti ina ka de kilo giri, ti lepe ilo tukarakindra ru nanyena kaŋo, kilo kapazi de ilogu lepe adidinyo ya? ’Bo ŋutulo itogboza ru nanyena ku inyo ya? 27Kugbo Ŋiro lo ŋutulo laga iyeyeŋundra ku malaika kanye kilo, ku mo’yu na Monye lonyelo i luŋa ŋani lu, lepe iroba ŋutu gele gele beti naga ma lepe kondrinina. 28Na takindra ta a ’diri, ku’de ŋutulu lo lira nide kilo aka wangu tuwani ti inga ko aku medra Ŋiro lo ŋutulo i pondra i tumata nanyena.”

will be added

X\