MARAKO 6

1Nyenaga Yesu aŋiyoro yu de‚ druga yeŋadru kanye ka yu. ’Bo lotodiniki ti lepe kilo druga kepodru lepe. 2I luŋa lo sabatolo lepe apoki i togo’yu i kadi naga a momorena kata yu‚ ’bo ŋutulu rodri laga lo yinga lepe kilo druga rambu ’beri koru‚ druga piza adi‚ “Ilo ŋutu de rumbi kine kulia de giri yeda ya? Totore na tiki lepena de a inyo? Meteta konesi naga ku teriŋi naga a drumala naga ma lepe kondri ku kenisi kanye kilo de kine! 3Ilo de ani gbo’da a kakepani lo mbaulo‚ ŋiro lo Maria ilo‚ luŋase lasi Yakobo kasi Yose ku Yuda ku Simonalo ya? Saseri ti lepe kine ani gbo’da a naga nide ku yi kugele kine ya? ’Bo koŋa abayi ku kulia ti lepe kine. 4Yesu druga takindra ko adi‚ “Kakeyonilo ani zara sopo‚ ’bo ku kanye ka yu‚ ku i dridriŋi na maratezi kanye kilo‚ ku lepe i ’ba yu lepe ani sopo.” 5Lepe aku romoki kondra kone le’de laga ku teriŋi yu de tro‚ ’bo lepe atandru kenisi kanye kilo i ŋutu laga ku ’beri na mimiye kilo kini i toruzo na ko. 6’Bo lepe arambu mugu koru ku gbo’da nasiko naga ’ba rugona. Lepe druga woro i dridriŋi na ’beŋito i togo’yu. 7Druga Yesu lungu ŋutulu mere gele ku konye mure kilo kanyeni, druga lepe poki i sonyodru na ko mure mure‚ atikindra ko teriŋi na tikani yukala naro kine. 8Lepe druga takindra ko kukuzu adi ka’bi ko ku zozoŋu le’de ŋo kasiko i worozi i kiko yu‚ ’bo turia ka’de‚ nyosuto ’bayi‚ zurua ’bayi‚ sente ’bayi kasiko i zebalani. 9’Bo ti ko sone kamuka kase mukuzini, ka’bi ko ku soso kotilo mure. 10Lepe druga takindra ko adi‚ “Ki ta alubo kadi yu‚ sakanita yu de yeŋadru i luŋa laga ma ta kolokindri nu ka de lu. 11Ku ta ani ruko i ne’de piri‚ ku ko aredra yinga na kulia kasu kine‚ kugbo ta kolokindro nu piri de‚ trutruŋeta putru naga kasu mukuzini kine a kpiye kasiko yu.” 12Nyena ŋiyoroni ko i trugo adi ti ŋutulu kilo lopuke teiliko. 13Ko druga rikodru dreria loro rodri‚ ko aŋindra wele i ŋutulu laga ku ’beri na mimiye rodri kilo kini‚ i totoruzo na koŋa. 14Nyenaga mata laga Herode ayinga kulia ŋani kine‚ igbonaga kari ti Yesu kine akuworo azona. ’Bo ku’de kilo akulia adi‚ “Yoane lo tikindra baputizi ilo aŋiyu i dridriŋi na ŋutulu laga atatuwa kilo. Kuwade kine teriŋito de se na kondra kita ku lepeni.” 15Ku’de kilo akulia adi‚ “Ilo de a kakeyoni be le’de ŋutu laga i dridriŋi na kakeyo ti ’bero kilo.” 16’Bo kugbo Herode laga ayinga kulia ŋani kine‚ lepe druga kulia adi‚ “Yoane‚ ŋutu laga ma na ’duŋundri kuwe ilo aŋiyu azo.” 17Ti Herode kazu asonyodru ŋutu i moga na Yoane‚ i todya na lepe i kadi naga a drodrorena kata yu ku kulia ti Herodia, noka na luŋase lonye laga Filipo‚ naga ma nye ’debina. 