MARAKO 5

1Ku ko laga ayeŋadru suburi i kutu yu i lu lozo i ka na Gerasenana kata yu, 2kugbo Yesu laga alupodru i ki’bo kata yu kaŋo, ŋutu laga ku yuka naro druga lupundro i dridriŋi na gulomo kine, i momora seku lepe. 3Ŋutu ŋanilo lu saka i dridriŋi na gulomo kine yu, ’bo le’de ŋutu ’bayi lo romoki todya lepe ’dia kodro ku maaroki kpe. 4Kazu ko atodya lepe luŋa rodri ku riye na totokuwa ku maaroki, kuwade lepe bita giginyiza maaroki kilo, druga ’de’deŋozu riye kine toŋ toŋ, kuwade ŋutu laga ku teriŋi i tiga na lepe ’bayi. 5Tukaze ku tupara lepe lu saka i dridriŋi na gulomo kine ku i meria ki yu, lepe bita reresatu, bita popotozu mugu ku ŋoropo. 6Ku lepe laga ameri Yesu pazo yu, lepe druga wo i ruguŋo ka ku lepe i koŋo yu i teminizo na lepe, 7druga resa koru adi, “Yesu, Ŋiro lo Ŋun laga ki koru ilo, kulia kaya seku do kine a ti nyo ya? Na kongu mugu ku do ku kari ti Ŋun kine, ku sasanyi na.” 8Ti Yesu atakindra lepe adi‚ “Lupundri ku lepe kata yu kaŋo‚ do yuka naro!” 9Yesu druga piza lepe adi‚ “Kari konu kine se naga ŋa ya?” Lepe druga teyitokindro Yesu adi‚ “Kari kuwe kine se naga Mongoyo, igbonaga yi rodrina.” 10Lepe druga piza Yesu ku ma’yu na mugu koru adi lepe ka’bi ku sosonyoro se i nu ka de kaŋo tro. 11Ti mongoyo na wuriyo rodri kulu rata i mere muko yu. 12Dreria kilo druga ma’yu ’beri ku Yesuni adi‚ “Sonyoro yi i wuriyo yu, ma yi ku lubo kata yu.” 13Kuwade Yesu arukokindro ko. Yukala naro kine druga lupundro, druga lubo i wuriyo kilo kata yu. Mongoyo na wuriyo kilo druga pu’dozi i goloto yu, ko druga ’do’doro suburi kata yu, kene lasikolo a alifu mure, ko druga ruruto i suburi kata yu. 14Kayuku ŋani kilo druga wo, i trugo na kulia ŋani kine i nu kezi de kata yu‚ ku i nu ka de kata yu itro. Ŋutu kilo druga lupundro i medra na kulia naga na kondra ’beri kine. 15Ku ko laga apondra ku Yesuni‚ ko druga medra ŋutu laga ku dreria loro ilo ti lu agbi’diki, ti lu asozu mugu ku bongola, ti kpinyi kine gbo’di a na’bu, ŋutu ŋanilo a ŋutu laga kazu a lo gbo’da ku drerialo. Ko druga gbo ku kuze. 16Ŋutulu laga amedra kulia ŋani kine kilo druga kekenadru kulia na kondra ’beri i ŋutu laga ku dreria loro ilo, ku i wuriyo kilo itro kine. 17Ko druga poki i ma’yu na ’beri ku Yesuni adi ti lepe pilarani kase kani kaŋo. 18Ku lepe ilubo i ki’bo kata yu, ŋutu laga kazu ku dreria loro ilo druga ma’yu mugu ku lepeni adi ti nye sakani seku lepe. 19’Bo Yesu aku rugo, druga takindra lepe adi, “Yitoni konu ’ba yu, ku maratezi kolu kilo yu, ku trukoki ko kulia naga a drumala naga ma Matalo kondri konuni, naga ma lepe gbo’dini ku ediyo ku do kine.” 20’Bo lepe autu, druga poki i trukodru Dekapoli yu kulia drumala naga ma Yesu kondri kanyeni kine giri. Ŋutulu kilo giri druga rambu ’beri koru. 21Kugbo Yesu laga alaŋadru ku ki’bo i lu lozo, mongoyo na ŋutulu kilo druga tunadru ’beri ku lepe yu, ti lepe lu gbo suburi i kutu yu. 22Druma le’de lo kadi naga a momorenalo druga pondra itro, kari ti lepe kine se naga Yairo. Ku