MARAKO 2

1Kugbo Yesu laga ayitozi bo Kaperinauma yu i bo na luŋa ku’de, kulia ti lepe na gbo’dmiki i ’ba yu kine druga kuworo. 2Ti ŋutulu rodri atunundra ’beri kugele, kuwade ko aku rumbi piri tro, ’dibani kodro ’baziŋadroo de kpe. Lepe druga trukokindro ko kulia. 3Nyenaga ku’de ŋutulu apondra ku lepeni i zondra na ŋutu laga a liwa‚ ŋutulu iŋmani lo ’dukundro lepe. 4Kuwade kugbo ko laga aku romoki mizu nyogoŋa ku Yesuni ku kulia ti mongoyo na ŋutuluna‚ ko druga ŋanyadru lo’de lo kadi lo gbo’da ku lepe kini ilo. Kugbo ko laga aŋazu‚ ko druga soodru pari na ŋutu laga a liwalo ma pirikinina. 5Ku Yesu laga amedra rugo nasikona‚ lepe druga takindra ŋutu laga a liwalo adi, “Ŋirolo‚ torozi konu kine a’diya.” 6Ti katogolo ku’de ti kukuzuna kulu agbi’diki yu de i pipiza na ’beri kase teilikoni adi‚ 7“Ilo ŋutu de kulia de gbandra ya? Lepe ilo momorozu Ŋun. Ŋa lo romoki i ’diza na torozi, agbo’da Ŋun ka’deloni ya?” 8Ku Yesu laga adeni kanye teilini adi ko pipiza ’beri deŋa, lepe druga piza ko adi, “Ta pipiza ’beri de kasu teilikoni gbandra ya? 9Kulia naga ya naga gbo pa’de’de ŋona taki na ŋutu laga a liwalo adi, ‘Torozi konu kine a’diya,’ kugbo ŋona naga adi, ‘Ŋine, ’dokoro pari nonuna, woroni,’ ina ya? 10’Bo deneta adi Ŋiro lo ŋutulo gbo ku teriŋi i kani i ’diza na torozi.” Kuwade lepe druga takindra ŋutu laga a liwalo adi, 11“Na takindra do, Ŋine‚ ’dokoro pari nonuna‚ yitoni konu ’ba yu.” 12Kuwade lepe druga ŋi‚ druga ’dokodru pari nanyena‚ druga lupodru kaŋo kasiko i koŋoni. Kuwade ko giri arambu ’beri koru‚ druga pudya Ŋun‚ adi‚ “Yi aku medra bita le’de ŋo de ’bero.” 13Yesu druga lupodru ’do suburi i kutu yu‚ ’bo mongoyo na ŋutulu kilo giri druga tunundra ’beri kugele ku lepeni‚ lepe druga togo’yu ko. 14Ku lepe i rosodrini, lepe druga medra Levi‚ ŋiro lo Alifayolo, ti lu agbi’diki i piri naga a wure na mosorona i kutu yu‚ lepe druga takindra lio adi‚ “Keporo bo niona.” Levi druga ŋiyoro i kepodru na lepe. 15Ma Yesu gbi’dikini i mesa kutuni ku Levi kadi yu ina, kawuro ti mosoro kilo ku katoronya kilo rodri agbi’diki kasi Yesu kugele ku lotodiniki ti lepe kilo, ’bo ŋutulu lo kepodru lepe kilo rodri. 16Katogolo ti kukuzuna kilo ku Farisayo kilo ku amedra Yesu i nyosu kasi katoronya kilo ku kawuro ti mosoro kilo kugele, ko druga piza lotodiniki ti lepe kilo adi‚ “Lepe nyosu kasi kawuro ti mosoro kilo ku ŋutulu loro kilo kugele gbandra ya?” 17Kugbo Yesu laga ayinga kulia ŋani kine‚ lepe druga takindra ko adi‚ “Ŋutulu laga ku ’beri a lo’bu kilo ani miyundro ’buni tro‚ ’bo ŋutulu laga ku ’beri na mimiye kilo se lo miyundro. Na agbo’da pondra ku lungu ŋutulu laga mŋgba kiloni, ’bo ŋutulu loro kilo.” 18Nyenaga lotodiniki ti Yoane kilo ku ti Farisayo kilo kulu kukuka. ’Bo ŋutulu ku’de kilo druga pondra, druga piza Yesu adi, “Lotodiniki ti Yoane kilo ku lotodiniki to Farisayo kilo kukuka, ’bo lotodiniki kolu kilo ani kuka gbandra ya?” 19Yesu druga piza ko adi, “Otalaki laga i tokomona na ’depani nokana roromoki kuka ti ka’depani lo nokalo ilo kasi ko kugele ya? Luŋa laga ka’depani lo nokalo ma gbo’dini kasi ko kugelelo, ko ani romoki kuka tro. 20Luŋa ku’de laga ma ka’depanilo ku ’dumazini kasiko i dridriŋini kilo iyeyeŋundra, ko bulo ku kuka i lu luŋa de. 21Le’de ŋutu ’bayi lo riba ’diye na bongo naga aku lalayi i mugu na bongo naŋoru. Ku lepe kondra de, ’diyena ikekenyi na’berona‚ kendra ŋanina iyeyeŋundra a naro arodru. 22Le’de ŋutu ’bayi lo tudya suwe ti konye ti zabibu naga a pupu kine i ’dereŋa loŋoru kata. Ku lepe kondra de‚ suwe ti konye ti zabibu naga a pupu kine itotopu’du ’dereŋa ŋani kilo‚ kuwade ikokorozu ku ’dereŋa kilo itro. Suwe ti konye ti zabibu naga a pupu kine nyadru ti turani i ’dereŋa laga a loluduko kata.” 23I luŋa le’de lo sabatolo Yesu lu woro i melesiŋo kata yu. I naga ma ko rosodrinina, lotodiniki ti lepe kilo apoki i mimirindra na kuweto ti kinyo. 24Ŋutu ti Farisayo kilo druga piza lepe adi‚ “Mete‚ ko kondra kulia naga kukuzuna aku rugo i luŋa lo sabatolo gbandra ya?” 25Lepe druga piza ko adi, “Ta aku keni kulia naga ma Dawidi kondri kine, ti lepe gbo ku mago ’ba nyosu, lepe ku ŋutulu laga kasi lepe kugele kilo ya? 26Lepe alubo ku Ŋun kadi yu, ti inga Abiatari ma gbo’dini a ka’i’ilani laga a leŋgberelona, druga nyosu mugati naga na ’delaki ku Ŋun i koŋo yu, naga ŋutulu ku’de ani romoki nyosu kine‚ ’bo bita ka’i’ila ka’delo lo nyosu, ’bo lepe druga tikindra ŋutulu laga kasi nye kilo itro.” 27Lepe druga takindra ko adi, “Luŋa lo sabatolo agbeki a lo ŋutulu, agbo’da ŋutulu kilo lo gbeki a ti luŋa lo sabatoloni. 28Kuwade Ŋiro lo ŋutulo laga a mata lo luŋa lo sabatolo.”

will be added

X\