18’Bo Yoane kazu atakindra Herode adi‚ “Kukuzuna aku rugo gbo’da nonu naga seku noka na luŋosu ina.” 19Kuwade Herodia agbo’da ku yuma ku Yoane‚ lepe nyadru tatuza na lepe. ’Bo lepe aku romoki tro‚ 20igbonaga Herode akuze Yoane‚ adeni lepe a ŋutu laga mŋgba a lokiye ina‚ kuwade atizu lepe. Ku lepe laga ayinga lepe‚ lepe druga poki i bayi koru ’bo kpe‚ ayinga lepe ku nyola. 21’Bo Herodia arumbi kiko ku naga ma Herode tikindri tokomona nanye i luŋa lo soponi yuŋe nanyenalo ku temezi kanye kilo ku drumala ti katiyu kilo ku ŋutulu drumala ti Galili kilona. 22Kugbo ŋiro na Herodia ina alupundro i gboza‚ lepe druga tikindra Herode ku komo ti lepe kilo nyola. Matalo druga takindra ŋirona adi‚ “Make kapatio laga mo do nyadrinilo kuweni‚ ’bo na ititikindra do.” 23Lepe druga sarakindra lepe adi‚ “Kapatio laga mo do magini ilo na ititiki do‚ ’dibani kodro dridriŋi na tumata niona kpe.” 24Lepe druga lupodru i piza na ŋote nanyena adi‚ “Ma na magu inyo ya?” Ŋotena druga kulia adi‚ “Make kuwe lo Yoane lo tikindra baputizilo.” 25Ŋirona druga ’damaundra mugu wule wule‚ druga lupundro ku mataloni, druga magu ku lepeni adi‚ “Na nyadru tiki na tinaŋade kuwe lo Yoane lo tikindra baputizilo i senia kini.” 26Matalo druga gbo ku drelia koru, ’bo ku kulia ti milio nanyena, ku ti komo kanye kilo, lepe aku nyadru redra lepe. 27Wuleŋa gele matalo asonyodru katiyuni le’de laga lo tizu nyelo druga takindra lepe kukuzu i zondra na kuwelo. Kuwade lepe autu, a’duŋundro kuwelo i kadi naga a drodrorena kata yu‚ 28druga zondra i senia kini‚ druga tikindra ŋirona. Ŋirona druga tikindra ŋote nanyena. 29Ku lotodiniki ti Yoane kilo laga ayinga kulia ŋani kine‚ ko druga utu ku ’dokodru opu lo lepelo‚ i nuka yu. 30Lososonyo kilo kugbo ayite ku Yesuni‚ ko druga takindra lepe kuliata giri naga ma se kondri kine ku naga ma se togo’i kine. 31Lepe druga takindra ko adi‚ “Pondrita i tiko ta ka’delo i piri naga i diŋo kata yu, yukanita ’baziŋa.” Ŋutulu rodri lo pondra ku lo tutu, kuwade ’dibani kiko laga lo nyosu kpe, ko aku rio. 32Ko druga tu ku ki’bo i piri naga i diŋo kata yu, ko ka’delo. 33’Bo ŋutulu rodri amedra ko i tu yu, ko druga tritrimi tritrimi ko, druga wo ku mukuzi ŋiyu i kezino giri‚ druga yenga yu de a kayo. 34Ku Yesu ilupundro yu‚ lepe druga medra mongoyo na ŋutulu rodri‚ lepe druga gbo ku ediyo ku ko‚ igbonaga ko gbo beti kebilizi naga ’ba kayukuni kine ina. Lepe druga poki i togo’yu na ko kuliata rodri. 35Ku kolona naga gbo’di a’doro‚ lotodiniki ti lepe kilo apondra ku lepeni‚ druga kulia adi‚ “Na piri de a diŋo‚ kolona gbo’di ina ’do’doro. 36Sonyoro ko, ma ko ku utu i ka naga nyoga nu de i dridriŋi na ’beŋito i gborokindro na ’beri nyosu.” 