lepe laga amedra Yesu, lepe druga memereke ka ku lepe i mukuzini, 23druga ma’yu mugu ku lepeni adi, “Ŋiro niona nu tutuwa. Pondri ku tanye kenisi kolu kilo ku lepe kini, ma lepe totoruwe ma gbo’da zoru.” 24Yesu druga pilara seku lepe. ’Bo mongoyo na ŋutulu rodri akekepodru lepe‚ ariri’diza lepe. 25Nyenaga ne’de noka naga rima kine awonu ku lepe i muguni kiŋazi mere gele ku konye mure. 26’Bo lepe asasandru mugu koru i ’buniko rodri, lepe akokorozu kapazi kanye kilo giri‚ aku rumbi ko’yu na mugu tro‚ ’bo ayeŋundra a naro ku lepe i muguni ’do ’do. 27Kugbo lepe naga ayinga kulia ti Yesu kine‚ lepe druga yeŋundra ku Yesu i ki’di i dridriŋi na mongoyona‚ druga ’bo’yu bongo na lepena. 28’Bo lepe arambu adi‚ “Ku na ’bo’yu bongo na lepena ka’delo ’du‚ na itotoruwe.” 29Wuleŋa gele rima na wonu kine druga lelenga, lepe druga dendra kanye muguni adi tuwane lonyelo ako’yu. 30Ku Yesu laga adeni kanye teilini agbole adi teriŋi na wonye nanye ne’dena alupodru kanye muguni kaŋo‚ lepe druga lopugo mugu i mongoyo kata yu‚ druga piza adi‚ “Ŋa lo ’bo’yu bongo niona ya?” 31Lotodiniki ti lepe kilo druga teyitokindro lepe adi‚ “Mete‚ mongoyo na ŋutulu kilo riri’diza do‚ ’bo do piza adi ŋa lo ’bo’yu do de gbandra ya?” 32Lepe druga wodyu i dendra na ŋutu naga na kondra kine kulia de ina. 33Noka ŋanina‚ ti nu adeni kulia naga ma kondri ’beri kanye muguni kine druga pondra ku kuze‚ kuzangu na mugu itro‚ druga mereke ka ku Yesu i mukuzini, druga trukokindro lepe bo na kulia ŋani kine giri. 34Yesu druga takindra lepe adi‚ “Ŋirona‚ rugo nonuna atoruzo do‚ pilarani ku teili lo trotro‚ tuwane lolulo ti ko’ini ko’yu.” 35Kugbo Yesu inga ilo kukulia, ŋutulu ku’de druga ŋiyu i kadi na druma ŋanilo kata yu‚ ko druga takindra lepe adi‚ “Ŋiro nonuna a’doro. Do sasandru Katogolonilo ’do gbandra ya?” 36’Bo Yesu druga ’da’dari kulia naga ma ko tazi kine kaŋo‚ lepe druga takindra druma lo kadi naga a momorena ilo adi‚ “Ku kukuze‚ rugi ayu.” 37Lepe aku rugo adi le’de ŋutu ti keporo bo nanye ina‚ ŋo kilo a ku Petero seku Yakobo ku Yoane‚ luŋase lo Yakobolo ka’delo. 38Kugbo ko laga ayenga ku druma lo kadi naga a momorena ilo kadi yu‚ lepe druga yinga resa‚ amedra ŋutulu lo gbigbiye rodri ku ku’de kilo luluzo luluzo koru. 39Kugbo lepe laga alubo‚ lepe druga piza ko adi‚ “Ta reresatu de ku gbigbitu de gbandra ya? Ŋirona aku tuwa‚ lepe ina tototo.” 40Ko druga zo­nya lepe koru. ’Bo lepe atolupodru ko giri kaŋo‚ druga zonga monyelo seku ŋote na ŋirona ku ŋutulu lo gbo’da kasi nye druga lubo i piri naga ŋirona ma gbo’dinina kata yu. 41Ku lepe laga a’deba lepe ku keni‚ lepe druga takindra lepe adi‚ “Talita kumi‚” trugo adi‚ “Ŋirona‚ na takindra do‚ ŋine.” 42Wuleŋa gele ŋirona druga ŋiŋiye‚ druga poki i woro. Ti lepe gbo ku kiŋazi kilo mere gele ku konye mure. Ko druga rambu ’beri koru. 43Yesu druga takindra ko kukuzu ku teriŋi adi le’de ŋutu ka’bi ku dedeni kine kulia de tro‚ druga takindra ko adi ti ko tiki ŋirona nyosu.

will be added

X\