37’Bo Yesu druga teyitokindro ko adi‚ “Tikita ko nyosuna ta lepe.” Ko druga kulia adi‚ “Yi roromoki utu i gborundro na nyosuto na romoki silingi alifu mure na ku tonyuweni kona ya?” 38Lepe druga piza ko adi‚ “ ’Diloto kasu kine muda ya? Utita ku meteta.” Ku ko laga adeni, ko druga kulia adi‚ “Mukana‚ ku somo mure.” 39Lepe druga takindra ko giri kukuzu i gbi’diki ka i leŋgbe kini ku dridriŋita dridriŋita. 40Kuwade ko druga gbigbi’diki ka a naŋu’du a naŋu’du, ku’de kilo kama kama‚ ku’de kilo meria mukana mukana. 41Lepe druga ’deba ’diloto naga mukana kine‚ ku somo laga mure kilo‚ druga boŋadrini ki i ’diko yu‚ lepe druga boriza ko‚ druga ŋoŋowuzu ko‚ druga tikindra lotodiniki kilo ma ko ku tikindra ŋutulu kilo. Lepe druga kodya somo laga mure kilo de ’do‚ kasiko i dridriŋini giri. 42Ko giri druga nyosu druga yiyimotu yiyimotu. 43Ko druga pependra ’diloto na ŋoŋoyi kine i nyakaleta katani zore zore mere gele ku konye mure ku limbito ti somo kilo itro. 44Ko laga lo nyosu ’diloto kulu lalia alifu mukana. 45Kuwade Yesu druga tikindra lotodiniki kanye kilo i lubo i ki’bo kata yu i laŋadru i lu lozo Betesaida yu kanye koŋo yu, ti inga lepe ilo i teteriza mongoyo na ŋutulu kilo boni. 46Ku lepe laga akolokindro ko, lepe druga tu i mere ki yu i magu na Ŋun. 47Ku gbo’dini kotriana‚ ki’bona nu suburi kata yu‚ ti Yesu lu ka’delo i kuti yu. 48Kuwade lepe amedra ko i sasandru na ’beri i kodru na pio kine‚ igbonaga kobuŋena nu burundra kasikonina. Kugbo wara na kana naga gbo’di nyoga‚ lepe druga pondra kasikoni i woro suburi kini. Lepe kodro nyadru rosodru. 49’bo ku ko laga amedra lepe i woro suburi kini‚ ko druga rambu adi ŋolo a mulete‚ ko druga reresa. 50’Bo ko giri amedra lepe‚ ko druga kuze koru. ’Bo wuleŋa gele lepe druga takindra ko adi‚ “Gbo’dita ku teiliko logo‚ ŋolo a na. Ku kukuzeta.” 51Lepe druga lubo i ki’bo kata yu‚ ’bo kobuŋena druga gbigbi’diki. ’Bo ko arambu ’beri koru‚ 52igbonaga ko aku yo’yu bo na kulia ti ’diloto kinena‚ ’bo teiliko kasiko kilo a logo. 53Ku ko laga alangu i lu lozo‚ ko druga yeŋadru i ka naga Genesaretana kata yu‚ ko druga sodru ki’bona suburi i kuti yu. 54Ku ko laga alupodru, ŋutulu kilo druga tritrimi tritrimi Yesu agbole. 55Ko druga wo mu pirito naga i nyoga na nu ka de kine‚ druga poki i zondra na ŋutulu laga ku tuwanezi kilo i paria kase kine kini i piri naga ma ko yingi lepe kata yu ina. 56Pirito giri naga ma lepe utini kunu‚ i ’beŋito, i kezino‚ i ka naga kaŋo‚ ko druga topirikindra ŋutulu laga ku tuwanezi kilo i pirito na togboreni kapazi kilo kine‚ ko ama’yu ’beri ku lepeni ti ko ’bole ’dibani kodro kutu na bongo na lepena ka’delo. Ŋutulu giri laga lo ’bo’yu kilo‚ ’beri kasiko kine druga koko’yu.

will be added

X\